Kacenu, luutwanga lipiho za batu bababulela lipulelo zemaswe, babatahisa mifilifili kabakala kuli batoile batu babañwi, babalwanisanga batu babañwi kabakala kuli ki ba mushobo usili ni lipiho za lindwa.

•   “Kacenu fa Intaneti kutezi lipulelo zemaswe kufita lili kaufela bakeñisa ndwa ye mwahalaa Israel ni Gaza ni kabakala batu babatahisa mifilifili.”—Mutende wa The New York Times, November 15, 2023.

•   La November 3, 2023, bo Dennis Francis, baeteleli ba katengo ka United Nations General Assembly nebabulezi kuli: “Kuzwa feela la October 7, sitoyo, lipulelo zemaswe ni mifilifili yetahiswa ki ketululo liekezehile hahulu mwa lifasi.”

 Lipulelo zemaswe, mifilifili, ni lindwa haki zenca. Mane Bibele ibulela za batu ba kwamulaho bane “[banongisize] manzwi abona asituhu, sina masho” ni bane batahisanga lindwa ni mifilifili. (Samu 64:3; 120:7; 140:1) Niteñi Bibele ibulela kuli sitoyo sesiliteñi mwa lifasi kacenu sibonisa nto yeñwi ya butokwa.

 Bibele ibonisa mabaka amabeli sitoyo hasiatile hahulu mwa lifasi kacenu.

1.  1. Bibele neipolofitile ka za nako ili fo ‘lilato la babañata nelikafola.’ (Mateu 24:12) Mwa sibaka sa kubonisa lilato, batu nebakaba ni mikwa yeneka tahisa kuli batoye batu babañwi.—2 Timotea 3:1-5.

2.  2. Sitoyo sesiliteñi mwa lifasi kacenu sibonisa kuli Satani Diabulosi ki yena yazamaisa lifasi. Kakuli mane Bibele ibulela kuli “lifasi kaufela li mwa maata a yamaswe.”—1 Joani 5:19; Sinulo 12:9, 12.

 Nihakulicwalo, Bibele hape ibonisa kuli honacwale-cwale fa Mulimu atuha afelisa lika kaufela zetahisa sitoyo. Mi sa butokwa nikufita ki kuli ukafelisa manyando kaufela atahisizwe ki sitoyo. Bibele isepisa kuli:

•   Mulimu “ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku. Zapili lifelile.”—Sinulo 21:4.