Ba kopano ya United Nations babiha kuli:

•   Kuzwa la October 7 kuisa la October 23, 2023, mifilifili yemwahalaa Gaza ni Israel itahisize kuli batu babafitelela 6,400 babulaiwe mi ba 15,200 baholofezi kabakala mifilifili yeo, mi buñata bwabona ki batu babasi masole. Hape batu babañata-ñata babalehezi kwa libaka lisili.

•   Halutofita la September 24, 2023, ndwa yemwahalaa Russia ni Ukraine itahisize kuli batu babasi masole ba 9,701 babulaiwe mi ba 17,748 baholofezi mwa Ukraine.

 Bibele ifa sepo mañi kwa batu babanyanda kabakala lindwa?

 Bibele neipolofitile kuli Mulimu ‘ukafelisa lindwa mwa lifasi kamukana.’ (Samu 46:9) Ukaitusisa mulonga kamba mubuso wa kwa lihalimu, kuli uzwise mibuso ya batu kaufela. (Daniele 2:44) Mubuso wa Mulimu ukafelisa manyando kaufela ebakopana ni ona batu.

 Mulemuhe zakaeza Mulena wa Mubuso wa Mulimu, yena Jesu Kreste:

•   “Kakuli ukalamulela mubotana yalilela kutusiwa, ni mutu wa mayemo a kwatasi ni mutu kaufela yasina yamutusa. Ukashwela makeke mutu wa mayemo a kwatasi ni mubotana, mi ukapilisa bupilo bwa babotana. Uka balamulela kwa buhateleli ni kwa mifilifili.”—Samu 72:12-14.

 Ka kuitusisa Mubuso wahae, Mulimu ukafelisa ka kutala manyando ni lika kaufela zemaswe zetahiswa ki lindwa ni mifilifili.

•   “Ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku. Zapili lifelile.”—Sinulo 21:4.

 Honacwale-cwale fa, Mubuso wa Mulimu ukaeza licinceho zetuna fa lifasi. Bibele neipolofitile ka za “lindwa ni lipiho za lindwa” zesweli kuezahala kacenu. (Mateu 24:6) Lika ze ni likezahalo zeñwi libonisa kuli lupila mwa “mazazi a mafelelezo” a lipuso za batu.—2 Timotea 3:1.