Mwa piho yene izwisizwe mwa June 2022, prezidenti wa World Bank Group naafile temuso ya kuli, “Sifumu sa lifasi si mwa butaata. Liteko lisweli zaekezeha zazi ni zazi kono batu habana masheleñi.”

 Katengo ka International Monetary Fund kalemuhile kuli “Liteko za mafula ni lico liekezehile hahulu mi nto yeo itahisize butata sihulu kwa batu ba mwa linaha zeshebile.”

 Bibele ilutusa kuutwisisa libaka halutalimana ni miinelo yetaata yecwalo, molukona kutiyela miinelo yeo, ni zekatahisa kuli miinelo yeo isike yabateñi kuya kuile.

•   Bibele italusa mazazi elupila ku ona kuli ki “mazazi a mafelelezo.”—2 Timotea 3:1.

•   Jesu naabulezi kuli “lika zesabisa,” kamba likezahalo zesabisa likaezahala mwa mazazi a mafelelezo. (Luka 21:11) Kuekezeha kwa liteko kutahiseza batu sabo. Batu baikalelwanga ka za zekaezahala kwapili ni ka za haiba nji baka kona kufumanela lubasi lwabona zebatokwa.

•   Buka ya Sinulo neibulezi cimo ka za kutula kwa lico mwa linako za mafelelezo ze. “Nautwa nto yeneutwahala inge linzwi. . . . Haili: ‘Kilo iliñwi ya buloto kamba makilo amalaalu amabele likalekwa masheleñi akona kubelekela mutu lizazi kaufela.’”—Sinulo 6:6, toloko ya Easy-to-Read Version.

 Kuli muzibe zeñata ka za “mazazi a mafelelezo” ni bupolofita bobufumaneha mwa buka ya Sinulo, mubuhe vidio yeli Miinelo Mwa Lifasi Icincize Hahulu Kuzwa ka 1914 ni kubala taba yeli “Bapahami ba Lipizi Babane—Ki bo Mañi?”

•   “Bakayaha mandu ni kupila mwateñi, mi bakacala masimu a likota za veine ni kuca miselo yazona. Habana kuyaha mandu kuli kupile mwateñi basili, mi habana kucala likota kuli miselo yazona iciwe ki basili.”—Isaya 65:21, 22.

•   “Kukaba ni bubeke bobuñata mwa lifasi; bukaba bobuñata hahulu fahalimwaa malundu.”—Samu 72:16.

•   “‘Bakeñisa kuli babanyandile bahatelelwa, bakeñisa kutonga kwa babotana, nikayema ni kuunga muhato,’ kubulela Jehova.”—Samu 12:5. a

 Honacwale-cwale fa Mulimu ukafelisa miinelo ya kutokwa masheleñi, mwa lifasi kaufela isiñi mwa naha iliñwi feela. Kuli muzibe mwaakaezeza cwalo, mubale taba ya sikuwa yeli “Is a Fair Economic System Possible?”

 Kono nihaiba kacenu, Bibele yakona kumitusa kutiyela butata bwa kupahama kwa liteko. Ka nzila ifi? Bibele inani likelezo zetusa ka za mwakuitusiseza hande masheleñi. (Liproverbia 23:4, 5; Muekelesia 7:12) Kuli muzibe zeñata mubale taba yeli “Musileleze Mupilelo Wamina” ni yeli “Momukona Kupilela Hamusina Hande Masheleñi.”