MUZWELEPILI KUTONA!

Ndwa Yeezahala Kwa Ukraine Itahisa Kuli Lico Litaele Hahulu Mwa Lifasi Kaufela

MUBAPALE

La May 19, 2022, makwambuyu babafitelela 75 nebazibisize ba katengo ka UN kakabona za buiketo bwa batu mwa lifasi ka United Nations Security Council kuli: “Butata bwa kutaela kwa lico mwa lifasi kaufela, bobutisizwe ki butuku bwa COVID-19 ni kucinca kwa mayemo a lihalimu, kikale buekezeha hahulu kabakala ndwa yeezahala mwa naha ya Ukraine.” Hamulahonyana wa mukopano wa makwambuyu bao, mutende obizwa The Economist neubihile kuli “ndwa ye isweli kutisa tala yetuna hahulu mwa lifasi kaufela.” Bibele neibulelezi cimo kuli lico nelika taela mwa linako zaluna, kono hape ilufa sepo ni likelezo zelutusa kutiyela miinelo yecwalo.

Bibele neibulelezi cimo kuli lico nelika taela

Jesu naapolofitile kuli: “Sicaba sikalwanisa sicaba sesiñwi, ni mubuso ulwanise mubuso omuñwi, mi lico likataela.”—Mateu 24:7.
Mwa buka ya mwa Bibele ya Sinulo, kubulezwi za bapahami ba lipizi babane ba swanisezo. Yomuñwi wa bapahami ba lipizi bao uyemela ndwa. Ulatelelwa ki mupahami wa pizi yomuñwi yayemela tala, ili kupolofita nako yeo nekukaba hahulu taata kufumana lico, mi lico nelika tula hahulu. Bibele ili: “Nabona pizi yensu, mi yanaa ipahami naasweli likala zepeli mwa lizoho lahae. Nautwa nto yeneutwahala inge linzwi . . . , haili: ‘Kilo iliñwi ya buloto ilekwe dinari iliñwi, mi makilo amalaalu a mabele alekwe dinari iliñwi.’”—Sinulo 6:5, 6.

Bupolofita bwa mwa Bibele bobubulela za kutaela kwa lico busweli bwatalelezwa mwa nako yona ye, yebulezwi mwa Bibele kuli ki “mazazi a mafelelezo.” (2 Timotea 3:1) Kuli muzibe zeñata ka za “mazazi a mafelelezo” ni likezahalo zetiswa ki bapahami ba lipizi bababulezwi mwa buka ya Sinulo, mubuhe vidio yeli, Miinelo Mwa Lifasi Icincize Hahulu Kuzwa ka 1914, mi mubale taba yeli, “Bapahami ba Lipizi Babane—Ki bo Mañi?”

Moikona kumituseza Bibele

Mwa Bibele kufumaneha likelezo zetusa zekona kulutusa kutiyela miinelo yetaata yelukopana ni yona, yekopanyeleza kuekezeha kwa liteko za lico mane cwalo ni kutaela kwa lico. Mubale likelezo zecwalo mwa taba yeli, “How to Live on Less.”
Bibele hape ilufa sepo ya kuli kwapili lika likaba hande. Ilusepisa nako yeo “kukaba ni bubeke bobuñata mwa lifasi” mi batu kaufela bakaba ni lico zeñata. (Samu 72:16) Kuli muzibe zeisepisa Bibele kuli likaezahala kwapili, mubale taba yeli, “A Real Hope for a Better Tomorrow.”