Ndwa yeezahala mwa naha ya Ukraine, hamohocwalo ni butata bobutahiswa ki kubata ni kucisa hahulu, lizwelapili kutahisa kuli lico libe zenyinyani mwa lifasi kaufela. Muinelo wo sihulu uezahala mwa linaha zezwezipili ili mo batu babañata kubabelanga taata kufumana lico zeñata.

•   La July 17, 2023, bo António Guterres, bañoli ba kopano ya UN nebabulezi kuli: “Lika zecwale ka lindwa, butata bwa kubata ni kucisa hahulu, liteko za mafula ni zeñwi cwalo litahisa kuli lico lisike zabateñi ka buñata.”

•   La July 23, 2023, fa webusaiti ya Atalayar.com nekubihilwe kuli: “Licaziba baakaleza kuli muhato oingile Naha ya Russia wa kuhana kuzwelapili kuba mwa tumelelano ya kulekisanga lico kwa linaha zeñwi ukona kutahisa kuli lico libe zenyinyani hahulu nikufita mwa lifasi kaufela, ni kuli lico likatula hahulu mwa linaha zebotanile sihulu mwa linaha zefumaneha kwa mutulo wa Africa ni kwa Middle East.”

 Munyakisise zeibulela Bibele ka za kutaela kwa lico ni ka za lika zekaezahala kwapili.

•   Jesu naapolofitile kuli: “Sicaba sikalwanisa sicaba sesiñwi, ni mubuso ulwanise mubuso omuñwi, mi lico likataela.”—Mateu 24:7.

•   Mwa buka ya mwa Bibele ya Sinulo, kubulezwi za bapahami ba lipizi babane ba swanisezo. Yomuñwi wa bapahami ba lipizi bao uyemela ndwa. Ulatelelwa ki mupahami wa pizi yomuñwi yayemela tala, ili kupolofita nako yeo nekukaba hahulu taata kufumana lico, mi lico nelika tula hahulu. Bibele ili: “Nabona pizi yensu, mi yanaa ipahami naasweli likala zepeli mwa lizoho lahae. Nautwa nto yeneutwahala inge linzwi . . . Haili, ‘Kilo iliñwi ya buloto ikalekiwa dinari iliñwi! Makilo amalaalu amabele akalekiwa dinari iliñwi.’”—Sinulo 6:5, 6, Bibele ya Contemporary English Version.

 Bupolofita bwa mwa Bibele bobubulela za kutaela kwa lico busweli bwatalelezwa mwa mazazi aluna, ona abulezwi mwa Bibele kuli ki “mazazi a mafelelezo.” (2 Timotea 3:1) Kuli muzibe zeñata ka za “mazazi a mafelelezo” ni likezahalo zetiswa ki bapahami ba lipizi bababulezwi mwa buka ya Sinulo, mubuhe vidio yeli, Miinelo Mwa Lifasi Icincize Hahulu Kuzwa ka 1914, mi mubale taba yeli, “Bapahami ba Lipizi Babane—Ki bo Mañi?”

•   Mwa Bibele kufumaneha likelezo zetusa zekona kulutusa kutiyela miinelo yetaata yelukopana ni yona, yekopanyeleza kuekezeha kwa liteko za lico mane cwalo ni kutaela kwa lico. Mubale likelezo zecwalo mwa taba yeli, “How to Live on Less.”

•   Bibele hape ilufa sepo ya kuli kwapili lika likaba hande. Ilusepisa nako yeo “kukaba ni bubeke bobuñata mwa lifasi” mi batu kaufela bakaba ni lico zeñata. (Samu 72:16) Kuli muzibe zeisepisa Bibele kuli likaezahala kwapili ni libaka hamukona kusepa zeibulela, mubale taba yeli, “A Real Hope for a Better Tomorrow.”