Lindwa lisinyanga masheleñi amañata.

•   “Mwa silimo sesifelile mibuso ya mwa lifasi kaufela neiitusisize masheleñi afita fa madola a 2.2 trilioni mwa lindwa. Mi hakusika itusiswa kale masheleñi amañata hahulu cwalo mwa lindwa zenebile teñi mwa lilimo za kwamulaho.”—Mutende wa The Washington Post, February 13, 2024.

 Lindwa lisinyanga lika zeñata kwandaa feela masheleñi. Munyakisise feela mutala ulimuñwi wo: Ndwa yeezahala mwa Ukraine.

•   Masole. Kuzwa feela foikaliseza ndwa ya mwa Ukraine lilimo zepeli kwamulaho, kuakalezwa kuli ibato ba masole babaeza 500,000 babulailwe kamba kuholofala mwa ndwa ye.

•   Batu babasi masole. Ka kuya ka piho ya katengo ka UN, batu babafitelela 28,000 babulailwe kamba kuholofala. Nihakulicwalo, yomuhulu wa katengo ka UN naabulezi kuli: “Hakukonahali feela kuziba palo kaufela ya batu babashwile kamba babaamilwe ki ndwa ye.” a

 Lindwa litahiselize batu manyando amañata mwa lifasi kaufela.

•   Haluto fita mwa kweli ya September 2023, batu ba 114 milioni nebabalehile mwa libaka zabona kabakala ndwa ni mifilifili.

•   Batu ba 783 milioni habana lico zeñata. Ba katengo ka World Food Programme babiha kuli: “Mifilifili isazwelapili kutahisa kuli kube ni tala yeñata, mi 70 pesenti ya batu babapila mwa libaka mokunani lindwa habana lico.”

 Kana lindwa likafela muta omuñwi? Kana lwakona kuba ni sepo ya kuli fa lifasi kukaba ni kozo? Kana kukaba ni nako ili fo mañi ni mañi ukaba ni lico zeñata? Bibele ibulelañi fa taba yeo?

 Bibele neipolofitile kuli kukaba ni lindwa mwa lifasi kaufela, mi neiswaniselize lindwa zeo ku mupahami wa pizi.

•   “Kwazwa pizi yeñwi yefubelu sina mulilo, mi yanaa ipahami afiwa maata a kuzwisa kozo mwa lifasi kuli batu babulayane, mi afiwa mukwale omutuna.”—Sinulo 6:4.

 Mupahami wa pizi yo ulatelelwa ki bapahami ba lipizi bababeli ili babayemela lukupwe ni lifu zetiswa ki matuku ni lika zeñwi. (Sinulo 6:5-8) Kuli muitute zeñata ka za bupolofita bo ni libaka halukona kuba ni buikolwiso bwa kuli busweli bwatalelezwa mwa linako zaluna, mubale taba yeli, “Bapahami ba Lipizi Babane—Ki bo Mañi?”

 Honacwale-cwale fa, sifumu sa lifasi hasisana kuitusiswa mwa ndwa. Nihakulicwalo, batu haki bona babaka tahisa kuli kube cwalo. Bibele ibulela kuli:

•   Mulimu ukafelisa “lindwa mwa lifasi kamukana.”—Samu 46:9.

•   Mulimu ukafelisa miinelo yetaata kaufela yesweli kutahiswa ki lindwa. “Ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku. Zapili lifelile.”—Sinulo 21:4.

•   Mulimu ukabona teñi kuli batu kaufela bapila mwa kozo. “Sicaba saka sikaina mwa sibaka sa kozo sesiinelezi, mwa mandu atiile ni mwa mapumulelo a kozo.”—Isaya 32:18.

 Ka kuya ka bupolofita bwa mwa Bibele, lindwa ni lika zeñwi zesweli kuezahala mwa lifasi kacenu libonisa kuli nako ya kozo isutelezi.

 Mulimu ukatahisa cwañi kuli kube ni kozo mwa lifasi? Ukaeza cwalo ka kuitusisa Mubuso wahae wa kwa lihalimu. (Mateu 6:10) Kuli muzibe za Mubuso wo ni moukona kumituseza, mubuhe vidio yekuswani yeli, Mubuso wa Mulimu ki Nto Mañi?