La May 23, 2023, yomuhulu wa liluko la makete mwa United States naalemusize batu ka za mo mawebusaiti a kulumelana ka ona mashango asweli kuamela maswe babanca babañata.

•   “Nihaike kuli mawebusaiti a kulumelana ka ona mashango asweli kutusa banana ni babanca baba mwa lilimo za kunonoboka, kunani bupaki bobubonisa kuli mawebusaiti a kulumelana ka ona mashango akona kubatahiseza butata bwa mwa munahano ni kwa mubili.”—Buka ya Social Media and Youth Mental Health: The U.S. Surgeon General’s Advisory, 2023.

 Buka yeo neibulezi ka za litaba zeñwi zebonisa mabaka haluswanela kuisa pilu kwa taba ye.

•   Babanca ba mwa lilimo ze mwahalaa 12 kuisa 15 “ili bane batandanga lihora zetaalu ka zazi fa mawebusaiti a kulumelana ka ona mashango nebafumanwi kuli banani butata bwa mwa munahano bobucwale ka kulembwala ni lipilaelo.”

•   Babanca ba lilimo ze 14 hane baitusisanga hahulu mawebusaiti a kulumelana ka ona mashango, hañata nebasa lobalangi hande busihu, nebatoliswanga fa Intaneti, nebalembwalanga, nebaikutwanga bumaswe ka za ponahalo ya bona ni kuikutwa kusaba ba butokwa. Mi nto yeo neiezahalanga hahulu kwa basizana kufita kwa bashimani.”

 Bashemi bakona kusileleza cwañi bana babona kwa miinelo yecwalo? Mwa Bibele kunani likelezo zende zetusa.

 Muzibe zebaeza bana bamina. Ka kuba bashemi, munyakisise zekona kuzwa mwateñi mi mubone haiba mwanaa mina waswanela kuitusisa mawebusaiti a kulumelana ka ona mashango kamba kutokwa.

•   Sikuka sa mwa Bibele: “Luta mwana nzila yaswanela kuzamaya ku yona.”—Liproverbia 22:6.

•   Kuli muitute zeñata, mubale taba yeli, “Should My Child Use Social Media?”

 Haiba mulumeleza mwanaa mina kuitusisa mawebusaiti a kulumelana ka ona mashango, muzibe lika zaezanga fateñi ni butata bobukona kumutahela. Ka mukwa ufi?

 Musileleze mwanaa mina kwa litaba zemaswe. Mulute mwanaa mina kuziba ni kuambuka litaba zemaswe.

•   Sikuka sa mwa Bibele: “Muzamao wa buhule ni mufuta kaufela wa masila kamba mukwañuli, nihaiba feela kubulelwa lisike zabulelwa mwahalaa mina, . . . nihaiba muzamao oswabisa kamba lipulelo za bukuba kamba lisheha la zeswabisa.”—Maefese 5:3, 4.

•   Kuli mufumane litaba zekona kumitusa kueza cwalo, mubale taba yeli, “Teaching Your Teenager Social Media Safety.”

 Mutome nako. Ka mutala, mutome milao ya nako yaswanela kukena mwanaa mina fa mawebusaiti a kulumelana ka ona mashango ni nako yaswanela kutanda fateñi.

•   Sikuka sa mwa Bibele: “Mutokomele hahulu momuzamaela . . . sina batu bababutali, inze muitusisa hande nako yamina.”—Maefese 5:15, 16.

•   Muitusise vidio ya tudoli totuswanisiwa yeli, Muitusise Hande Mawebusaiti A Kulumelana ka Ona Litaba kuli mutuse mwanaa mina kuutwisisa butokwa bwa kuitomela nako ya kuba fa mawebusaiti a kulumelana ka ona mashango.