Mwa lifasi kaufela, batu babañata baamilwe hahulu ki muunda. Mulemuhe lipiho zelatelela:

•   “Mwa tolopo yetuna ya kwa China, nekunelile pula yeñata hahulu la Mukibelo kuisa la Bulaalu kufita yesenelile mwa lilimo ze 140 zefelile mi nekusuluhile mezi aeza lisentimita ze 74.5.”—Mutai wa makande wa AP News, August 2, 2023.

•   “Ñuli yebizwa Khanun neitahisize pula yeñata ni moya omutuna hahulu kwa mboela wa Japan la Bune, lona lizazi labubeli kuzwa fone ikalezi ñuli yeo mi ibulaile batu bababeli. . . . Kukulubelwa kuli liñungwa le likatahisa pula yeeza limita ze 0.6 kwa libaka za malundu za kwa Taiwan.”—Mutai wa makande wa Deutsche Welle, August 3, 2023.

•   “Muunda one ubile teñi la Mukibelo ni la Sunda [mwa Nova Scotia] neutahisizwe ki pula yeñata hahulu yeneenelile mwa liwate la Atlantic kwa Canada mwa lilimo ze 50.”—Mutai wa makande wa BBC News, July 24, 2023.

 Bibele ibulelañi ka za likezahalo zecwalo?

 Bibele ibulela kuli lupila mwa mazazi abizwa “mazazi a mafelelezo.” (2 Timotea 3:1) Jesu naapolofitile kuli mwa mazazi aluna, lukabona “lika zesabisa,” kamba likezahalo zesabisa. (Luka 21:11) Kucinca-cinca kwa mayemo a lihalimu ki kona kokusweli kutahisa hahulu likezahalo zesika libelelwa.

 Bibele ilubulelela kuli lika zeñata zesabisa zesweli kuezahala mwa lifasi kacenu liswanela kulufa sepo. Libaka ki lifi? Jesu naabulezi kuli: “Hamubona lika zeo liezahala, muzibe kuli Mubuso wa Mulimu u fakaufi.”—Luka 21:31; Mateu 24:3.

 Lika zesweli kuezahala kacenu libonisa kuli Mubuso wa Mulimu ukatuha uba ni maata fahalimwaa lika ze mwa pupo, kukopanyeleza cwalo ni mupotoloho wa mezi.—Jobo 36:27, 28; Samu 107:29.

 Kuli muitute zeñata ka za mo Mubuso wa Mulimu ukatahiseza kuli lifasi libe lelinde, mubone taba yeli, “Who Will Save the Earth?”