Kupotoloha lifasi kaufela, batu babañata batabela mupilelo wa kuambuka kuca nama ni lico kaufela zezwa fa lifolofolo kamba kusaitusisa lika zepangilwe fa lifolofolo.

•   “Mupilelo wa kuambuka kuca nama ni kusaitusisa lika zepangilwe fa lifolofolo uama kuambuka kueza maswe kamba kusaitusisa lifolofolo sina lico, litino kamba ka mulelo omuñwi.”—Katengo ka Vegan Society.

 Batu babañwi baiketelanga mupilelo wo kabakala kuli babata kubabalela lifolofolo ni kabakala kuli babata kuli lifasi libe lelinde, babe ni buikangulo bobunde kwa mubili kamba mane kabakala bulapeli.

•   “Batu baba ambukanga kuca nama ni lico kaufela zezwa fa lifolofolo kamba kusaitusisa lika zepangilwe fa lifolofolo baezanga cwalo kabakala litumelo zabona ni kabakala kuli baanga kuli yeo ki yona nzila yekona kutusa kuli lifasi libe lelinde.”—Buka ya Britannica Academic.

 Kana mupilelo wo ki wona okona kutahisa kuli lifasi libe lelinde? Bibele ibulelañi fa taba yeo?

 Bibele ibonisa kuli Mubupi waluna, Jehova Mulimu, a uunga batu kuba ba butokwa kufita lifolofolo ni kuli ufile batu maata fahalimwaa lifolofolo. (Genese 1:27, 28) Hamulaho wa nako, Mulimu abulelela batu kuli bakona kuca lifolofolo. (Genese 9:3) Nihakulicwalo, hatabeli kuli lifolofolo liitusiswe ka nzila yemaswe.—Liproverbia 12:10.

 Ka kuya ka Bibele, mañi ni mañi unani tukelo ya kuiketela kuca kamba kusaca nama. b Liketo zelueza haki zona zetahisa kuli lube batu babande mwa meeto a Mulimu. (1 Makorinte 8:8) Hakuna mutu yaswanela kunyaza mutu yomuñwi kabakala keto yaezize ka za lico zatabela kuca.—Maroma 14:3.

 Bibele ibonisa kuli lika zeluketa kueza mwa bupilo bwaluna halikoni kutatulula matata aliteñi mwa lifasi. Buñata bwa miinelo yetaata yelukopana ni yona itahiswa ki litaba za lipolitiki, kusalumelelana kwa batu ni kutotobela kwa sifumu, ili lika zasakoni kutatulula mutu ufi kamba ufi. Bibele ibulela kuli:

•   “Sesikopami hasikoni kuotololwa.”—Muekelesia 1:15.

 Mubupi waluna ukafelisa miinelo yetaata yelusweli kukopana ni yona. Bibele ibonisa zakaeza Mulimu ka kuitusisa mubulelelo wa swanisezo.

•   “Mi nabona lihalimu lelinca ni lifasi lelinca; kakuli lihalimu lapili ni lifasi lapili nelifelile, mi liwate halisa liyo.”—Sinulo 21:1.

 Mulimu ukayolisa mibuso ya batu, kamba “lihalimu lapili,” ka “lihalimu lelinca,” ona Mubuso wahae wa kwa lihalimu. Mubuso wahae ukazwisa “lifasi lapili,” bona batu babamaswe, mi ukabusa “lifasi lelinca,” kamba batu bababata kubusiwa ki mubuso wo.

 Ki Mubuso wa Mulimu feela okatahisa kuli batu baitute mwa kupilela ka kozo ni lifolofolo ni mwa kubabalelela hande lifasi.—Isaya 11:6-9.