MUZWELEPILI KUTONA!
Mwa Lifasi Kucisa Hahulu—Bibele Ibulelañi fa Taba Yeo?
Mwa July 2022, nekubile ni lipiho za kuli mwa lifasi kucisa hahulu:
“Lo seli lwa bubeli mwa kweli ye inze kuzibiswa kuli kukaba ni kucisa kokutuna hahulu mwa litolopo ze 70 za mwa naha ya China.”—July 25, 2022, Mutai wa makande wa CNN Wire Service.
“Bakeñisa kuli mwa Europe kucisize hahulu, kunani mulilo osweli kutuka mwa mishitu ya mwa linaha zeñata za mwa Europe.”—July 17, 2022, Mutende obizwa The Guardian.
“La Sunda, mwa mileneñi yemiñata ya mwa United States nekucisize hahulu, mi kucisa koo nekuamile hahulu sibaka sesi kwa Upa, likalulo za kwa Mboela, ni kalulo yeñwi ya kwa Wiko.”—July 24, 2022, Mutende wa The New York Times.
Lika zeo kaufela litalusañi? Kana fo kutalusa kuli kwapili hakuna kukonahala kupila fa lifasi? Bibele ibulelañi fa taba yeo?
Kana kucisa kwa nekupolofitilwe mwa Bibele?
Eni. Kucisa kwa koku ezahala mwa lifasi kaufela kwalumelelana ni lika zene ipolofitile Bibele kuli nelika ezahala mwa linako zaluna. Ka mutala, Jesu naapolofitile kuli neluka bona “lika zesabisa,” kamba “lika zesika bonwa kale ni zesabisa.” (Luka 21:11; Good News Translation) Kucisa kokusweli kuekezeha mwa lifasi kaufela kutahisa kuli batu baikalelwe kuli lifasi likasinyeha.
Kana lifasi likasinyeha hahulu kuli mane batu habasa kona kupila fateñi?
Batili. Mulimu naabupile lifasi kuli batu bapile fateñi kuya kuile. (Samu 115:16; Muekelesia 1:4) Haana kulumeleza batu kusinya lifasi, kono ‘ukasinya babasinya lifasi,’ sina feela mwasepiselize.—Sinulo 11:18.
Munyakisise bupolofita bobubeli feela bobubonisa lika zasepisize kueza Mulimu kwa lifasi:
“Lihalaupa ni naha yeomile likanyakalala, mi lihalaupa likawabelwa ni kutubula lipalisa sina safrani.” (Isaya 35:1) Mulimu haana kutuhelela lifasi kuli libe lihalaupa molusa koni kupila nto ifi kamba ifi, kono ukalukisa likalulo za lifasi zesinyehile.
“Ubabalela lifasi, utahisa kuli libeye hahulu mi walinunisa hahulu.” (Samu 65:9) Limbuyoti za Mulimu likatahisa kuli lifasi libe paradaisi.
Kuli muitute zeñata ka za mo muinelo wa kubata kamba kucisa hahulu utaleleleza bupolofita, mubale taba ya sikuwa yeli “Climate Change and Our Future—What the Bible Says.”
Kuli muitute zeñata ka za sepiso ya mwa Bibele ya kuli lifasi lika lukiswa sinca, mubale taba ya sikuwa yeli “Who Will Save the Earth?”
Hape Mwendi Mwakona Kutabela Litaba Ze
LITUTO ZA BUTOKWA ZA MWA BIBELE
Mulimu Naabupeziñi Lifasi?
Lifasi laluna litezi lika zende. Nelibeilwe buhule bobuswanela kuzwa kwa lizazi, lisikamisizwe ka nzila yeswanela, mi lipotoloha ka lubilo loluswanela. Ki kabakalañi Mulimu hanaaikatalize kubupa lifasi?
LIKALABO KWA LIPUZO ZA BIBELE
Kana Lifasi Likasinyiwa?
Bibele italusa hande mulelo wa Mulimu ka za pulaneti yaluna.
