Naha ya Russia Itaseza Naha ya Ukraine
Ka nako ya kakusasana, la February 24, 2022, masole ba Russia nebakalile kutaseza naha ya Ukraine, kusina taba ni buikatazo bone baezize baeteleli ba linaha zeñata za lifasi kuli kusike kwaba ni ndwa. Ndwa ye ikaama cwañi lifasi? Mazazinyana kwamulaho, yomuhulu wa kopano ya UN, António Guterres, naabulezi kuli: “Ndwa ye ikanyandisa hahulu batu ni kutahisa kuli kusike kwaba ni kozo mwa Europe ni mwa lifasi kaufela.”
Likezahalo zeswana sina ze lilutusa cwañi kuutwisisa litaba zeñozwi mwa Bibele?
Jesu Kreste naabulezi kuli nekukaba ni nako ili yeo ‘sicaba nesika lwanisa sicaba sesiñwi, ni mubuso kulwanisa mubuso omuñwi.’ (Mateu 24:7) Mubale taba yeli “What Is the Sign of ‘the Last Days,’ or ‘End Times’?” kuli mulemuhe mo Bibele iboniseza kuli lindwa zesweli kuezahala kacenu litaleleza bupolofita bwa Jesu.
Buka ya Sinulo italusa ndwa sina mupahami wa pizi, yapahami fa ‘pizi yefubelu’ ili yazwisa “kozo mwa lifasi.” (Sinulo 6:4) Mubale taba yeli “Bapahami ba Lipizi Babane—Ki bo Mañi?” kuli mubone mo lindwa zesweli kuezahala kacenu litaleleza bupolofita bo.
Buka ya Daniele neibulelelezi cimo kuli “mulena wa kwa mutulo” ni “mulena wa kwa mboela” nebaka itwanisa. (Daniele 11:25-45) Mubuhe vidio yeli, Bupolofita Bobutalelelizwe kwa Daniele Kauhanyo 11 kuli mubone liba Russia ni linaha zeswalisani ni yona halikona kubulelwa kuli ki mulena wa kwa mutulo. a
Buka ya Sinulo hape italusa ka za “ndwa ya lizazi lelituna la Mulimu Yamaata Kaufela.” (Sinulo 16:14, 16) Nihakulicwalo, ye haki ndwa yeswana sina yesweli kuezahala mwahalaa linaha kacenu. Mubale taba yeli, “Ndwa ya Armagedoni ki Nto Mañi?” kuli mufumane litaba zeñata ka za kezahalo yeo yekaezahala kwapili.
Ki kabakalañi hamukona kusepa kuli lika likaba hande kwapili?
Bibele ibulela kuli Mulimu ‘ukafelisa lindwa mwa lifasi kamukana.’ (Samu 46:9) Mubale taba yeli “A Real Hope for a Better Tomorrow” kuli muitute zeñata ka za lika zalusepisize Mulimu kwapili.
Jesu naalutile balateleli bahae kulapelanga kuli Mubuso wa Mulimu utahe. (Mateu 6:9, 10) Mubuso wo ki mubuso wa kwa lihalimu ili okapeta tato ya Mulimu ka za lifasi, ni kutahisa kozo mwa lifasi kaufela. Kuli muzibe momukona kutusezwa ki Mubuso wa Mulimu, mubuhe vidio yeli, Mubuso wa Mulimu ki Nto Mañi?
Kunani Lipaki za Jehova babafitelela 129,000 babapila mwa Ukraine. Ka kuswana ni Lipaki ba mwa linaha zeñwi, balikanyisa Jesu ka kuikambusa kwa litaba za lifasi ni kusaikenya mwa ndwa. (Joani 18:36) Mwa lifasi kaufela, Lipaki za Jehova bazwelapili kushaela “taba yende ye ya Mubuso” kuli ki ona feela okafelisa miinelo yetaata yebatalimana ni yona batu, kukopanyeleza cwalo ni lindwa. (Mateu 24:14) Lumimema kuli muambole ni luna kuli muitute zeñata ka za litaba za mwa Bibele zekona kumifa sepo.
a Kuli muzibe zeñata ka za bupolofita bo, mubone taba yeli “‘Mulena wa Kwa Mutulo’ Mwa Nako ya Mafelelezo” ni yeli “Ki Mañi ‘Mulena wa Kwa Mutulo’ Kacenu?”
Hape Mwendi Mwakona Kutabela Litaba Ze
MUZWELEPILI KUTONA!
Zeibulela Bibele ka za butata bobatalimana nibona batu bababaleha mwa Ukraine
Bibele italusa zetahisa miinelo yebatalimana ni yona babalehi ni zekafelisa miinelo yeo.
LITUTO ZA BUTOKWA ZA MWA BIBELE
Mubuso wa Mulimu ki Nto Mañi?
Mwa bukombwa bwahae kaufela, Jesu naalutile hahulu za Mubuso wa Mulimu kufita taba ifi kamba ifi. Balateleli bahae base balapezi ka lilimo-limo kuli Mubuso wo utahe.
