Mwa July 2022, likezo zekomokisa za bukebenga bwa litobolo neliezahezi mwa lifasi kaufela:

•   “Kubulaiwa kwa muuna wa lipolitiki yazibahala hahulu wa kwa Japan [Shinzo Abe yanaabanga mubakweli wa mueteleli] kutahisize filikanyo mwa naha mi kukomokisize batu mwa lifasi kaufela, sihulu kabakala kuli naha ye haizibahali hahulu ka bukebenga mi kunani milao yetahisa kuli litobolo lisike zaipumanelwa feela kwa batu.”—July 10, 2022, mutende wa The Japan Times.

•   “Batu mwa Denmark bakomokile bakeñisa muuna yakunupile ni kubulaya batu babalaalu fa sibaka sa lintolo sa Copenhagen.”—July 4, 2022, mutai wa makande wa Reuters.

•   “Mwa South Africa: Batu ba 15 bashwile, likebenga za litobolo hane likunupile mwa linwelo la bucwala mwa sibaka sesibizwa Soweto.”—July 10, 2022, mutende wa The Guardian.

•   “Batu babafitelela 220 bakunupilwe ni kubulaiwa ki likebenga za litobolo mwa United States ka nako ya pumulo la July 4.”—July 5, 2022, mutai wa makande wa CBS News.

 Kana kunani sepo ya kuli bukebenga bobucwalo bukafela? Bibele ibulelañi fa taba yeo?

 Bibele italusa mazazi elupila kuona kuli ki “mazazi a mafelelezo,” ili nako yeo batu nebaka bonisa buhali ni situhu sesituna. (2 Timotea 3:1, 3) Likezo za bukebenga zecwalo litahisa kuli batu bapile ka sabo. (Luka 21:11) Nihakulicwalo, Bibele isepisa kuli honacwale-cwale fa bukebenga bukafela mi batu bakaina “mwa sibaka sa kozo sesiinelezi, mwa mandu atiile ni mwa mapumulelo a kozo.” (Isaya 32:18) Bukebenga bukafeliswa cwañi?

 Mulimu ukayundisa babamaswe mi ukasinya lilwaniso kaufela.

•   “Haili babamaswe, bakazwiswa mwa lifasi.”—Liproverbia 2:22.

•   “[Mulimu] ufelisa lindwa mwa lifasi kamukana. Uloba buta ni kupumaka lilumo; ucisa likoloi za ndwa ka mulilo.”—Samu 46:9.

 Mulimu ukafelisa likezo za bukebenga ka kuluta batu kupila ka kozo.

•   “Habana kutahisa kozi ifi kamba ifi kamba kutahisa sinyeho fa lilundu laka kaufela lelikenile, kakuli lifasi likatala zibo ya Jehova sina mezi mwakwahelezi liwate.”—Isaya 11:9.

•   Nihaiba ka nako yacwale, Mulimu usweli kuluta batu mwa lifasi kaufela kuambuka mifilifili ni kusaitusisa lilwaniso, kuli ‘batule mikwale yabona kuieza malimi a likekele ni malumo abona kuaeza licekesi.’—Mika 4:3.

 Kuli muitute zeñata ka za sepiso ya mwa Bibele ya lifasi molusike lwaba ni sabo, mubale taba ya sikuwa yeli “Freedom From Fear—Is It Possible?”

 Kuli muitute zeñata ka za zekafelisa bukebenga kuya kuile, mubale taba ya sikuwa yeli “Peace on Earth at Last!”