MUZWELEPILI KUTONA!
Ba Sayansi Bakasheza Kwapili Nako ye fa Waci ya Swanisezo Yebonisa Lifasi Molisinyezwa ki Batu—Bibele Ibulelañi fa Taba Yeo?
La January 24, 2023, ba sayansi nebashenyisize nako ye fa Waci ya Swanisezo a kuitisa bukaufi ni fahalaa busihu, ili nako yeyemela mafelelezo a lifasi.
“‘Waci ya Swanisezo’ iyemela kozi yetuna yekatahela batu kabakala lika zebasweli kueza. La bubeli, ba sayansi nebashenyisize nako ye fa waci yeo bukaufi hahulu ni fahalaa busihu, kabakala lika zesweli kuezahala zecwale ka ndwa ya kwa Ukraine, sabo ya kuli kwakona kuba ni ndwa ya nyukiliya, ni kozi yetahiswa ki muinelo wa kucisa hahulu ni kubata hahulu.”—AFP International Text Wire.
“La bubeli, ba sayansi nebabulezi kuli nako ye fa ‘Waci ya Swanisezo’ ishenyiselizwe kwapili, mi kusiyezi feela lisekondi ze 90 kuli ifite fahalaa busihu—ili nako yeli bukaufi hahulu ni kuyundiswa kwa batu.”—ABC News.
“Sikwata sa ba sayansi ba mwa linaha zeshutana-shutana silemusize kuli batu bakatuha batahelwa ki kozi yetuna kufita mone kuinezi kwamulaho kabakala lika zebasweli kueza.”—The Guardian.
Kana mafelelezo a batu ni lifasi a fakaufi? Kana lwaswanela kusaba kabakala lika zekaezahala kwapili? Bibele ibulelañi fa taba yeo?
Zekaezahala kwapili
Bibele ibulela kuli, “lifasi liina kuya kuile” mi kukaba ni batu babaka pila “ku lona kuya kuile.” (Muekelesia 1:4; Samu 37:29) Kacwalo batu habana kusinya lifasi kamba kutahisa kuli lifasi libe sibaka fokusa koni kupila nto ifi kamba ifi.
Nihakulicwalo, Bibele ibulela za mafelelezo. Ka mutala, ibulela kuli “lifasi lafela.”—1 Joani 2:17.
Kuli muzibe zeitalusa Bibele haibulela ka za mafelelezo a lifasi, mubale taba yeli, “Is the World Coming to an End? What Is the Apocalypse?”
Kuli muitute zeibulela Bibele ka za nako ye likaezahala likezahalo za lifasi, mubale taba yeli, “When Will the World End?”
Kuzwelapili kuba ni mubonelo omunde
Bibele yakona kulutusa kuzwelapili kuba ni mubonelo omunde kusina taba ni miinelo yetaata yelukopana ni yona fa lifasi. Ka mukwa ufi?
Bibele ilufa kelezo yekona kulutusa mwa bupilo. (2 Timotea 3:16, 17) Ka mutala, mubale taba yeli, “How to Control Worry” kuli mubone moikona kumituseza Bibele kuzwelapili kuba ni mubonelo omunde kusina taba ni miinelo yetaata yemukopana ni yona mwa bupilo.
Bibele ifa sepo yende ya za kwapili. (Maroma 15:4) Italusa hande lika zeluswanela kulibelela kuli likaezahala ka nako ya cwale ni kwapili, ili nto yelutusa kuzwelapili kuba ni sepo kusina taba ni lika zesweli kuezahala mwa lifasi kacenu.
Kuli mutusiwe hahulu ki Bibele, lumimema kuamuhela tuto ya Bibele yesalifelwi.
a “Waci ya Swanisezo ki nto yebapangile batu yelemusa batu ka za nako yenyinyani yesiyezi ya kuli lifasi lisinyiwe ki zwelopili ya bumapanga-panga yebaezize batu. Ki swanisezo yeluhupulisa za kozi yeluswanela kunyakisisa kuli luzwelepili kupila fa lifasi.”—Bulletin of the Atomic Scientists.