ZEEZAHEZI MWA BUPILO BWA BO DAVID MAZA
Lubasi Lone Lunani Tabo Lukopana ni Miinelo Yetaata mi Luba ni Tabo Hape
Bakeñisa kuli neniitutile Bibele ni kusebelisa likuka zayona mwa bupilo bwaka, naaba ni lubasi lolutabile ili lone nisahupulangi kuli nenikaba ni lona. Bo musalaa ka ni na, hamohocwalo ni bana baluna babalaalu neluswalisani mi nelusebeleza Jehova ka pilu kaufela.
Nelusika libelela kezo yemaswe yeneezahezi la April 24, 2004.
Bo musalaa ka bo Kaye, hane babile ni mwana wamusizana wa libizo la Lauren, nenisa zibi zene niswanela kueza kuli nibe ndate yomunde. Mane nihaiba hamulaho wa kuba ni mwana wabubeli wa mushimani wa libizo la Michael, nenisa zibi mwakubela ndate yomunde. Hane nisali mwanana, bo ndate ni bo ma nebalwananga nako kaufela, mi hasamulaho bafelisa linyalo labona. Nihaike kuli nenibata kuba toho wa lubasi yomunde, nenisa zibi mwakuezeza cwalo.
Mi ka bumai hane nili mwa lilimo za kunonoboka, neninwanga hahulu bucwala ni kuitusisa maswe milyani yekola. Nenili yomuhulu kono nenisa zibi zene niswanela kueza. Nenisa koni kuina feela nisanwi bucwala, kuitusisa milyani yekola, ni kubapala lipapali za likwinano za mali ili nto yenetahisize kuli nieze likatulo zemaswe. Muinelo watatafala hahulu kuli mane bo musalaa ka banisiya mi baya ni bana baluna bababeli. Nto yeo nei nilembwalisize luli.
Nakupa bo Kaye kuli banitaluseze zene niswanela kueza kuli lukutisane. Nese bakalile kale kuituta Bibele ni bo Gloria, babañwi ba Lipaki za Jehova, mi kalabo yabona neli yenongile, nebabulezi kuli, “Muitute Bibele.” Neniziba zene batalusa mi nenisa tabeli kuituta Bibele kono bakeñisa kuli nenibata bo Kaye kuli bakute, nalumela kuli lukopane ni bo Gloria ni bo muunaa bona bo Bill.
Puisano Yenecincize Bupilo Bwaka
Bo Bill hane batile kwa ndu yaluna nenitabisizwe hahulu ki silikani sene banani ni bakubona. Nenilemuhile kuli bana babona bane babata kulikana ni na kwa lilimo nebaeza lika za butokwa mwa bupilo bwabona. Lo neli lwapili kuikutwa kuli mwendi Bibele yakona kutusa batu kuba ni tabo mwa lubasi.
Fa musipili wo, bo Bill ni bo Gloria baikambota ni na ka za matata aka. Banibonisa zeibulela Bibele kwa Magalata 6:7 yeli: “Sacala mutu, ki sona hape sakakutula.” Naipulelisa kuli, ‘kambe nenisebelisize sikuka se mwa bupilo bwaka kambe hanisika kopana ni lika zeñata zemaswe!’
Bo Kaye ni bo David
Hasamulaho wa nako, nalemuha kuli kusebelisa likuka za Bibele neku nitusa kucinca mupilelo waka. Na ni bo Kaye lwatuhela kuzuba kwai mi natuhela kueza lika zeñwi zene niezanga. Mwa 1985, hane lubile ni mwanaa luna wamushimani wabulaalu wa libizo la David, ili yene lulata hahulu kubiza kuli Davey, neniikutwile kuli cwale seniziba zekona kunitusa kuba ndate yomunde.
Lusebeleza Jehova Hamoho
Lwalemuha kuli hane luluta bana baluna kulata Jehova, ni luna nelusutelela hahulu ku yena. Neluitutile zeñata mwa lihatiso zaluna inge cwalo ya, Ku Teeleza ku Muluti Yo Mutuna! Hape mizwale ni likaizeli ba mwa puteho yaluna nebatomela lubasi lwaluna mutala omunde.
Bo Michael ni bakubona bo Diana
Hasamulaho wa nako, bana baluna kaufelaa bona baeza bupaina. Kwa makalelo a silimo sa 2004, Lauren akala kuswalisana ni puteho yene itusisa puo ya Sisipanishi. Michael kihona hanaasazo zwa fa Betele kuli ayo nyala, mi yena ni musalaa hae Diana nebatuha baya kwa Guam kuli bayo kutaleza kwateñi. Davey yanani lilimo ze 19 kihona hanaasazo kalisa kusebeleza kwa naha ya Dominican Republic.
Na ni bo Kaye nelutabisizwe hahulu ki liketo zene baezize bana baluna. Neluikutwa kuli nelutalelelize manzwi afumaneha kwa 3 Joani 4 ali: “Hakuna nto yeenitabisa inge kuutwa taba ye: kuli bana baka bazwelepili kuzamaya mwa niti.” Kono nelusa zibi kuli bupilo bwaluna nebuka cinca kabakala mutu yomuñwi yanaa lulizelize luwaile.
Kozi Yene Lutomohisize Pilu
La April 24, 2004, na ni bo Kaye, neluile kwa kuyo ca sico hamoho ni balikani baluna babañwi babane babanyalani. Bakeñisa kuli sibaka seo nesili kwahule, kaufelaa luna ba 6 lwaitusisa mota yaka. Hasamulaho wa kuca sico, lwaya kwa licelo lisili mi nasiya babañwi kuli baleke lico mi naya kuyo bata sibaka kwa kubeya mota. Foni yaka yalila. Neli mulikanaa ka mi linzwi lahae neliutwahala kuli nekunani nto yeñwi yene mubilaeza.
Anitaluseza kuli, “kunani nto yeñwi yemaswe yeezahezi. “Davey naaipumani mwa kozi.”
Bakeñisa kuli nenisaba zanaaka bulela namubuza kuli, “Kolofalo yahae ki yetuna cwañi?”
Kwa makalelo, naapalelwa kubulela. Kono hasamulaho, anitaluseza kuli Davey utimezi.
Hamulaho wa kubulela fa foni, nalapela ku Jehova kuli anife maata. Seniya mwa licelo mi senitaluseza babañwi kuli nenisa ikutwi hande ni kuli neikaba hande hane lukaya kwa ndu. Nenisa lati kutaluseza bo Kaye zeneezahezi honafo feela kufitela luba lunosi kwa ndu.
Nekuli taata kuzamaisa mota ka hora iliñwi ni licika kuli luyo punya kone luya bakeñisa mone niikutwela. Neniutwa bo Kaye hane bataluseza babañwi ka mone banyolezwi kubona Davey yanaatuha ataha kuto lupotela. Bo Kaye basika ziba kale kuli mwanaa luna utimezi, mashango a kuluomba-omba naakalile kale kutaha fa foni yaka.
Hamulaho wa kuisa balikani baluna babane kwa mandu abona, lwaya kwa ndu yaluna. Bo Kaye banitalimela mi nebalemuhile kuli kunani butata. Banibuza kuli, “ki lika mañi zeezahezi?” Neniziba kuli zene nika bulela nelika tahiseza butata bo Kaye, sina feela mone niikutwezi lihora zepeli kwamulaho hane nialaba foni.
Kutiyela Muinelo wa Kushwelwa
Pili lusika kopana kale ni muinelo wo, na ni bo Kaye nelukopani ni miinelo yetaata kwamulaho mi neluziba kuli Jehova watusanga batu bahae. (Isaya 41:10, 13) Kono muinelo wo neushutana ni miinelo yene lukopananga ni yona kwamulaho. Nenizwezipili kuipuza lipuzo zecwale ka ze, ‘Ki kabakalañi nto ye haiezahezi ku Davey, yanaasebeleza hahulu Jehova? Mi ki kabakalañi Jehova hasika musileleza?’
Bana baluna babañwi ni bona nebalobehile lipilu. Lauren naalata hahulu Davey kuli mane naamunga sina mwanaa hae, kacwalo lifu munyanaa hae neli muutwisize hahulu butuku. Michael ni yena naamilwe hahulu ki lifu la munyanaa hae. Nihaike kuli nese kufitile lilimo zebato ba ze 5 kuzwa fazwela fa lapa Michael, naatabile hahulu hanaazibile kuli munyanaa hae nasaahulile mi naaeza hande.
Puteho yaluna nei lutusize hahulu hane izibile feela kuli Davey utimezi. Ka mutala, ka nako yene bapalelwa kuutwisisa bo Kaye kuli mwanaa luna utimezi, mizwale ni likaizeli nebanze bataha kwa ndu yaluna kuto luomba-omba ni kulutusa. (Liproverbia 17:17) Hanina kulibala lilato lene balubonisize!
Kuli lutiyele muinelo wo, na ni bo Kaye neluzwezipili kuezanga lika zene luezanga sapili ili kulapela, kuituta Bibele, ni kufumanehanga kwa mikopano ya Sikreste. Nihakulicwalo, lika zeo nelisika felisa butuku bone luutwa. Kono neluziba kuli kueza cwalo nekuka lutusa kutiisa tumelo yaluna.—Mafilipi 3:16.
Bo Lauren ni bakubona bo Justin
Ka nako yeo, Michael ni musalaa hae Diana nebatile kuto ina ni luna, mi Lauren aswalisana ni puteho yaluna ya Sikuwa. Kuba hamoho ka lilimo lisikai nekulutusize kuli lukone kutiyela muinelo one lukopani ni ona wa kushwelwa ki Davey. Lauren hanaanyezwi hasamulaho, muunaa hae Justin naatusize hahulu lubasi lwaluna.
Musipili Otaata
Nakonyana hamulaho wa lifu la Davey, neluezize nto yeñwi yeneli yetaata kuieza kono ili yene lutusize. Bo Kaye baka mikandekela ka za taba yeo.
“Bo muunaaka hane banitaluselize kuli Davey utimezi, nenifelezwi ki sepo ni tabo, mi nenizwezipili kuikutwa cwalo ka nako yetelele. Neniikutwile hahulu bumaswe kuli mane nenipalelwa kueza misebezi yene niezanga kamita. Nenililile hañata-ñata. Kubulela feela niti, ka linako zeñwi neninyemelanga Jehova ni batu kaufela. Nenipalezwi kuba ni mubonelo oswanela wa lika.
“Nenibata kuya kwa Dominican Republic. Nenibata kuya kwa sibaka kwanaapila ni kusebeleza Jehova pili asika shwa kale. Kono nenisa ikutwa kulembwala, mi neni ikutwa kuli hanikoni kuya kwateñi.
“Mulikanaa ka yomutuna anitusa ka kunibulelela kuli, balikani ba Davey mwa naha ya Dominican Republic bamutonda ni bona mi nebabata kukopana ni lubasi lwahae. Zanaa nibulelezi neli nitusize kuli nikone kuba ni maata a kuya kwa Dominican Republic ka fulai.
“Muhato one luungile wa kutama musipili neu lutusize luli. Batu ba mwa sibaka sanaapila ku sona neba lutaluselize kuli Davey naaisa pilu kwa kusebeleza Jehova. Muuna-muhulu wa mwa puteho yanaabanga Davey, alutaluseza kuli neli mutu yanaaitingwa
“Hane luzamaya mwa sibaka mwanaapilanga Davey, batu nebanze bataha kuto lutaluseza lika zende zanaa baezelize. Kamita neniziba kuli neli mutu yanaanani sishemo, kono zene babulezi neli nitabisize hahulu kuziba mo mwanaaka nalikanyiseza mutala wa Jesu.
Davey inze asebeleza mwa naha ya Dominican Republic
“Hape nelukopani ni yomuñwi wa baituti ba Bibele ba Davey, muuna yanaapilanga mwa kandu kakanyinyani ili yanaasa koni kuzwa fa mumbeta kabakala kukula. Muuna yo naashebile hahulu, kono mizwale ni likaizeli ba mwa puteho neba lutaluselize kuli Davey nakuteka hahulu muuna yo. Taba yeo nei nitabisize hahulu!
“Musipili wo neli ona otaata ka kufitisisa kwa misipili kaufela yenikile nazamaya. Kono neulutusize hahulu kuutwa masitapilu a batu babañwi bane batonda Davey ni kuikambota ni bona za sepo yaluna ka za kwapili. Hape neulutusize kusalobeha hahulu lipilu.”
Kususuezwa ki Mutala wa Davey
Mwa Muzuhe ya January 8, 2005, kufumaneha litaba ka za lifu la Davey ni zanaapetile mwa naha ya Dominican Republic. Lubasi lwaluna nelusa zibi mo taba yeo neika tuseza batu babañwi. Ka mutala, mwa May 2019 muzwale yomuñwi wa libizo la Nick naalulizelize ni kulubulelela zelatelela:
“Kwa mafelelezo a silimo sa 2004, neniinzi kwa koleji mi nenisina likonkwani za kwa moya. Nenisina tabo. Nalapela ku Jehova, kumukupa kuli anituse kuitusisa hande bunca bwaka ka nzila yende. Hamulaho wa nakonyana, nabala likande la Davey mwa Muzuhe! Jehova naalabile tapelo yaka!
“Natuhela lituto zene nieza kwa koleji mi nakalisa kueza bupaina. Hape naitomela sikonkwani sa kuituta puo ya Sisipanishi ni kuyo sebeleza kwa naha isili. Hamulaho wa nako, naya kwa Nicaragua mi nayo fumaneha kwa Sikolo sa Bakutazi ba Mubuso ni musalaa ka. Batu haba nibuzanga zenisusuelize kueza bupaina, nibatalusezanga likande la Davey.”
Nelukomokile hape hane lukopani ni kaizeli wa libizo la Abi, ili yanaafilwe kusebeleza kwa hotela kone luinzi hane lumemilwe kwa mukopano omutuna wa macaba wa mwa 2019 mwa Buenos Aires, mwa Argentina. Nelutabisizwe hahulu ki sishemo ni lilato lanaa lubonisize. Moya wanaa lubonisize neu luhupulisize Davey.
Likande la Davey lisusueza Abi kukalisa kueza bupaina ni kuya kwa sibaka kokusa kutalezwangi
Hane lukutezi kwa muzuzu waluna kwa hotela, lwalumela Abi link ya Muzuhe! yene bulela ka za Davey. Hamulaho wa mizuzu isikai aalaba. Naabata luli kuambola ni luna, kacwalo lwakopanela mwa sibaka mobakopanelanga batu. Abi akala kulila, mi alutaluseza kuli neli likande la Daevy lene limususuelize kukala kueza bupaina mwa 2011 ni kusebeleza kwa sibaka kokusa kutalezwangi. Naabulezi kuli, “Nako kaufela hanikopananga ni miinelo yetaata mwa musebezi onieza, nikutelanga kubala likande la Davey.” Mane naanani kopi ya Muzuhe yeo!
Litaba zeswana sina ze, libonisa kuli lu lubasi lululuñwi mwa lifasi kaufela. Hakuna batu babaswalisani hahulu mwa lifasi kaufela sina batu ba Jehova!
Na ni bo Kaye nelususuelizwe hahulu kuziba kuli mutala wa Davey ukonile kutusa batu babañwi babañata. Mi luli, kona zebaeza babanca ili babasebeza ka mobakonela kaufela mwa sebelezo yabona ku Jehova. Ka nzila yesalemusehi batusa babañwi ili ka tukufalelo yabona, mi ka mutala wabona basusueza babañwi kuli basebeleze Jehova ka mobakonela kaufela.
“Ku Yena Kaufelaa Bona Bapila”
Kwa Luka 20:37, Jesu utalusa manzwi a Jehova anaabulezi yena ka sibili kuli, “Mulimu wa Abrahama ni Mulimu wa Isaka ni Mulimu wa Jakobo.” Jehova naasika bulela kuli naali feela Mulimu wabona hane basapila kono naasali Mulimu wabona! Ki kabakalañi? Jesu ulutaluseza mwa timana 38 kuli: “Ku yena, kaufelaa bona bapila.”
Kaniti, ka mubonelo wa Jehova, batanga bahae kaufela babashwile basapila; taba yeo ibonisa kuli Jehova unyolelwa kuzusa batanga bahae! (Jobo 14:15; Joani 5:28, 29) Ninani buikolwiso bwa kuli Jehova ukazusa Davey ni batanga bahae babaitobalezi ka lifu.
Ninyolezwi kuto bona Davey hape, kono nto yenibata hahulu ki kubona bo Kaye habaka kopana ni Davey. Hanisika bona kale mutu yalobehile pilu sina bo Kaye mone bainezi. Manzwi afumaneha kwa Luka 7:15 anitiisanga luli, ali: “Mufu azuha ni kuina mi akala kubulela, mi Jesu amufa ku mahe.”
Mwa September 2005, na ni bo Kaye lwakala kueza bupaina. Ki tohonolo yetuna kusebeza sina paina ni bo musalaa ka, bana baluna, ni balatiwa babona. Ka kuba lubasi loluswalisani, lwatusananga ni kuzwelapili kuba ni sepo ya lifasi lelinca, ili molukaba ni Davey.