Batwe Batumoni ba Yehova twielelanga’ko mwanda wa kūbaka byetu bisaka ne bya bakwetu. Tumonanga Leza bu ye Mushiludi wa kisaka. (Ngalwilo 2:21-24; Bene Efisesa 3:14, 15) Leza i mulete mu Bible misoñanya kemikwashe bantu bavule ntanda yonso bekale na bisaka bilungile mu bumo kadi bya nsangaji.

 Tuloñanga bukomo bwetu bonso mwanda wa kwingidija mu būmi madingi adi mu Bible, ne kino i kitukwashe twikale balume bayampe, bakaji bayampe, ne bambutwile bayampe. (Nkindi 31:10-31; Bene Efisesa 5:22–6:4; 1 Temote 5:8) Kadi tunantu tudi mu Bible tukwashanga boba besongele bekale biyampe nansha shi badi mu bipwilo bishile. (1 Petelo 3:1, 2) Kimfwa tala binenene bantu ke Batumonipo, ino bene pabo bo baikele ke Batumoni ba Yehova:

•   “Ami ne wami mukaji Ivete, twadi’nka twipotomeja ne kwilobela mu myaka isamba mibajinji ya busongi bwetu. Ino pawaikele ke Kamoni wa Yehova, waikele ke muntu wa buswe kadi wa kitūkijetyima. Muswelo waashintyile wakomeje busongi bwetu”—Clauir, wa mu Brazile.

•   “Wami mulume Chansa paashilwile kwifunda Bible na Batumoni ba Yehova, naanjile kumulwa mwanda nandi nanga’mba bano bantu kabo kaji i enka kupomona bisaka bya bantu. Inoko, paadi kaefundenga Bible, najingulwile amba Bible wetukwasha bininge mu busongi bwetu.”—Agness, wa mu Zambia.

 Potwendanga mu busapudi, tukalombolanga bakwetu muswelo ubwanya kwibakwasha tunangu tudi mu Bible pa

•   Mwa kutongela na tunangu muntu wa kwisonga nandi

•   Mwa kwikadila biyampe ne mwine petu mu mwaka mubajinji wa busongi

•   Mwa kwikadila biyampe na bako

•   Mwa kwigidijija lupeto senene

•   Mwa kulekela kwipotomeja

•   Mwa kwifundila kulekela

•   Mwa kufundijija bana

 I kya bulanda, mwanda kyaba kimo mu busongi mwikalanga tuvutakanya shi muntu waalamuka ke mwine Leza. Kimfwa, lapolo imo ya mu 1998 ilombola bu masosiete a bukimbi etwa bu Sofre ajingulwile amba mu busongi 1 pa masongi 20, shi muntu umo pa besogele’pa waikala ke Kamoni, busongi bwabo bwikalanga ke bwa tuvutakanya tonka.

 Yesu wālaile amba boba bakalonda bufundiji bwandi, kyaba kimo bakalwibwa na ba mu kisaka. (Mateo 10:32-36) Will Durant, mulembi umo wa mānga wajingulwile amba mu mafuku a Umbikalo wa Loma, “shi muntu waikala ke mwine Kidishitu, mwinjibo mwādi mwikala tuvutakanya bininge,” a ne dyalelo nadyo Batumoni ba Yehova bamo bekondanga na ano makambakano. Le pene’po ko kunena’mba Batumoni ba Yehova bo bakalenga byanzwe?

 Kidye kya Byepelo bya Bantu kya mu Bulaya, po kityibanga myanda ya bisambo isambilwanga Batumoni ba Yehova amba baletanga tuvutakanya mu bisaka, i kifule ku kwimwena’mba divule bantu ba mu bisaka ke Batumonipo bo bashilulanga tuvutakanya “na kupelela Kamoni’wa kipwilo kyandi ne kumukankaja’kyo.” Kidye kibweja’ko amba: “Myanda ya uno muswelo ivudile kutanwa mu masongi mudi enka muntu umo kete ye mwine Leza, enka ne mu masongi a Batumoni ba Yehova mwine.” b Batumoni ba Yehova nansha shi balwibwa bya malwa namani pa mwanda wa mutōtelo wabo, beelelanga’ko kulonda madingi a mu Bible a amba: “Kemwakyalwijai muntu kibi ku kibi. . . . Shi bikokejika, mungya momubwaninya, ikalai mu ndoe na bantu bonso.”—Bene Loma 12:17, 18.

 Batumoni balondanga musoñanya wa mu Bible wa kwisonga “enka mudi Mfumwetu kete,” ko kunena’mba kwisonga enka na muntu obadi nandi nkulupilo imo. (1 Bene Kodinda 7:39) Uno musoñanya wibakwashanga bakōkele binena Bible kadi bamwenanga’mo mu būmi. Kimfwa, kishinte kimo kya mu 2010 kya mu Julunale wa Myanda ya Busongi ne ya Kisaka (Journal of Marriage and Family) kyanenene amba, “bamulume ne mukaji badi mu kipwilo kimo, balongela bintu pamo, kadi badi na nkulupilo imo” bapwananga bininge. c

 Inoko, Batumoni ba Yehova kebakankamikagapo bantu bobadi nabo mu kipwilo badi na bene pabo ke Batumonipo belubule nabo. Bible unena’mba: “Shi mwanetu udi na mukaji wampikwa kwitabija ino mukaji uloelelwe kwikala nandi, kakamushiya; kadi shi mwana-mukaji udi na mulume wampikwa kwitabija ino mulume uloelelwe kwikala nandi, kakashiya wandi mulume.” (1 Bene Kodinda 7:12, 13) Batumoni ba Yehova balondanga uno musoñanya nansha shi bibalomba kūminina.