Divule dine ku butundaile bwa Batumoni ba Yehova kekuloñwangapo bintu bivule, kadi baloñanga’bo bya bulēme. Kupitanga ne mwisambo wimanine pa Bible. Kino kinkumenkume pa kupwa, bantu babwanya kwitana pamo mwanda wa kwisangaja padi na kudya byakudya. a Yesu wātenwe nandi ku masobo a butundaile mu Kana, ku ngalwilo kwa mwingilo wandi.—Yoano 2:1-11.

•  Le masobo a butundaile apitanga namani?

•  Le Batumoni ba Yehova balongelanga kwepi butundaile?

•  Le i bāni babwanya kutanwa’ko?

•  Le bilomba kuvwala namani?

•  Le boba besonga bapebwanga’ko byabuntu?

•  Le kwikalanga ne kutema bilaudi pa mwanda wa boba besonga?

•  Le boba betyilwe belelanga besonga mutyele nansha tupindi twa mapapye?

•  Le kukekala kudya ne kutoma?

•  Le kukekala minjiki ne kuja?

•  Le Batumoni ba Yehova bavulukanga difuku dya butundaile?

 Kintu kya mvubu mpata ku kino kinkumenkume, i mwisambo wa butundaile wa minite kintu kya 30 mwine unenwanga na mwingidi wa kipwilo kya Batumoni ba Yehova. Uno mwisambo wa kyanga kadi ūbaka, ulombolanga patōka muswelo ubwanya Bible kukwasha besongele bekale mu busongi bulādila, bwa buswe, kadi bwa nsangaji.—Bene Efisesa 5:33.

 Mu matanda mavule, balupusa bapanga bengidi ba kipwilo kya Batumoni ba Yehova lupusa lwa kwimanina masongi. Shi bidi namino, dya ku mfulo kwa mwisambo, besonga bapikanga mpiko. Babwanya ne kwishinta tuninga-minwe. Kupwa mwingidi ukebatela bu ba mulume ne mukaji.

 Mu matanda amo, bijila bilombanga busongi bulongwe ku meso a wa lupusa. Boba besonga baloñanga kino kitatyi kityetye kumeso kwa mwisambo wa butundaile. Shi ba musoñañani ne musongwa kebadipo bapikile mpiko, nabya bapikanga’yo dya ku mfulo kwa mwisambo. Shi abapikanga’yo, babwanya padi kutonga kupituluka’mo na kunena bwa abo ke bapike’yo kala. Mwisambo ufulanga na milombelo ya kulomba Leza esele boba bakitamba mu kwisonga.

 Batumoni bavule batoñanga kulongela butundaile bwabo ku Njibo ya Bulopwe, mine keidipo na bilongwa’mo pa kine kitatyi’kya. b Shi boba besonga badi bateakanye kulonga’ko kafetyi, batoñanga kifuko kikwabo kwa kukalongela’yo.

 Shi butundaile busa kulongelwa ku Njibo ya Bulopwe, divule dine i bantu bonso babwanya kutanwa’ko, bekale i Batumoni nansha ke Batumonipo. Shi kukekala ne kafetyi, boba besonga bo batoñanga i ani ukatanwa’ko.

 Shi bukalongelwa ku Njibo ya Bulopwe, kekudipo muswelo wa kuvwala ulombwanga’ko. Batumoni ba Yehova baloñanga bukomo bwa kulonda bulombodi bwa mu Bible bwa kuvwala na butūkanye kadi bya bulēme. Basangalanga shi muntu ungi nandi wavwala namino. (1 Temote 2:9) Shi boba besonga i batonge kulonga’ko ne kafetyi, i ino misoñanya imo yonka yobakengidija.

 Bible ukankamikanga bantu bekale na buntu. (Ñimbo ya Mitōto 37:21) Batumoni ba Yehova basangelanga kupāna ne kutambula byabuntu bya pa butundaile. (Luka 6:38) Inoko, Batumoni kebalombengapo byabuntu nansha kuyukanya majina a boba bebapa’byo. (Mateo 6:3, 4; 2 Bene Kodinda 9:7; 1 Petelo 3:8) Kebaloñangapo kino mwanda Bible kakankamikanga’kyopo, kadi kulonga namino kubwanya kulengeja boba betyilwe beivwane bibi.

 Aa. Batumoni ba Yehova kebatemengapo bilaudi, mwanda i kisela kitambile ku mitōtelo ya bubela. c Batumoni basakilanga biyampe boba besonga mu miswelo mikwabo.

 Aa. Ku bifuko bimo, bantu belelanga boba besonga mutyele, mapapye, nansha bintu bikwabo biifwene nabyo. Balañanga amba kulonga namino kupanga boba besonga dyese, nsangaji ne kwibalepejeja būmi. Ino Batumoni ba Yehova bapelanga bilongwa bikwatañene na kabutyibutyi. Muno mubadilwa ne kwisakila dyese, mwanda kulonga namino kwīlwanga na misoñanya ya mu Bible.—Isaya 65:11.

 Ku butundaile bulongwa ku Njibo ya Bulopwe kekwikalangapo byakudya ne bitomibwa. Shi mpangiko ibapu, ba musoñañani ne musongwa bamo batoñanga kulonga kafetyi, kwine kubwanya kwikala bidibwa ne bitomibwa. (Musapudi 9:7) Shi abakwata butyibi bwa kutūla’ko mālwa, bekulupijanga amba ekale’ko mabwanine, kadi i enka boba babwenye myaka mungya bijila bo bakatoma.—Luka 21:34; Bene Loma 13:1, 13.

 Shi kukekala ne kafetyi, babwanya kutonga amba kwikale minjiki ne kuja. (Musapudi 3:4) Batoñanga na katentekeji minjiki ibasangaja ne mungya bibidiji bya kwabo. Shi butundaile bulongelwanga ku Njibo ya Bulopwe, divule dine belanga’ko minjiki idi na myanda īmanine pa Bisonekwa.

 Misoñanya ya mu Bisonekwa byokeitabijepo nansha kupeleja kuvuluka difuku dya butundaile, ba mulume ne mukaji Batumoni bo bakwatanga butyibi abo bene bwa kuvuluka nansha kuleka kuvuluka difuku dya butundaile bwabo. Shi abatonge kuvuluka’dyo, baloñanga’byo kwa bubidi, nansha na ba mu kisaka ne balunda.