Batumoni ba Yehova balondanga madingi a mu Bible a kuleka kulondolola kyaba kyonso kyobanenenwa bibi ne kufutululwa. Kimfwa, lukindi lumo lwa mu Bible lunena’mba: “Yewa ōlola wa kibengo witanga kafutululo.” (Nkindi 9:​7, 8; 26:4) Pa kyaba kya kwipotomeja pa bintu bibi byobetunenena, tutanga mutyima ku kusangaja Leza.​—Ñimbo ya Mitōto 119:69.

 Shako, kudi “kitatyi kya kwikala talala ne kitatyi kya kwisamba.” (Musapudi 3:7) Tulondololanga bantu ba mityima myoloke basaka kuyuka bubine, ino twepukanga kwikokanya bya bituputupu na bantu. Namino tulondanga bufundiji bwa Yesu ne kimfwa kya Yesu ne kya bene Kidishitu babajinji.

•   Yesu kālondolwelepo nansha kishima kimo pobādi bamusambila bya bubela kwa Pilato. (Mateo 27:11-​14; 1 Petelo 2:​21-​23) Ne kadi Yesu kālondolwelepo pobāmufutulwile amba i muntu utomatoma vinyu kadi wa mudyopolo. Ino wālekele bilongwa byandi binene pa kyandi kyaba, kukwatañana na musoñanya unena’mba: “Tunangu tubingijibwanga na bipa bilupuka’ko.” (Mateo 11:19, kunshi kwa dyani) Inoko ponso paādi umona’mba i byendele’mo kulondolola boba bamuvubakenya myanda, wādi wibalondolola pampikwa moyo.​—Mateo 15:​1-3; Mako 3:​22-​30.

   Yesu wāfundije balondi bandi baleke kutyumukwa mutyima pobebasambila bya bubela. Wānenene amba: “Mwi ba nsangaji shi bantu bemufutulula ne kwimupangapanga ne kwimunenena bintu bibibibi bya bubela bya miswelo yonso pa mwanda wa amiwa.” (Mateo 5:​11, 12) Inoko, Yesu wānenene amba shi kuno kusambilwa kubape balondi bandi mukenga wa kusapula bukamoni, nabya ukafikidija mulao wandi wa’mba: “Nkemupa binenwa ne tunangu kebikakokejapo bakinkwa nenu bonso pamo kukomena nansha kupatana.”​—Luka 21:12-​15.

•   Mutumibwa Polo wādingile bene Kidishitu bepuke kwipotomeja bya bituputupu na bakinkwa, wānena’mba bino bintu “kebidipo na kamweno kadi i bya bitupu.”​—Tetusa 3:9; Loma 16:17, 18.

•   Mutumibwa Petelo wākankamikile bene Kidishitu babingije lwitabijo lwabo ponso pobibwanika. (1 Petelo 3:​15) Ino wānenene amba divule i biyampe kulonga uno muswelo na bilongwa kupita’ko na binenwa. Wālembele amba: “Pa kulonga biyampe, mūbije mīsambo ya bulembakane ya bantu bampikwa ñeni.”​—1 Petelo 2:​12-​15.