Shi Kamoni wa Yehova mubatyijibwe waleka’byo kusapula padi’nka ne kupwila kwine, ketumusūlangapo. Inoko, tukamukimbanga ne kumukwasha engile monka mingilo ya Leza.

 Ketupañangapo bukidibukidi muntu walonga bubi bukatampe. Inoko, shi Kamoni wa Yehova mubatyijibwe walonga bilongwa bijilula misoñanya ya mu Bible kadi wapele kwisāsa, upañwanga nansha kusūlwa. Bible unena patōkelela amba: “Fundulai muntu umbi umbukata mwenu.”—1 Kodinda 5:13.

 Penepa le bikalanga namani shi muntu wapangwa, inoko wandi mukaji ne bandi bana bakidi Batumoni ba Yehova? Kipwano kyabo kya myanda ya Leza kipwanga, inoko kipwano kyabo kya mu kisaka kyashala. Busongi bwabo kebupwilepo nansha ke kisanso kyabo kya mu kisaka kine, kadi bakendelela kwikwasha mu mingilo ya kisaka.

 Bapangwe babwanya kutanwa ku twaji twa kipwilo. Kadi shi basakile babwanya ne kupebwa madingi a mu Bible na bakulumpe ba kipwilo. Mwanda mwine i kukwasha muntu upangilwe ekale monka Kamoni wa Yehova. Shi muntu mupangwe waleka mwiendelejo mubi ino washilula kwiendeja mungya misoñanya ya Leza ya mu Bible, ujokejibwanga monka mu kipwilo.