Lufumo: Batumoni ba Yehova kebafetangapo Pashika mwanda ke bene Kidishitupo.

 Bubine: Twitabije mudi Yesu Kidishitu bu Umpadiji wetu, kadi tuloñanga bukomo bwetu bonso mwanda wa kulonda “senene mu mayo andi.”—1 Petelo 2:21; Luka 2:11.

Lufumo: Kemwitabijepo amba Yesu wāsangwilwe.

 Bubine: Twitabije amba Yesu wāsangwilwe. Tumonanga lusangukilo lwa Yesu bu kyalwilo kya lwitabijo lwa bwine Kidishitu kadi twilukomenejanga bininge mu busapudi bwetu.—1 Bene Kodinda 15:3, 4, 12-15.

Lufumo: Mūminijanga benu bana mutyima na kwibapeleja baleke kumwena mu nsangaji ikalanga mu fetyi ya Pashika.

 Bubine: Tusenswe betu bana—tuloñanga byonso byotubwanya mwanda’tu wa kwibafundija ne kwibakwasha bekale na nsangaji.—Tetusa 2:4.

•   Fetyi ya Pashika keitambilepo mu Bible.

•   Yesu wētusoñenye tuvuluke lufu lwandi, ke lusangukilopo lwandi. Tuloñanga Kivulukilo mwaka ne mwaka, mwanda wa kuvuluka lufu lwandi musunsa umo pa mwaka, mungya kalandadiye ka mu Bible ka kubala myeji na kulonda kutamba kwa kweji.—Luka 22:19, 20.

•   Tukulupile amba Leza ketabijepo Pashika, mwanda bishi byayo bitambanga ku bisela bya kala bya Leza wa bumeni. Leza usakanga “kulamatwa bunka,” kadi kasangelangapo butōtyi butyangwe’mo bisela byapeleje.—Divilu 20:5; 1 Balopwe 18:21.

 Tukulupile amba kupela kotupelanga kufeta Pashika kwimanine pa Bible, mwine ukankamika twingidije “tunangu twa kamweno ne bukomo bwa kulanga” pa kyaba kya kulonda bisela bya bantu. (Nkindi 3:21; Mateo 15:3) Shi bantu abetwipangula bitala Pashika, kitatyi kyotwibalondolola tulēmekanga lupusa ludi na muntu lwa kutonga aye mwine byasaka kulonga.—1 Petelo 3:15.