Bantu babela bininge kebejengapo kuzumbija mutyima, kadi shi badi ku lupitalo, basusukanga mu ñeni bininge. Monka munenena julunale umo wisambila pa bamuñanga, “bwifundi bulombola’mba bantu babela babwanya kwiivwana biyampe shi bavuija bisakibwa byabo bya mu ñeni ne bya ku mushipiditu.” a

Pa kuvuija bino bisakibwa, Batumoni ba Yehova bakwashanga banababo Batumoni badi mu lupitalo ku mushipiditu ne ku ngitu. Bakulumpe pa kipwilo bakwatanga’ko mpangiko ya kupempula banababo babela ba mu kipwilo kyabo. Ino le bikalanga namani shi Kamoni ubela undapilwanga ku lupitalo ludi kulampe na kwabo? Mu bibundi bikatampe ntanda yonso, Batumoni ba Yehova i bateakanye’ko Bisumpi bya Kupempula Babela (BKB). Bakulumpe pa kipwilo badi mu bino bisumpi, bapempulanga ku mpitalo kitatyi ne kitatyi mwanda wa kukwasha Batumoni babela ne byabo bisaka, batambile kulampe mu yabo ntanda nansha mu ntanda mikwabo baile kundapwa. Kudi bantu ba kwilanga 28000 ne musubu badi mu Bisumpi bya Kupempula Babela kintu kya 1900 mu makontina asamba. b

William, tutu umo wa mu Kisumpi kya Kupempula Babela unena’mba: “Nseñanga Batumoni ne bantu ba mu bisaka byabo ke Batumonipo na kwenda’tu kwisamba nabo ne kwibevwana. Nebakulupijanga’mba Yehova uyukile ngikadilo yobadi’mo ne amba wibatele mutyima. Boba babela ne bantu ba mu byabo bisaka basangalanga bininge kitatyi kyotulombela pa mwanda wabo.”

Bavule bafwijanga’ko pa kukankamika kwibakankamika Bisumpi bya Kupempula Babela. Tala bimfwa bityetye bilonda’ko bya mu États-Unis, mudi bantu kintu kya 7000 ba mu Bisumpi bya Kupempula Babela.

• Priscilla unena’mba: “Mwafwai’ko ne kupempula tata mu lupitalo paaponenwe na bulebe. Wasangedile bininge bupempudi bwenu! Watulumukile pa kuyuka’mba kudi ino mpangiko. Mona’mba bupempudi bwenu bwamukweshe akome bukidibukidi.”

• Ophilia, wa inandi wafwile na misongo wasapwidile mwimaniji wa Kisumpi kya Kupempula Babela amba: “Bupempudi bwenu bwadi na kamweno kakatampe kudi mama! Wajingulwile amba i Yehova wemutuma. Mwafwai’ko ne kumuta mutyima na buswe.”

• Muntu umo ubela watyumukilwe mu bidyoma ne kuzumbija mutyima pa kuyuka’mba kubamushadila’tu mafuku matyetye afwe. James, tutu wa mu Kisumpi kya Kupempula Babela washikete nandi pamo ne kumusenga na binenwa bya mu Bible bidi mu Bene Fidipai 4:6, 7. James unena’mba: “Ponakamupempwile difuku dilonda’ko, washintyile mumweno wandi bya binebine. Nansha byobamukwete misongo ya lufu, pano wakulupile amba Yehova usa kumukwasha, kadi nandi waunkankamika!”

Pauline, wafwidilwe mulume mu lupitalo kulampe na kwabo walembele amba: “Mwafwai’ko ne kwitukwasha mu kitatyi kikomo bininge kyadi’mo kyetu kisaka. Kwiya komwadi mwiya kwitutala ku lupitalo kufika’nka ne pa bukata bwa bufuku nansha byomwadi na kaji ka kwingila lubanga, kwadi kwitusenga. Mwafwai’ko pa kwitupa mwa kushikata batwe bonso 11 ne kwikala netu kufika ne ku mfulo. Nafwija’ko Yehova ne bulongolodi bwandi pa kutūla’ko ino mpangiko mwanda wa kwitusenga.”

Ba Nicki, Gayle, ne Robin balongele akishida na motoka ku makilometele 300 na kwabo. Carlos, wa mu Kisumpi kya Kupempula Babela waivwana uno mwanda, waenda kukebatengela ku lupitalo. Carlos unena’mba, “nebakweshe na kintu kyo-kyonso kyobadi basakilwa kadi nadi ntala kabwa ka Nicki aye papo bamundapa mu lupitalo.” Kupwa Curtis, wa mu Kisumpi kya Kupempula Babela, nandi waiya na wandi mukaji. Bashikata mu lupitalo’nka ne byafikile bantu ba mu bisaka bya babela papo nsá ke mipite. Muntu umo wemwenine ino myanda wanenene amba: “Abo bonso busatu basengelwe bininge na banababo mu lwitabijo. Ino Robin, kakwa Nicki, kadipo Kamoni wa Yehova, watulumukile pa kumona buno bukwashi bonso bwa bantu ba mu Kisumpi kya Kupempula Babela.”