Artur, mutadi wa kipindi wa mu Armeni, wadi upempula kipwilo kimo kya Batumoni ba Yehova. Wajingulula’mba kekyadipo kisapula busapudi bwa mu bantu bavule, bwa kwingidija matempa matūle’mo mabuku esambila pa Bible. Pa kukwatakanya uno musapwilo, Artur ne wandi mukaji, Anna, pamo ne Kamoni mukwabo witwa bu Jirayr, batūla ditempa dya mabuku mu kakibundi katyetye. Beditūla pa kifuko papityila bantu bavule.

 Ponka’po bapityeshinda bashilula kwiya kusela mabuku. Ino ne kwija mpika, ano manwa mapya atapa balwana ku mutyima. Babitobo babidi baiya ku kaditempa, umo watola’mo kyambo pampikwa ne kudyumuna kwine. Kupwa wakupila Artur lupi mu mpala, ne kubasa makalashi andi pa nshi. Ba Artur, Anna, ne Jirayr batompa kutalaja babitobo, ino kutupu. Po pene babitobo batyampakanya kaditempa ne kukusakanya mabuku nkusankusa. Pa kupwa kutuka Batumoni mutonko ne kwibazakaja, bataluka baenda.

 Ba Artur, Anna, ne Jirayr bakatūla myanda ku bilo ya bampulushi ya mu kibundi. Bashintulula mobyapityile ne kwisambila mu kīpi pa Bible na bakata ba bampulushi ne bakomada bakwabo. Kupwa baenda na bano Batumoni basatu ku bilo ya mukata wa bampulushi wa kusambija myanda. Dibajinji waipangula mwanda wa kuyuka mobyapityilanga. Ino aye pa kuyuka’mba Artur, nansha byadi mupuñame, kalongelepo kintu pobamukupile lupi, uno mpulushi waleka kwipangula bipangujo pa mwanda’wa, ino waipangula bipangujo pa nkulupilo ya Batumoni ba Yehova. Kino kyalengeja besambe mu bula bwa mansá aná! Uno mukata wa bampulushi watengwa bininge na byawaivwene, wanena’mba: “Bine kino i kipwilo kiyampe! Nami nsa kutwela’mo”

 Difuku dilonda’po, Artur pa kwenda monka mu busapudi bwa mu bantu bavule, bamufwena kudi muntu wamwene byalongekele difuku dibajinji. Uno muntu wafwija’ko Artur pa kwikala talala ne kuleka kwikupila. Wabweja’ko amba byobya byaamwene i bimulengeje aleke kulēmeka babitobo.

 Mu kine kyolwa’kya, mukata wa bampulushi waita Artur ajokele ku bilo. Ino pa kyaba kya kwisambila pa myanda’ya, wamwipangula bipangujo bivule bitala pa Bible. Bampulushi babidi bakwabo nabo baiya kutanwa pobesamba.

 Difuku dilonda’po, Artur waenda kukapempula monka uno mukata wa bampulushi, mwanda wa kumutadija etu mavideo amoamo esambila pa Bible. Uno mukata wa bampulushi waita bampulushi bakwabo nabo batale ano mavideo.

 Kupityila ku mwiendelejo mubi wa babitobo, bampulushi bavule basapwilwa musunsa wabo mubajinji. Kino kyebalengeje bekale na mumweno muyampe pa Batumoni ba Yehova.