Maud ushikatanga mu Franse, mwingilo wandi i wa kukwasha bana ba masomo balemane pobadi ku masomo. Panopano, wadi’po pobadi bafundija bana ba masomo myanda itala Mukubo ne makomponi a masusu a Nazi. Polofesele washintulula’mba, bantu badi bakutwa’mo badi bavwala bisandi pasonwe tuyukeno twishileshile. Ne amba bupunga ne musombelo wa kayukeno kavwele mukutwa, byo byadi bilombola kine kyobamukutyīle.

 Pawadi wisambila pa kayukeno ka mafinko asatu katyiluluka kadi kavwalwa bakutwa bamo, polofesele wanena’mba: “Nanga’mba badi bavwala kano kayukeno i bakutwa badi balāla na bantu ba ngitu imo.” Ku mfulo kwa buno bufundiji, Maud wakamona polofesele ne kumushintulwila amba kayukeno ka mafinko asatu katyiluluka kadi kakwasha mwanda wa kayukanya Batumoni ba Yehova. * Kupwa wamusapwila shi witabije amuletele mabuku ēsambila pa uno mwanda. Polofesele waitabija, kupwa wanena ne Maud akesambile’po ku kalasa.

 Pobadi bafundija bufundiji bumo bonka mu kalasa kakwabo, polofesele waingidije tabulo ya tuyukeno palapala twadi tuvwala bakutwa mu makomponi. Ino tabulo yadi ilombola biyampe amba, Batumoni ba Yehova bo badi bavwala kayukeno ka mafinko asatu katyiluluka. Ku mfulo kwa buno bufundiji, Maud walombola uno polofesele shi uswile amuletele myanda mivule īsambila pa uno mwanda. Polofesele waitabija, kupwa nandi wanena Maud āye kwīsambila’po mu kalasa.

 Maud walongolola myanda ya kunena mu maminite 15, ino aye paadi kakesambila’po mu kalasa kabajinji, polofesele wamunena’mba: “Ubwanya kwisambila’po mu bula bwa nsá yense mutuntulu wa buno bufundiji.” Maud washilula na kutadija video ilombola kupangwapangwa kwa Batumoni ba Yehova na buludiki bwa Nazi. Palombwele video mwatalwidile buludiki bwa Nazi bana 800 ba Batumoni ba Yehova kudi bambutwile babo, Maud waimika video mwanda wa kutanga bukamoni bwa bana basatu mu bano’ba. Kupwa pa kupwa kutala video, Maud watanga mukanda walembelwe mu 1940 na Gerhard Steinacher nkasampe Kamoni wa Yehova wa myaka 19, wa mu Otrishe. Mu uno mukanda, uno nkasampe ushadika’mo bambutwile bandi, mansá matyetye kumeso kwa aye kwipaibwa na bantu ba Nazi. *

 Maud wesambīle pa uno mwanda umo onka ne mu kalasa ka bubidi. Pa mwanda wa bukankamane bwandi, kitatyi kyonso kifundija bano bapolofesele bufundiji butala pa makomponi a masusu aa Nazi, ke banenanga’mba mu bantu bakutyilwe’mo, mwadi ne Batumoni ba Yehova.