Mu 2011, muntu umo wafikile mu Norveje utamba mu Eritré. Pakamupempwile Batumoni ba Yehova, webalombwele amba wadi wisamba na Batumoni mu yabo ntanda. Wanena’mba paadi sola kwabo, wamwene Batumoni badi bakutwa pangala pa lwibabijo lwabo, bapela kutwela bu sola nansha shi bebasusula namani.

 Bintu pa kushinta mu kitulumukila, uno muntu nandi wakutwa. Watulumuka’tu kadi mu kifungo na Batumoni basatu, ba Paulos Eyasu, Negede Teklemariam, ne Isaac Mogos, bakutyilwe pa mwanda wa lwitabijo lwabo tamba mu 1994.

 Paadi mu kifungo, uno muntu wemwenine Batumoni ba Yehova bengidija byobafundija mu būmi bwabo. Wamwene kubulwa budimbidimbi kwabo kadi badi bapa’nka ne bakutwa bakwabo byakudya byabo. Wamwene Batumoni ba Yehova bobadi bakutyilwe nabo befunda Bible pamo difuku ne difuku ne kwita bakwabo befunde nabo pamo. Pobebanenene kushinya mukanda wa kutuna lwitabijo lwabo mwanda wa bebakutulule, bapela.

 Uno mwanda mumweke watengele bininge uno muntu wampikwa budimbidimbi, kadi byaashikete mu Norveje, wasakile kuyuka kine kikadile Batumoni ba Yehova na lwitabijo lukomo. O mwanda pakamupempwile Batumoni, washilwile kwifunda nabo Bible ponka na ponka, ne kutanwa ku kupwila kwabo.

 Mu Kweji 9, 2018, wabatyijibwa ke Kamoni wa Yehova. Pano wingidijanga mikenga yonso yadi nayo, wisamba na bantu ba ku Eritré ne Sudan, wibakankamika befunde Bible amba bekale na lwitabijo lukomo.