Mu Amerika wa Kunshi, bantu ba tubila, ndimi ne mizo mishileshile bashikete mu ditó dya Amazone kulampe na bibundi biloe. Ebiya mu Kweji wa 7, 2017, kibumbo kya Batumoni ba Yehova 13 baenda mu Giyane wa Bafalanse lwa mema, bapita mu Munonga wa Maroni ne tuminonga tutyetutye twa kutunduka. Kyendelo? Kukasapwila bantu bashikete kufulakufula kwa munonga musapu wa mu Bible uleta lukulupilo.

 Kweji umo kumeso kwa kushilula luno lwendo lwa mafuku 12, bonso bakwenda bakatenwe ku lenyo ya mwa kwiteakenya. Winsley uvuluka’mba, “Betulombwele mokwikadile ne mānga ya bantu badi’ko, kadi betulombola ne mwa kwiteakenya mwanda wa lwendo.” Musapudi ne musapudi, bamupa kingidilwa mwa kwela kabutanda kakonibwa ne mushiketele kutyina byakabomba. Mu lwendo twadi ba kukanda amviyo misunsa ibidi ne kwenda mansá mavule mu mato.

 Le boba batongelwe kwenda beivwene namani? Ba Claude ne Lisette ba myaka 60 ne musubu, baitabija kwenda. Claude unena’mba: “Nasangele bininge, inoko na kamoyo. Baunombwele amba munonga udi mulungu bininge kadi uleta kyaka.” Lisette aye wadi wakaminwe kintu kingi. Unena’mba: “Nadi neipangula shi nkabwanya kwisamba ndimi yobesamba’ko”.

 Kaka Mickaël nandi wadi wiivwana uno muswelo. Unena’mba: “Byoketwadipo tuyukile myanda mivule pa kabila ka Wayana, nefundile pa Entelenete bishima bityetye ne mwa kwimwina bantu mu lwabo ludimi.”

 Shirley waendele pamo na wandi mulume Johann, walemba mulongo wa ndimi isambwa kufulakufula kwa munonga. Unena’mba “twatentwile mavideo pa jw.org mu ino ndimi ne kusokola kabuku ka bishima bya mu ludimi lwa Wayana.”

 Dya Bubidi mafuku 4 Kweji wa 7, kino kibumbo kyakanda amviyo mu Saint-Laurent du Maroni kyaenda ku Maripasoula, kakibundi katyetye ka mu Giyane wa Bafalanse.

 Mafuku aná pa kupita’po, baenda lwa mato ku bekadi ba bibundi bidi ku tuminonga twa kungala kwa munonga wa Maroni. Roland tutu umo wadi mu kino kibumbo unena’mba, “twatene’ko bantu basangela bininge myanda ya mu Bisonekwa. Badi bepangula bipangujo bivule, kadi bamo badi basaka twifunde nabo Bible.”

 Mu kibundi kimo, ba Johann ne Shirley betene’mo na ba mulume ne mukaji badi na mubutule weyoele. Johann unena’mba, “Twebatadije video inena’mba, Mwine Amerika Wasokola Umpangi wandi, idi pa Televijo ya JW. Bano ba mulume ne mukaji batengwa na ino video. Betupa adelese yabo ya pa Entelenete mwanda badi basaka twendelele kwisamba.”

 Kupwa kino kibumbo kyaenda ku Antécume Pata, kunshi kwa munonga. Kwine’kwa mfumu wa kibundi waitabija bano batumoni bakōke na lwendo bashimike tumatanda twabo pa kifuko kiyampe. Kupwa baoya mu munonga na moilanga bene kibundi.

 Ebiya bataluka baenda lwa mato ku kibundi kya Twenké, kobatene bene kibundi mu madilo. Éric, umo wa mu bateakenye luno lwendo unena’mba: “ ‛Grand Man,’ mfumu wa bantu wetupa lupusa lwa kwenda mu kibundi mwanda wa kusenga bantu badi na njia. Mfumu ne kyandi kisaka basangela bisonekwa byotwebatangile mu Bible wa ludimi lwa Wayana. Twebatadija ne video īsambila pa mulao wa mu Bible wa lusangukilo.”

 Kupwa bakanda amviyo mu Maripasoula, baenda lwendo lwa maminite makumi-asatu ku kakibundi katyetye ka Grand-Santi kungala. Mu Dya Bubidi ne Dya Busatu, bano banabetu basapwila bantu ba mu kibundi musapu wa mu Bible. Mu Dya Buná bano Batumoni baituluka dya Munonga wa Maroni, baenda lwendo lwa mansá atano ne kipindi ku Apatou.

 Ino difuku dilondakana na dya mfulo dya lwendo lwabo, bano banabetu baenda mu bibundi bya ba marroons, bana ba bapika bene Afrika bobaendele nabo mu Amerika wa Kunshi kitatyi kyādi kimuninwe ntanda ya Siriname bupika. Batumoni baita bantu bonso bāye ku kupwila mu dito, mu pema obashimikile. Claude unena’mba, “Mityima yetu yasangele bininge pa kumona bantu bavule baiya’ko. Mwanda twebetyile’tu lubanga lwa dine difuku’dya!” Karsten waendele musunsa wandi mubajinji mu luno lwendo, wanena mwisambo wa bantu bonso mu ludimi lwa Aukan, unena’mba, “Le Buno Bo Būmi Bonso Kete?” Kwatanwa bantu makumi kitema ne umo ba mu bibundi bishileshile.

 Ku mfulo, banabetu baendele bajokela ku Saint-Laurent du Maroni. Abo bonso basangala bininge pa kumona bantu ba kwine’kwa batambula mabuku mavule ne kutala mavideo alupwilwe na Batumoni ba Yehova.

 Lisette unena’mba, “Nakomenwa ne kya kunena pa kulombola nsangaji yonaivwene mu luno lwendo.” Cindy nandi unena’mba: “Shi lwendo lwa uno muswelo lwadi lwa kwendwa monka, nadi wa kulomba kwenda. Bilomba kwimwena ino nsangaji pa kwiivwanija!”

 Boba baendele mu luno lwendo babilanga kwimwena monka bino bintu. Mickaël unena’mba, “twi beteakanye kwenda monka!” Winsley wavilukīle ku Saint-Laurent du Maroni. Ba Claude ne Lisette, abo bonso ba myaka 60 ne kupita, bakwete butyibi bwa kuvilukila ku Apatou.