Kisaka kyetu i kya mu Tonga, ntanda idi na kintu kya bisanga 170, kunshi ne kushika kwa Pasifike. Mu Tonga twadi na būmi bwa munshi, kwa kubulwa mudilo wa nshinga nansha motoka mwine. Ino mu yetu njibo mwadi’nka mema a kutoma, kadi twadi na banzolo batyetye. Shi abetupe konje ku masomo, ami ne banabetu babidi twadi tukakwasha’ko tata ku budimi bwa kisaka, twadi tukuna makonde, bilungu, makōko (mapole), ne lulundu. Shi tubapoteja byotwangula, kalupeto kadi kasokola tata na kwingila tumakaji tutyetutye kadi kavudila’ko. Pamo bwa bekadi bakwetu bavule ba pa bisanga, kisaka kyetu kyadi kilēmekele Bible bininge, kadi twadi twenda ku kipwilo kitatyi ne kitatyi. Inoko, twadi tukulupile amba muswelo umo kete wa kwikala na būmi buyampe i kuvilukila ku ntanda ya bupeta.

 Ami pa kubwanya myaka 16, muyomba wetukwasha, kisaka kyetu kyavilukila ku Kaliforni mu États-Unis. Bine, twaikele’ko na makambakano a kwibidila kibidiji kyabo! Nansha byotwaikele na lupeto luvule, twadi tushikete mu mukenza wa balanda mwadi muvudile bya lūma ne bantu batoma bintu bikolwañana. Twadi twivana masāshi bufuku kitatyi kyonso, kadi balondakani netu bavule badi na moyo wa babipolapola. Bantu bavule badi basela mata mwanda wa kwingikinga nansha kukimba kupwa lupotopoto. Ne pano nekidi na disāshi mu kyadi dyobangashile mu lupotopoto.

 Ku masomo a sekondele, nadi nsaka kwikala pamo bwa bankasampe bakwetu. Bityebitye naikala na kibidiji kya kwenda mu mafetyi mabi, kya kutoma mālwa bininge, kuswa bya lūma, ne kutoma bintu bikolwañana. Mwenda mafuku, nketome dyamba bininge. Nashilula kwiba mwanda wa kupota bintu bikolwañana. Nansha bantu ba mu kyetu kisaka byobadi bana ba kipwilo bepāne, kebampelepo madingi nansha amo amba nkomene bakwetu badi baningila kulonga bibi. Nakutyilwe misunsa mivule pa mwanda wa bilongwa byami bya lūma. Bine, būmi bwami bwavutakene! Ku mfulo naelwa mu kifungo.

 Difuku dimo mu 1997, ami papo mu kifungo, mukutwa mukwabo waumona nkwete Bible. Dyadi difuku dya Noele, kitatyi kimonwanga na bene Tonga bavule bu kijila bininge. Waungipangula shi ndyukile bine bifundija Bible pa lubutulo lwa Kidishitu, ino nakomenwa kya kunena. Ebiya waunombola nsekununi ipēla idi mu Bible īsambila pa kubutulwa kwa Yesu, kupwa namona’mba bisela bivule bya pa Noele kebitelelwe’mopo. (Mateo 2:1-12; Luka 2:5-14) Ñeni yamvutakana, keneipangula bintu bikwabo binena Bible. Uno muntu wadi ukapwila yenga ne yenga na Batumoni ba Yehova badi bapwidila mu kifungo, ebiya nami nakwata butyibi bwa kwenda kukapwila nandi. Badi befunda mukanda wa mu Bible wa Kusokwelwa. Nansha byonkyaivwanijepo bivule mu bintu byobanenene, najingulwile amba bintu byonso byobadi bafundija byadi bitamba mu Bible.

 Paunenene Batumoni twifunde Bible, naitabija na nsangaji. Dibajinji, nefundile mulao wa mu Bible wa paladisa ikekala’ko pano pa ntanda mu mafuku a kumeso. (Isaya 35:5-8) Naivwanija’mba pa kusangaja Leza, mfwaninwe kushinta būmi bwami bininge. Najingulula’mba Yehova Leza kakandekapo ntwele mu Padisa yālailwe na bibidiji byami bibi. (1 Bene Kodinda 6:9, 10) Penepa nasumininwa kuleka ngikadila yami mibi, kutoma mfwanka, kutoma malwa gininge, ne kutoma bintu bikolwañana.

 Mu 1999, ami nkyapwile myaka yobauntungīle mu kifungo, balupusa bauntundulwila mu komponi ka beni. Mu bula bwa mwaka umo ne kupita, nkyadipo kadi nekimona na Batumoni. Inoko nadi musuminwe kwendelela kushinta. Mu 2000, buludiki bwaumpanga mu États-Unis, baunjokeja mu Tonga.

 Ami pa kujokela mu Tonga, nakimba Batumoni ba Yehova bukidibukidi, nashilula kwifunda Bible monka. Nadi nsenswe byonadi nefunda, kadi natulumukile pa kumona Batumoni ba pa kisanga balupula bufundiji bwabo bonso mu Bisonekwa, enka na mwadi mulongele Batumoni ba mu États-Unis.

 Tata wadi muyukane mu kibundi mwanda wadi na kitenta kikatampe mu kyabo kipwilo. O mwanda kisaka kyetu kyavutakanibwe ñeni ne kukalabala ponapwene na Batumoni ba Yehova. Inoko, mwenda mafuku bambutwile bami basangela misoñanya ya mu Bible yaunkweshe numbulule būmi bwami.

 Kintu kyadi kikomo kushinta i kuleka bibidiji bya kwetu bya kutoma mālwa bininge. Bana-balume bavule bene Tonga bapityijanga mansá mavule yenga ne yenga batoma kava, mālwa obeñanga ku miji ya mutyi wa lukitu. Pa kujokela mu yetu ntanda, naikele na kibidiji kya kwenda kyolwa kyonso mu ñanda yobapoteja’mo kava ne kutoma kava kufika’nka ne byonkolwa. Ano makambakano atambile ku bakwetu bonadi mpwene nabo kebadipo balēmekele misoñanya ya mu Bible. Mwenda mafuku, baunkwasha, najingulula’mba bibidiji byami bifītyijanga Leza mutyima. Penepa nashinta mwanda wa Leza angesele ne kungitabija.

 Nashilula kutanwa ku kupwila konso kwa Batumoni ba Yehova. Kupwana na bano bantu badi balonga bukomo bwa kusangaja Leza kwaunkweshe nkomene matompo. Mu 2002, nabatyijibwa kendi Kamoni wa Yehova.

 Namwenine mu kitūkijetyima kya Leza, kine kinena Bible amba: “Yehova . . . wimutūkijije mutyima mwanda kasakilepo muntu nansha umo oneke, ino usaka bonso bafikile pa kwisāsa.” (2 Petelo 3:9) Bine, wadi wa kufudija ino ntana minunu tamba kala, ino i mwiileke’ko kitatyi kilampe mwanda wa bantu pamo bwa ami tupwane nandi. Nsenswe kunenwa’mba Leza ubwanya kuñingidija nkwashe bakwetu nabo bapwane nandi.

 Na bukwashi bwa Yehova, nalumbulwile būmi bwami. Pano nkikibengapo bakwetu mwanda wa kupota bitomibwa bileta lufu. Ino noñanga bukomo bwa kukwasha bakwetu nabo bekale balunda na Yehova. Pa mwanda wa kupwana na Batumoni ba Yehova, namwene Tea, mukaji onsenswe. Pano tudi na nsangaji mu kisaka pamo ne wetu mwana mwana-mulume. Tufundijanga bakwetu byobya bine binena Bible pa lukulupilo lwa kukekala na būmi bwa nyeka mu paladisa ya ndoe.