Natamīne mu kifuko kya talala, kidi kufula kwa Tampere, mu Felande. Kisaka kyami kekyadipo kisenswe myanda ya Leza, inoko kyadi kinena’mba kufunda ne mwikadilo muyampe bidi na mvubu. Mama i mwine Alemanye, kadi ponadi mwanuke, nadi ñenda na dimodimo mu Alemanye wa Kushika, mwine mwadi mushikata bankambo.

 Nadi nsenswe makayo tamba pa bwanuke. Pa bwanuke nadi nkaya makayo a miswelo yonso, ino ami pa kubwanya kintu kya myaka 14, nata mutyima bininge ku makayo a nteneshi. Ami pa kubwanya myaka 16, nadi neibidija misunsa ibidi nansha isatu ku difuku—misunsa ibidi na muntu wa bwino wadi umfundija, ebiya ku kyolwa keneibidija ami mwine. Nasangedile bintu palapala bya mu ano makayo, kukaya makayo a nteneshi kwadi kunkwasha ku ngitu ne mu ñeni. Nansha byonadi nsangela kwitana na balunda, tutoma mālwa na dimodimo, ino nkyadipo nansha dimo na makambakano a kutoma mālwa ne bitomibwa bikolwañana. Neelele bininge mu makayo a nteneshi—ye kintu kyonadi ntangidije kumeso.

 Ami pa kubwanya myaka 17 nashilula kwenda kukakaya makayo a kwitāka na kitango kya bakayi ba bwino ba nteneshi (ATP). a Pa kunekenya mu makayo mavule, nayukana bininge mu yetu ntanda. Ponabwenye myaka 22, nabadilwa mu bakayi ba bwino 50 ba nteneshi kujokoloka ntanda yonso.

 Mu bula bwa myaka, nanangile ntanda, ñenda nkaya makayo a nteneshi. Namwene bifuko bimobimo bisangaja, ino kadi nayukile ne makambakano mavule adi ntanda yonso, pamo bwa butapani, kutoma dyamba, ne koneka kwa bifuko. Kimfwa, potwadi mu États-Unis, betukandile kwenda ku bifuko bimo bya mu bibundi bimobimo mwanda mwadi muvudile butapani. Bino byonso’bi byadi binkambakanya. Ne kadi, nansha byonadi nonga bintu byonsenswe, ino ku mfulo kwa difuku, nadi nemona bu kudi kintu kyombudilwe.

 Sanna wami abala, washilwile kwifunda Bible na Batumoni ba Yehova. Ku ngalwilo nadi musepa pa kumumona wifunda myanda ya Leza, ino nkyamukankejepo kwifunda. Batwe’tu twisonga mu 1990, mwaka ulonda’po wabatyijibwa ke Kamoni wa Yehova. Ami nkyadipo nsenswe myanda ya Leza, ino nadi nkulupile amba Leza udi’ko. Nadi mvuluka nkambo mwine Alemanye wadi utanga Bible bininge, kadi waumfudije ne muswelo wa kulombela.

 Difuku dimo, ami ne Sanna potwakatadile ba mulume ne mukaji Batumoni, mulume, Kari, waunombola bupolofeto bwa mu Bible bwisambila pa “mafuku a mfulo.” (2 Temote 3:1-5) Kino kyauntenga bininge, najingulula kine kyenda kibipila bintu bininge mu ino ntanda. Mu dine difuku’dya, ketwesambilepo bivule pa myanda ya Leza. Inoko tamba penepa, twashilula kwisamba myanda ya mu Bible na Kari, kadi byonso byonadi nefunda byadi na buluji. Byonadi muvudilwe bya kulonga ne kwendakana kyaba kyonso, twadi tukomenwa kwitana kitatyi ne kitatyi, ino Kari kakōkelepo. Wadi ulondolola kupityila ku mikanda bipangujo byonadi mwipangula potwadi twifunda. Bipangujo byonso bikatampe bitala pa būmi byalondolwelwe biyampe kupityila ku Bible, ebiya bityebitye nashilula kwivwanija mutwe wa mwanda wimanine’po Bible—amba Bulopwe bwa Leza bukafikidija mpango ya Leza yonso. Kuyuka dijina dya Leza, Yehova, ne kumona bintu byaetulongēle kwaunsangeje bininge. (Ñimbo ya Mitōto 83:18) Kintu kyaunsangeje kutabuka i kwitupa kwaetupele kitapwa kya kinkūlwa—ke yadipo’tu mpangiko miyampe bitupu nansha’mba kudi wamuningile, ino i kilomboji kya buswe bwa Leza. (Yoano 3:16) Kadi nayukile amba ngidi na mukenga wa kwikala mulunda na Leza ne kukekala’ko nyeke mu paladisa ya ndoe. (Yakoba 4:8) Nashilula kwiipangula’mba, “Le mbwanya kufwija’ko namani?”

 Nalangulukīle bininge pa būmi bwami. Nefundile mu Bible amba nsangaji mikatampe itambanga ku kupāna, ebiya naikala na mutyima wa kusapwila bakwetu nkulupilo yami. (Bilongwa 20:35) Byonadi mukayi wa bwino, nadi ñenda mu ñendo ya makayo, nonga mafuku 200 pa mwaka kulampe na yami njibo. Kisaka kyami kyonso kyadi kitala’nka ami—kwiibidija kwami, kibidiji kyami, ne mwingilo wami. Ebiya najingulula’mba mfwaninwe kushinta.

 Nadi ndyukile amba kuleka kaji ka makayo, ka mfutwa miyampe pa mwanda wa myanda ya Leza i butyibi kebukevwanijapo bantu bavule. Inoko namwene amba mukenga wa kuyuka Yehova biyampe ne kukamona būmi bwa nyeke i kintu kya mvubu mikatampe kupita mpalo yo-yonso yobabwanya kumpala mu makayo a nteneshi, penepo napēlelwa kukwata butyibi. Nadi musumininwe kuleka kuta mutyima ku bibwanya kunena bantu—buno bwadi butyibi bwa ami mwine. Vese wa mu Bible waunkankamikile bininge nkomene kuno kuningilwa i Ñimbo ya Mitōto 118:6, unena’mba: “Yehova udi ku wami mutamba; nkikakwatwapo moyo. Le muntu ubwanya kunonga kika?”

 Mu kine kitatyi’kya bantu bamo badi bakwatakanya makayo baunenene tushinye kontala yadi ya kunkwasha mu bula bwa myaka nkaye mu bakayi ba bwino ne kusokola lupeto luvule. Inoko, byonadi kendi mukwate kala butyibi, napela, kupwa naleka ne kukakaya mu kitango kya ATP. Naendelela na kwifunda Bible, kadi mu mafuku 2 Kweji 7, 1994, nabatyijibwa kendi Kamoni wa Yehova.

 Kondi ami, ke mwandapo mubi waumfikile, walengeje nangulukile padi Leza. Kadi nkyadipo nemona bu muntu ukimba bubine. Nadi mona’mba būmi bwami budi biyampe bininge ne amba i kutupu kintu kikwabo kyonsakilwa. Inoko, na mu kitulumukila, nanshi bubine bwa mu Bible bwadi buntengēle nebusokole, najingulwile amba būmi budi na mvubu mikatampe, kadi būmi bwami i bulumbuluke bininge kupita ne monadi nangila! Kisaka kyetu i kikomo, kadi kidi mu bumo kashā. Kadi ne musangale bininge mwanda bami bana basatu i balonde mu mayo ami—ke bu bakayipo, ino bu bene Kidishitu.

 Nekikayanga makayo a nteneshi. Mu bula bwa myaka, nekwatakanyanga mu būmi na kwingila mingilo ikwatañene na makayo a nteneshi, kimfwa, ne antelenele kadi mwimaniji wa ekipe ya makayo a nteneshi. Ino nkikitelepo mutyima bininge mu makayo. Pa kala, nadi neibidija mansá mavule ku yenga mwanda wa kwikala mukayi muyampe wa nteneshi, bingwa. Pano byondi bu musapudi wa kitatyi kyonso, nsangedile kwingidija kitatyi kyami mwanda wa kukwasha bakwetu befunde ne kwingidija misoñanya ya mu Bible, mine yashintyile būmi bwami. Ne mutane nsangaji mikatampe pa kutangidija kumeso kipwano kyami na Yehova Leza ne kusapwila bakwetu lukulupilo luyampe lwa kumeso londi nalo.—1 Temote 6:19.