Bantu bamo bibalombanga kitatyi kilampe pa kuboila ñeni ku myanda mibi yebatene. Nami mbadilwa’mo. Nabutwilwe ne kutamina mu Barcelone, kibundi kya bubidi ku bukata mu Eshipanye. Kisaka kyetu kyadi kishikata mu Somorrostro, mukenza mukatampe wa kibundi udi kufula-kufula kwa dijiba. Somorrostro wadi mukenza utumbīle butapani ne bintu bikolwañana.

 Bambutwile bami badi na bana kitema, kadi ami ye wadi umbedi. Byotwadi balanda bininge, tata wauntumine kukengila kokwa kukailanga bakayi ba nteneshi mwanda wa kwibaboila manteneshi. Nadi na myaka dikumi, kadi nadi ñingila mansá dikumi difuku ne difuku. O mwanda nkyadipo mfunda enka kemwadipo mufundila bana bavule ba yami myaka. Ami pa kubwanya myaka 14, nashilula kwingila ku kaji ka kusondela byuma.

 Mu 1975, bauntweja mu mwingilo wa busola, mwine obadi batweja’mo bantu ku bukomo mu Eshipanye. Byonadi nsaka kutumba mu būmi, naendele kukelunga na kibumbo kya basola ba Eshipanye badi bashikete mu Melilla, mu Afrika wa Kungala. Mu kine kitatyi’kya, neelela bininge mu būmi bwa kiboja bwa ino ntanda, bwa kutoma mālwa ne bintu bikolwañana.

 Ami pa kutamba mu kibumbo kya basola, najokela mu Barcelone, napunga kisumpi kya babipolapola. Twadi twiba kintu kyonso kyotutana. Kupwa twakapoteja bintu byotwiba mwanda wa kusokola makuta a kupota bintu bikolwañana. Nashilula kutoma LSD ne amphétamines, kupwa natweja mutwe mu busekese, kukolwa mālwa ne mu makayo a kwidya lupeto. Buno būmi bwa bupolapola bwaunengeje nsanswe bya lūma bininge. Kyaba kyonso nadi ñenda na lupete, kasolwa, nansha kipanga, kadi nkyadipo na moyo wa kwingidija’po kimo shi nasake.

 Difuku dimo, ami ne kisumpi kyami kya babipolapola, twaiba motoka, bampulushi kebetupanga tupolobela. Yadi pamo’nka bwa filime. Twaenda na uno motoka kintu kya makilometele 30, bampulushi bashilula kwitwela masashi. Mfulo mfulō shofele wetu walonga akishida, twatamba’mo batwe bonso twanyema. Tata pa kuyuka’o, waumpanga ku njibo, kadi wadi na bubinga.

 Myaka itano yalondele’po, mu dishinda mo mwadi ke mu yami njibo. Nadi ndāla pa bibelo, mu myotoka, pa bibasa bya bapityeshinda, ne mu malālo. Kyaba kimo nashikete ne mu mutá. Būmi bwami kebwadipo na kitungo nansha kimo, kadi nkyadipo nanga būmi nansha lufu lwine. Mvulukanga ponetapile bilonda mu nkonyenyo ne ku makasa ponadi mutome bintu bikolwañana. Nekidi na mikovu ne dyalelo.

 Ponabwenye myaka 28, mama waiya kunkimba, waunena nkajokele ku njibo. Nami naitabija ne kumulaya’mba nsa kōlola bwami būmi, ino byaunomba kitatyi pa kufikidija uno mulao.

 Difuku dimo kyolwa, Batumoni ba Yehova babidi baiya ku yetu njibo. Ponadi nebateja, tata wafuna mu njibo amba kwadipo wa kwibashitwila. Ino byonkyadipo nsaka muntu anombole bya kulonga, namusūla. Baumpa tubuku tusatu, nami natambula’to na nsangaji. Nebepangula kobapwidilanga, mafuku matyetye pa kupita’po, naenda ku Njibo ya Bulopwe.

 Kintu kibajinji kyonamwene i kuvwala kwadi kuvwele bantu bonso biyampe. Ino ami nadi na nywene milampe, myevu misalakane, kadi mvwele bisandi bisasamuke. Namona’mba muno kemumfwaninwepo, ebiya nashala panja. Ino amba ntulumuke, namona mulunda nami wa pa kala wa mu kisumpi kya babipolapola witwa bu Juan, uvwele kotyi. Kupwa baunombola’mba waikele ke Kamoni wa Yehova mu mwaka upityile. Kumumona kwaumpele kikulupiji kya amba, nkokeja kutwela’mo mpwile nabo. Pano po ponashilwile kushinta.

 Naitabija kwifunda Bible, kadi najingulula bukidi bonka’mba shi nsaka kwitabijibwa na Leza, mfwaninwe kushinta ngikadila yami ya bukalabale ne būmi bwami bwa disubi. Kebyadipo bipēla kushinta uno muswelo. Nefundile amba pa kusangaja Yehova Leza, mfwaninwe ‘kwalamuka na kushinta ñeni yami.’ (Bene Loma 12:2) Natengelwe bininge na lusa lwa Leza. Nansha byonalongele bilubo bivule, najingulwile amba Leza waumpe mukenga wa kushinta. Myanda yonefundile padi Yehova Leza yatwelele bininge mu mutyima wami. Najingulwile biyampe amba kudi Mupangi mwine untele mutyima.—1 Petelo 5:6, 7.

 Kino kyaunengeje nshilule kushinta. Kimfwa, potwadi twisambila pa myanda ya kutoma mfwanka kitatyi kyotwadi twifunda Bible, nanenene mu mutyima’mba, ‘Shi Yehova Leza usakanga ngikale utōka kadi wampikwa disubi mu bintu byonso, nankyo mfwaninwe kwela bino bilole bya mfwanka!’ (2 Bene Kodinda 7:1) Kupwa neyela mu kyala!

 Kadi nadi mfwaninwe kuleka kutoma bintu bikolwañana ne kupoteja’byo kwine. Kulonga namino kwadi kulomba bukomo ne kitatyi. Pa kuleka’byo, najingulwile amba mfwaninwe kutyiba kipwano na balunda nami ba pa kala. Kebadipo bankwasha ñendelele ku mushipiditu. Inoko, mu kitatyi’kya, nashilwile kukulupila bininge Leza ne balunda nami bapya ba mu kipwilo. Buswe bobadi bansenswe ne kunta mutyima kyadi kintu nkyokyamwene kashā. Myeji pa kupita’po, naleka’byo kutoma bintu bikolwañana, ‘navwala bumuntu bupya,’ bwine bwaunkweshe ngitabijibwe na Leza. (Bene Efisesa 4:24) Mu Kweji 8, 1985, nabatyijibwa kendi Kamoni wa Yehova.

 Bible waunkweshe numbulule būmi bwami. Waunyongolwele ku bintu bibi byadi byona umbidi ne bulēmantu bwami. Na bubine, balunda nami ba pa kala 30 ne musubu, bafwile bakidi’tu bankasampe na SIDA ne na misongo mikwabo itamba ku kutoma bintu bikolwañana. Bine, mfwijanga’ko mwanda nabwenye kwiepeja ku bino bipa bilula kupityila ku kwingidija misoñanya ya mu Bible.

 Mpete ne tusolwa byonadi nsela ponadi nkasampe usenswe bya lūma, pano ke bintu bya kala. Nkyadipo nanga nansha dimo amba dyakadilwe kantu nkaselanga Bible ne kwingidija’ye mwanda wa kukwasha bantu. Dyalelo, ami ne wami mukaji twi Batumoni ba Yehova bengila mwingilo wa kitatyi kyonso.

 Bambutwile bami kebaikelepo Batumoni ba Yehova, inoko badi basangela byabuyabuya byonemwenine mu kwifunda Bible. Na bubine, tata wadi unenena’nka ne Batumoni ku bantu bonso bobengila nabo. Wamwene patōka’mba lwitabijo lwami lupya lwalumbulwile būmi bwami mu muswelo wa kutendelwa. Divule mama wadi unena’mba nadi mfwaninwe kwifunda Bible tamba kala. Bine, ngitabije byaadi unena!

 Myanda yauntene mu būmi yaumfundije amba kukimba nsangaji mu kutoma bintu bikolwañana ne mu bibidiji bikwabo bibi i bulembakane. Pano ngidi na nsangaji ya binebine ya kufundija bakwetu bufundiji bwa mu Kinenwa kya Leza—bufundiji bwine bwapandije būmi bwami.