Nabutwidilwe mu San Juan Chancalaito, kakibundi katyetye ka mu Chiapas, mu Meksike. Kyetu kisaka i kya bantu ba kabila ka Chol, musaka wa lutundu lwa Maya. Bambutwile bami betubutwile 12, ami ye wa butano. Ponadi mwanuke, ami ne banabetu twefundile Bible na Batumoni ba Yehova. Ino i kya bulanda, mwanda nkyadipo ñingidija madingi a mu Bible ponadi nkasampe.

 Ami pa kubwanya myaka 13, naanza kutoma dyamba ne kwiba bintu bya bantu. Enka mu kino kimano, naviluka kwetu keñenda njokoloka. Ami pa kubwanya myaka 16, naenda kukengila ku madimi a dyamba. Naingila’ko kintu kya mwaka umo, kupwa difuku dimo bufuku potwadi twenda na kitutūlu kya dyamba mu bwato, bansunga bakwabo ba dyamba belumbile bya bulwi betutamba’dyo. Pa kwibanyema, neela pa mema, naituluka na mulungu nakavubukila kulampe. Kupwa nanyemena mu États-Unis.

 Ne mu États-Unis mwine, naendelela na kusunga dyamba ne kutanwa na makambakano mavule. Ami pa kubwanya myaka 19, baunkwata, kupwa baunkuta’mba ne ngivi kadi nkimbanga kwipaya bantu. Mu buloko, natwela mu kisumpi kya babipolapola ne kulongela’ko bilongwa bikwabo bibi. Ku mfulo, bakatampe ba lupusa bauntundulwila ku buloko bukatampe bwa kasusu bwa mu Lewisburg, mu Pennsylvania.

 Ne mu kino kifungo kya Lewisburg mwine, bilongwa byami byadi’nka bibipila’ko. Byonadi kala na kashé ka mu kisumpi kya babipolapola, napēlelwe kutwela mu kino kisumpi kya babipolapola ba mu buno buloko bwa kasusu. Po pene nasanswa bya lūma, nekupila’nka ñuma. Difuku dimo twetamba lūma na kisumpi kikwabo mu lubanza lwa kifungo. Twekupile bikomo, na tupini ne kwishabila. Pa kwitukankaja, balami ba buloko betwela bintu bidi bwa lukitu (gaz lacrymogène). Kupwa, bakulumpe ba kifungo bauntūla mu kifungo kya pa bula mwa bakutwa baleta kyaka. Nadi nkije kuloba ne kutukana mutonko. Nadi mpēlelwa kukupila bantu. Nadi nebisangela. Nkyadipo netopeka nansha dimo pa bilongwa byami.

 Mu kifungo kya pa bula, difuku dituntulu nadi nshikilwa mu kasho ka bunka, ebiya nashilula kutanga Bible mwanda wa kwipwija mukose. Mwenda mafuku, mulami waumpa dibuku Ukokeja kwikala ne būmi bwanyeke mu Paladisa pano pantanda. a Ami pa kutanga dino dibuku dya kwifunda nadyo Bible, navuluka bintu bivule byonefundile pa bwanuke kitatyi kyonefundile Bible na Batumoni. Kupwa nalangulukila pa muswelo onajokēle kunyuma pa mwanda wa kusanswa bya lūma. Nalangulukila ne pa kisaka kyetu. Banabetu babidi bana-bakaji byobadi ke Batumoni ba Yehova, kenanga mu mutyima’mba, ‘abo basa kukekala’ko nyeke.’ Kupwa neipangula’mba ‘le ami nami?’ Penepa nakwata butyibi bwa kushinta.

 Inoko, nadi ndyukile amba nsakilwa bukwashi pa kushinta. Penepo nashilula bidi na kulomba Yehova Leza ne kumuzenza ankwashe. Kupwa, nalembela bilo ya musambo wa Batumoni ba Yehova ya mu États-Unis, nalomba bamfundije Bible. Bilo ya musambo yakwata’ko mpangiko mwanda wa kipwilo kya kubwipi kīye kimpempule. Mu kine kitatyi’kya, nadi nkyapelwe lupusa lwa kupempulwa na muntu ungi poso’nka wa mu kisaka, ebiya Kamoni umo wa mu kipwilo’kya washilula kuntumina pa Entelenete mikanda ikankamika ne mabuku esambila pa Bible, bine byaunkweshe nsumininwe kushinta.

 Natabwile ditabula dikatampe ponakwete butyibi bwa kutamba mu kisumpi kya babipolapola, mwine monalongele myaka mivule. Mukulu wa kisumpi kya babipolapola nandi wadi mukutwe mu kifungo kya pa bula, namufwena kitatyi kimo ponadi nenangija, namusapwila’mba kensake kwikala Kamoni wa Yehova. Natulumuka pa kunombola’mba: “Shi usumininwe, nankyo i biyampe. Nkibwanyapo kulwa na Leza. Ino shi usakanga’tu kutamba mu kisumpi, abe mwine uyukile bisa kukufikila.”

 Myaka ibidi pa kupita’po, balami ba kifungo bemwena kushinta kwa ngikadila yami. Ku mfulo baundēmeka bininge. Kimfwa, balami balekele kunkuta ku makasa pa kwenda nami ku kikoloni. Mulami umo waumfwena, waunkankamika ñendelele na kushinta. Ebiya, bakulu ba kifungo bauntudulwila mu buloko butadika’ko budi kubwipi na buloko wa kasusu mwanda wa nkavuile’mo mwaka wami wa mfulo. Mu 2004 pa kupwa kulonga myaka dikumi mu buloko, baunkutulula, bakantūla mu Meksike na motoka wa ku kifungo.

 Pa kufika mu Meksike, nasokola padi Njibo ya Bulopwe ya Batumoni ba Yehova. Nakatanwa ku kupwila kwami kubajinji mvwele bisandi bya buloko—ye bisandi biyampe byonadi nabyo. Batumoni bauntudaila na kyanga pampikwa kubanga mumwekelo wami. Ami pa kumona kanye kabo, nemona bu ngidi mu bukata mwa bene Kidishitu ba bine. (Yoano 13:35) Ku kuno kupwila, bakulumpe pa kipwilo bakwata’ko mpangiko ya kumfundija Bible. Mwaka umo pa kupita’po, nabatyijibwa bu Kamoni wa Yehova, mu mafuku 3 Kweji 9, 2005.

 Mu Kweji 1, 2007, naikala mwingidi wa kitatyi kyonso, nonga mansá 70 kweji ne kweji, mfundija bantu Bible. Mu 2011, natambula dipolome ku Masomo a Bible a Batutu Bankungulume (etwa dyalelo bu Masomo a Basapudi ba Bulopwe). Ano masomo i mankwashe bininge pa kuvuija mingilo ya mu kipwilo.

 Mu 2013, nasonga Pilar mukaji onsenswe. Unenanga na mizaulo amba ketabijepo bintu byonadi nonga pa kala byomulombolanga. Nkyajokele kashā mu būmi bwami bwa pa kala. Ami ne wami mukaji tukulupile amba būmi bondi nabo pano bulombola’mba Bible udi na bukomo bwa kushinta muntu.—Loma 12:2.

 Monanga bu binenwa bya Yesu bidi mu Luka 19:10 bintala amiwa. Wānenene amba: “[Naile] kukimba ne kupandija kyokya kyadi kijimine.” Nkikimonengapo bu mujimine. Kadi nkikyendangapo koku ne koku kimba bantu ba kukupila. Kupityila ku Bible, ngidi na kitungo kya kamweno mu būmi, ngidi mu ndoe na bakwetu, kadi kya mvubu kutabuka, ngidi mu kipwano kiyampe na Mupangi wami, Yehova.