Mulunda motwadi twifundila makayo wetapile bibibibi nakomenwa kwibivwanija. Namukupile mu kitulumukila kyambo pa myulu. Nashala netopeka ne kwiipangula shi nkendelela kukaya makayo a kalateka. Mwanda waka kino kilubo kyaunengeje ntatane makayo onadi nsenswe kadi onadi nkaya mu myaka mivule? Dibajinji nondei nemusapwile byanengeje nsanswe makayo a kalateka.

 Natamīne mu kisaka kya bene Katolika bepāne, kyadi kubwipi na Buffalo, kibundi kya mu New York, mu États-Unis. Nadi nkafunda ku masomo a Katolika ne kwingila ku alutale. Bambutwile betu badi basaka ami ne mwanetu mwana-mukaji twikale na būmi buyampe. O mwanda baitabije kundeka nkaye makayo pa kupwa kutamba ku masomo nansha kwingila kaji ka mu kitatyi kityetye, shi nabinga ku masomo. Kino kyanengeje ngikale mwidingile tamba’tu pa bwanuke.

 Ami pa kubwanya myaka 17, nashilula kukaya makayo a kalateka. Mu myaka mivule, nadi nefunda’o mansá asatu ku difuku, mafuku asamba ku yenga. Kadi yenga ne yenga, nadi nonga mansá mavule mpituluka mu ñeni manwa palapala ne mwa kujinina, ne kutala mavideo a mwa kwilumbulwila. Nadi nsenswe kwiibidija mu meso mukute kisasa nansha shi ñingidija byabulwi. Nadi mbwanya kutyumuna mbao nansha bidiki na kukupila’po’tu dimo na kikasala. Nadi mbadilwa mu bantu babajinji kadi nadi ntambula bikombe. Makayo a kalateka aikele ke kintu kya mvubu mpata mu bwami būmi.

 Nadi nanga’mba ngidi na būmi bwa nsangaji. Natambwile dipolome dya iniveleshite na mampwe mangi. Naingile mu sosiete mikatampe bu muntu upotolwele myanda ya maolodinatele. Namwenine mu ino sosiete, naikala na njibo, ne kishinka. Panja nadi mweka bu muntu wa nsangaji mu būmi, inoko nkyadipo na nsangaji mwanda nadi na bipangujo bikatampe bitala pa būmi.

 Pa kutana malondololo ku bipangujo byami, nashilwile kwenda ku kipwilo misunsa ibidi ku yenga ne kulombela kudi Leza ankwashe. Kupwa difuku dimo, mīsambo yotwesambile na mulunda nami yashinta būmi bwami. Namwipangula’mba, “le uyukile kine kyotwikadile’ko? Kupwa nabweja’ko amba: “Kudi makambakano mavule kadi kudi bukondame buvule!” Wanondolola’mba nami kendi mwipangule byabyo bipangujo, ino nasokwele malondololo asangaja mu Bible. Kupwa waumpa dibuku Ukokeja Kwikala na Būmi bwa Nyeke mu Paladisa Pano pa Ntanda. a Wanshitulwila’mba wadi wifunda Bible na Batumoni ba Yehova. Ku ngalwilo, neshisa mwanda nadi nanga’mba nkifwaninwepo kutanga mabuku a kipwilo kikwabo poso’nka kyetu. Inoko mutyima wami wa kusaka kuyuka malondololo ku bipangujo byami, waunengeja nkimbe kuyuka shi bintu bifundijanga Batumoni bidi na buluji.

 Natulumukile pa kuyuka bine bifundija Bible. Nefundile’mba dibajinji Leza wādi usaka bantu bekale na būmi bwa nyeke mu paladisa pano pa ntanda, ne amba mpango ya Leza keishintyilepo. (Ngalwilo 1:28) Natulumukile pa kumona dijina dya Leza, Yehova, mu wami Bible wa King James ne kuyuka’mba dino dyo dijina dyonadi mfwaninwe kutela mu milombelo pompituluka mu Lulombelo lwa Mfumwetu. (Ñimbo ya Mitōto 83:18; Mateo 6:9) Kadi, ku mfulo naivwanija kine kilekele’ko Leza bantu basusuke mu kitatyi kityetye. Bintu byonso byonadi nefunda byadi na buluji! Nasangele bininge.

 Nkikelwapo moneivwanine ponakatenwe musunsa wami mubajinji ku kupwila kwa Batumoni ba Yehova. Abo bonso badi bya bulunda, kadi badi bangipangula dijina dyami. Ku kupwila kwami kubajinji, mwisambo wa bantu bonso wadi wisambila pa milombelo ivwanwanga na Leza. Uno mwisambo wansangeje, mwanda nadi nomba Leza ankwashe. Kupwa, nakatanwa ku Kivulukilo kya lufu lwa Yesu. Ku kuno kupwila, natulumukile pa kumona’nka ne bana balonda mu wabo Bible padi patangwa bisonekwa. Ku ngalwilo, nkyadipo ndyukile mwa kusokwela bisonekwa, ino Batumoni baunkwasha ne kumfundija mwa kwingidijija Bible.

 Ami pa kutanwa ku kupwila kuvule, nashilula kusangela bininge bufundiji buyampe bwadi bufundija Batumoni. Ku kupwila ne kupwila nadi nefunda’ko bintu bivule, kadi pa kutamba nadi kankamikwa ne kutūkijibwa mutyima. Kupwa baunena kwifunda Bible.

 Byobya byonamwene mu Batumoni ba Yehova byadi bishile kulampe na byonadi mvudile kumona mu kyetu kipwilo. Namwene amba Batumoni badi mu bumo kadi bantu ba binebine, balonga bukomo bwa kusangaja Leza. Nakulupila bininge amba bamwekejanga kayukeno ka kuyukila’po bene Kidishitu ba bine, ka kwisanswa abo bene na bene.—Yoano 13:35.

 Ami pa kwifunda Bible bininge, nashinta bininge mwanda wa kwiendeja mungya misoñanya ya mu Bible. Inoko, nadi nanga’mba nkibwanyapo kuleka makayo a kalateka. Nadi nsenswe kwiibidija ne kwikupila na bakwetu. Ami pa kulombola’mo Kamoni otwadi twifunda nandi Bible, wankulupija na buswe amba, “abe endelela’tu na kwifunda, ndyukile amba usa kukwata butyibi buyampe.” Bino ye byonadi nsaka kwivwana. Ami pa kwendelela kwifunda, po pene nkesake kusangaja Yehova Leza.

 Mwanda mukatampe i onemulombolanga ku ngalwilo, ponakupile mu kitulumukila mukwetu kyambo ku myulu. Uno mwanda wanengeje nanguluke bininge shi mbwanya kwikala mulondi wa ndoe wa Kidishitu koku kadi ñendelela kukaya makayo a kalateka. Naboile ñeni ku byobya bilaile Isaya 2:3, 4 amba boba balonda misoñanya ya Yehova “kebakefundepo monka divita.” Kadi Yesu wāfundije bantu bakwabo beleka kwikupila lūma, nansha shi i bebalongele bintu na bukondame. (Mateo 26:52) O mwanda nalekele ano makayo onadi nsenswe bininge.

 Kupwa, nalonda madingi a mu Bible anena’mba “wiibidije na kitungo kya kulombola bwine Leza.” (1 Temote 4:7) Kitatyi kyonso ne bukomo bonadi ñingidija ku makayo a kalateka, pano ñingidijanga’byo mwanda wa kufwena kudi Leza ne kumwingidila. Kishinka wami kaitabijepo nefunde Bible, ebiya namupela. Nabatyijibwe kendi Kamoni wa Yehova mu mafuku 24 Kweji 1, 1987. Ne kwija mpika, nashilula kwingila bu mwingidi wa kitatyi kyonso, naingidija kitatyi kyami mwanda wa kufundija bakwetu Bible. Tamba penepa naendelele kwingila mwingilo wa kitatyi kyonso, ne kwingila mu kitatyi kampanda ku kité kya ntanda yonso kya Batumoni ba Yehova kidi mu New York, États-Unis.

 Pano pondyukile bubine butala padi Leza, ne musokole byadi bimbudilwe mu būmi. Nkikiivwanangapo amba kudi kyombudilwe. Ino ngidi na būmi bwa kitungo ne lukulupilo lwa bine lwa mu mafuku a kumeso, kadi ngidi na nsangaji ya binebine. Nekisangedile kwitamuna bidyoma kitatyi ne kitatyi, inoko kwibidija ngitu kekukidipo na mvubu kutabuka mu bwami būmi. Bintu byontangidije kumeso mu būmi i kwingidila Yehova Leza.

 Ponadi nkaya makayo a kalateka nadi ntele mutyima ku bantu ba kubwipi nami, kadi nadi nangulukila kyaba kyonso pa mwa kulongela shi muntu wauntambe’dyo. Dyalelo nekitele mutyima ku boba badi kubwipi nami, inoko pano nebakwashanga. Bible i munkwashe ngikale muntu wa buntu kadi mulume muyampe wa Brenda, wami mukaji mupopoke.

 Mu bwami būmi nadi nsangedile bininge makayo a kalateka. Inoko, nkendi mwiapingakanye na kintu kiyampe kutabuka. Bible unena’kyo biyampe amba: “Kwibidija ngitu kudi na kamweno katyetye, ino bwine Leza abo budi na kamweno mu bintu byonso, mwanda abo budi na mulao wa būmi bwa pano ne būmi bukāya’ko.”—1 Temote 4:8.