Nabutwidilwe mu kibundi kya Calgary mu Alberta, mu Kanada. Bambutwile bami belubwile nekidi mwanuke, ami ne mama twakashikata kwa bankambo. Bankambo badi betusenswe na mama, kadi nadi mwana wa nsangaji. Nkikelwapo nsangaji yonadi nayo pa bwanuke.

 Ami pa kubwanya myaka isamba-ibidi, būmi bwami bwabipila’ko pealwije ba mama na tata, kupwa twavilukila mu Saint Louis, Missouri, mu États-Unis. Ne kwija mpika najingulula’mba tata wadi mubi bininge. Kimfwa, difuku dibajinji ponajokele ku njibo ntamba ku masomo, wajingulula’mba bakwetu i bankupile ku masomo ami kwibalwija mpika. Waloba ne kunkupila bininge kutabuka ne byaunkupile bakwetu ku masomo! Waunkosolola, ebiya nashilula kwikupila na bakwetu ami’tu na myaka isamba-ibidi kete.

 Ngikadila mibi ya tata yadi ilobeja mama, kadi badi bepotomeja bininge kyaba ne kyaba. Ponabwenye myaka 11, nashilula kutoma bitomibwa bikolwañana ne mālwa. Ebiya naikala na bukalabale ne kwikupila ñuma mu mashinda kyaba ne kyaba. Ami pa kutambula dipolome dya ku sekondele, nasanswa bya lūma bininge.

 Ponabwenye myaka 18, nakeandikija ku Kitango kya mu États-Unis kītwa bu Marine Corps. Baumfundija’ko mwa kwikadila na bwino bwa kwipaya bantu. Myaka itano pa kupita’po, naleka busola naenda kukafunda mwikadila wa bantu mwa kusokwela kaji ku Bilo Ilonda Mwikadile Myanda. Nashilula masomo a iniveleshite mu États-Unis kupwa naendeleja’o potwavilukīle mu Kanada.

 Ku iniveleshite, bantu bantyumwine’ko mutyima bininge. Bantu badi besakila, kintu kyonso mu ino ntanda kyadi kya bitupu, kadi makambakano a bantu keabwanyapo kupwa. Naleka kukulupila’mba bantu babwanya kulumbulula ntanda.

 Byonkyadipo na kitungo mu būmi, naanza kutoma mālwa, bitomibwa bikolwañana, kukimba lupeto na makomwa-meso ne kulonga busekese. Nadi tamba ku yoi fetyi ke ku yoi, nshinta ne bana-bakaji. Byonadi nesumbidile byonafundile mu busola, nadi kendi’nka wa ñuma na yonka. Nadi nkimba kwipwila myanda ami mwine, ne kwikupila na muntu yense onadi mona’mba ususulanga bakwabo. Ino na bubine, naikele umpika wa bya lūma.

 Difuku dimo potwadi tutoma na mulunda nami bitomibwa bikolwañana ku yami njibo koku tomeka dyamba dya kupotoloja, mulunda nami waungipangula shi nkulupile mudi Leza. Namulondolola’mba, “Shi Leza ye uleta masusu pano pa ntanda, nkisakilepo kumuyuka!” Difuku dilonda’po, musunsa mubajinji kwenda ku kaji kami kakwabo, Kamoni wa Yehova otwadi twingila nandi waungipangula’mba, “Molangila, le i Leza uleta masusu pano pa ntanda?” Natulumuka pawaungipangwile kino kipangujo, nasaka kuyukila’ko bivule. Twesamba nandi bivule mu myeji isamba yalondele’po, kadi waingidija Bible pa kulondolola bipangujo byami bikomo byonadi neipangula pa būmi.

 Abala onadi nshikete nandi mu kine kitatyi’kya, kadipo usaka musapwile bintu byonadi nefunda. Namulombola Dya Yenga dimo amba nemwite Batumoni bāye twifunde nabo Bible. Difuku dilonda’po, pa kujokela ku njibo, namutana munyeme, musele bintu byonso mu njibo. Natamba panja kendila. Nalomba kudi Leza, namuzenza ankwashe. Uno wadi musunsa wami mubajinji kutela mu milombelo dijina dya bunka dya Leza, Yehova.​—Ñimbo ya Mitōto 83:18.

 Mafuku abidi pa kupita’po, nashilula kwifunda Bible musunsa wami mubajinji na ba mulume ne mukaji Batumoni. Abo pa kujoka, naendelela na kutanga dibuku Ukokeja kwikala ne būmi bwanyeke mu Paladisa pano pantanda, napwa’dyo enka bwine bufuku’bwa. a Bintu byonefundile padi Yehova Leza ne wandi Mwana Yesu Kidishitu, byauntengele ku mutyima. Namwene amba Yehova udi na lusa ne amba bimusansanga shi tususuka. (Isaya 63:9) Natengelwe bininge na buswe bunsenswe Leza ne na kitapwa kyālambwile wandi Mwana pa mwanda wami. (1 Yoano 4:10) Nafula ku kunena’mba Yehova untūkijije mutyima “mwanda kasakilepo muntu nansha umo oneke, ino usaka bonso bafikile pa kwisāsa.” (2 Petelo 3:9) Namwene bu Yehova wankokela kwadi.​—Yoano 6:44.

 Nashilwile kutanwa ku kupwila yenga ne yenga. Nansha byonadi na nywene milampe, na byuma ku matwi, kadi musalakane, inoko Batumoni badi bamona bu mwanabo wadi mwende lwendo lulampe wajoka. Balongele bintu bu bene Kidishitu ba bine. Nemwene pamo bwa ami wajokela kwetu twikele na bankambo, inoko mujokolokwe na bantu bayampe.

 Ne kwija kwine mpika, myanda yonefundile mu Bible yashilula kushinta būmi bwami. Natendeja nywene, naleka bilongwa bya busekese, ne kuleka kutoma bitomibwa bikolwañana ne mālwa. (1 Bene Kodinda 6:9, 10; 11:14) Nadi nsaka kusangaja Yehova. Ponajingulwile amba ushikilwe bintu byonadi nonga, nkyakidipo nansha dimo nebingija pa mwiendelejo wami mubi. Inoko, divule byadi binsansa ku mutyima. Nanena’mba ‘nkikilonga’byopo dikwabo.’ Nekwija kwine mpika, nalonga bukomo bwa kushinta mulangilo ne bilongwa byami. Mfulo mfulō naanza kwimwena byabuyabuya bidi mu kulonga bintu musakila’byo Yehova. Myeji isamba pa kupita’po na ponashilwile kwifunda Bible, nabatyijibwa kendi Kamoni wa Yehova mu mafuku 29 Kweji 7, 1989.

 Bible waunkweshe nshinte būmi bwami. Pa kala nadi mvudile kulonga bintu na bulobo shi muntu wankolomona. Ino pano noñanga bukomo bwa kwikala “mu ndoe na bantu bonso.” (Bene Loma 12:18) Nkitumbikangapo pa kino, ino mfwijanga’ko Yehova pa bukomo bwa kushinta bantu budi na Kinenwa kyandi ne mushipiditu ujila.​—Bene Ngalatea 5:22, 23; Bahebelu 4:12.

 Pa kyaba kya kwikala umpika wa bitomibwa bikolwañana, bya lūma ne bilokoloko bya busekese, pano noñanga bukomo bwa kusangaja Yehova Leza ne kumwingidila mwendele bukomo bwami. Mwine mubadilwa ne kukwasha bakwetu bamuyuke. Myaka’tu mityetye pa kupwa kubatyijibwa, navilukīle ku ntanda mikwabo mwanda wa kukwasha kokwa kusakilwa basapudi bavule. Mu myaka mivule, nadi na nsangaji ya kufundija bantu bavule ne kwimwena muswelo walumbulwile Bible būmi bwabo. Kadi nasangele bininge paikele mama ke Kamoni wa Yehova—pa mwanda wa kumona kwaamwene monashintyile ngikadila ne mwiendelejo wami.

 Mu 1999, mu El Salvador, natambula dipolome ku masomo etwa dyalelo bu Masomo a Basapudi ba Bulopwe. Ku ano masomo bamfundije’ko ne kunteakanya mwa kutangidila mwingilo wa busapudi, kufundija ne kukumba bantu mu kipwilo. Enka mu mwine mwaka’wa, nasonga Eugenia wami mukaji onsenswe bininge. Batwe bonso twingidilanga mu Guatemala bu basapudi ba kitatyi kyonso.

 Dyalelo, pa kyaba kya kutyumukwa mutyima mu būmi, ngidi na nsangaji ya kashā. Kwingidija bufundiji bwa mu Bible i kunkūle ku busekese, ku bya lūma, ne kumpa būmi buyule buswe bwa bine ne ndoe.