Banangi bavule bapempulanga mpulumuko ya mema mitumbe idi kubwipi na kibundi kya Pagsanjan mu Filipine. Ye mwatamīne tata, Nardo Leron, mu bulanda. Pa kumona majika-kanwa adi mu umbikalo, mu bampulushi ne ku kaji kwaadi wingila, waikala na bululu ne bulobo.

 Bambutwile bami badi bengila bininge mwanda wa kulela babo bana mwānda. Divule dine kebadipo batanwa ku njibo kitatyi kilampe, badi bakalama byangulwa ku ngulu. Ami ne tutu Rodelio twadi twisasaketa kyaba ne kyaba, kadi divule twadi tulāla na nzala. Pa bwanuke ketwadipo ne na mukenga wa kukaya mwine. Shi mwana yense wabwanya myaka isamba-ibidi, twadi tufwaninwe kukengila ku madimi, tusela bivwe bilema bya ntole ya kizungu mu tushinda twa mikuna ya pa ngulu. Shi kivwe i kilēma bininge, twadi twikibulula.

 Tata wadi witukupila, kadi byadi bitusansa bininge shi tubamumone ukupila mama. Twadi tutompa kumukankaja, ino ketwadipo na bukomo. Ami ne Rodelio tweivwanika mu bufyafya’mba tusa kwipaya tata shi tubatama. Bine, nadi ngabila kwikala na tata witusenswe!

 Pa kufītwa ne kuloba pa mwanda wa kasusu ka tata, naviluka ku njibo ponabwenye myaka 14. Mwenda mafuku nashilula kushikata mu mashinda, naanza ne kutoma dyamba. Kupwa, nasokola kaji ka kusela banangi mu kyombo nkebatūla ku mpulumuko ya mema.

 Myaka mityetye pa kupita’po, nashilula kufunda ku iniveleshite mu Manila. Ino byonadi nkajokela ku Pagsanjan kukengila’ko ku mfulo kwa yenga, nadi na kitatyi kityetye kya kufunda. Būmi bwami bwamweka bu kebudipo na kitungo, kadi dyamba dyonadi ntoma kedyampwilepo milangwe. Nashilula kutomena’ko bitomibwa bikwabo bikolwañana, kimfwa cocaïne ne bikwabokwabo. Dyamba ne busekese i ba kanyumu na kalundu. Nadi mona’nka bulanda, bukondame ne masusu. Nashikwa umbikalo ne kwiutopeka’mba i ao ulengeja byonso. Naipangula Leza amba: “Mwanda waka būmi budi uno muswelo?” Ino nkyatenepo malondololo mu bipwilo palapala byonaendele’mo. Nashilula kutoma dyamba bininge mwanda wa kwitalula’ko milangwe.

 Mu 1972, bana ba masomo ba ku iniveleshite ya mu Filipine batombokela umbikalo. Difuku dimo nami naenda nabo, kadi byapita bibi. Bantu bavule bakutwa, kadi myeji mityetye pa kupita’po, batūla’ko kijila kya kwibakwata mu ntanda yonso.

 Nakashikata monka mu mashinda, kutyina’mba balupusa bakankwata pa mwanda wa mu butomboki moneelele. Pa kusokola ya kupota dyamba, nashilula kwiba, ku mfulo, kenonga busekese na bantu ba lupeto ne na beni. Nkyadipo nanga būmi nansha lufu lwine.

 Ponkapo mama ne nkasami mwana-mulume bashilula kwifunda Bible na Batumoni ba Yehova. Tata wakalabala, webasōkela ne mabuku esambila pa Bible. Ino bonso baūminina, kupwa babatyijibwa ke Batumoni.

 Difuku dimo, Kamoni umo wasapwila tata mulao wa mu Bible wa mu mafuku a kumeso, kitatyi kikekala’ko boloke bwa bine pano pa ntanda ponso. (Ñimbo ya Mitōto 72:12-14) Uno mulao wasangaja tata bininge, wakwata butyibi bwa kukimbila’ko myanda mikwabo. Mu Bible, kasokwele’mopo’tu enka mulao wa Leza wa kuleta umbikalo moloke, ino i ne byobya bisaka Leza ku balume ne bashabana. (Efisesa 5:28; 6:4) Kitatyi kityetye pa kupita’po, aye ne banabetu bonso baikala ke Batumoni. Byonadi kulampe na kwetu, nkyadipo ndyukile bino byonso’bi.

 Mu 1978, navilukila mu Ostrali. Ino nansha ke mu ino ntanda ya ndoe kadi ya bupeta, nkyadipo na ndoe ya mutyima. Naendelela na kibidiji kya kutoma mālwa ne dyamba. Mwenda mafuku mu uno mwaka, Batumoni ba Yehova baiya kumpempula. Nasangela byobanombwele mu Bible amba kusa kwikala ntanda ya ndoe, ino nkyadipo nebasangela.

 Kitatyi kityetye pa kupita’po, najokela mu Filipine mu bula bwa mayenga matyetye. Banabetu baunsapwila’mba tata walongele bukomo bwa kwikala muntu muyampe, ino byonadi na bululu ku mutyima, nkyadipo nsaka kwimona nansha nandi.

 Nkasami mwana-mukaji waunshitulwila kupityila ku Bible kine kikadile’ko masusu ne bukondame buvule mu būmi. Natulumuka bininge pa kumona nkasampe mwana-mukaji wa bwino butyetye ulondolola bipangujo byami. Kumeso kwa ami kwenda, tata waumpa dibuku Ukokeja kwikala ne būmi bwanyeke mu Paladisa pano pantanda. a Waunena’mba: “Leka kwela kyaba. Dino dibuku disa kukukwasha usokole byokimba’byo.” Waunena nkakimbe Batumoni ba Yehova shi najokela mu Ostrali.

 Nalonda madingi a tata, nasokola Njibo ya Bulopwe ya Batumoni ba Yehova kubwipi na kwami mu Brisbane. Naitabija kwifunda Bible kitatyi ne kitatyi. Bupolofeto bwa mu Bible pamo na budi mu Danyele shapita 7 ne mu Isaya shapita 9 bwanombwele amba umbikalo wa Leza, owa keukekala’mopo majika-kanwa, uketuludika mu mafuku a kumeso. Nayuka’mba tukekalanga na būmi bwa nsangaji mu Paladisa pano pa ntanda. Nadi nsaka kwitabijibwa na Leza, ino najingulula’mba mfwaninwe kwīfula, kuleka kutoma dyamba ne mālwa, ne kuleka busekese. Tweleka na mukaji onadi nshikete nandi, kupwa nenyongolola ne mu bibidiji byami bibi. Byonakulupile bininge mudi Yehova, namulomba ankwashe nshinte ne mu myanda mikwabo.

 Bityebitye, najingulula’mba byonadi nefunda bibwanya bine kwalamuna muntu. Bible unena’mba shi tulonge bukomo, tubwanya kuvwala “bumuntu bupya.” (Kolose 3:9, 10) Ami pa kulonga bukomo bwa kuvwala bumuntu bupya, najingulula’mba byonaivwene amba tata washinta bumuntu bwandi bibwanya kwikala bya bine. Pa kyaba kya kwikala na bulobo ne kīji, nadi kensake kwikala nandi mu ndoe. Mfulo mfulō, nalekela tata ne kuleka mushikwa onadi mushikilwe tamba pa bwanuke.

 Ponadi nkasampe, twadi tulonga na bakwetu bintu bibi kadi bya kyonakanya. Kidyumu kya mu Bible kyafikidile pondi—balunda babi baunsāsukije. (1 Kodinda 15:33) Ino pano ngidi na balunda bakulupilwa mu Batumoni ba Yehova, kadi i bankwashe ngikale muntu muyampe. Mu bano balunda nasokwele’mo ne mukaji muyampe, Loretta. Pano tufundijanga bantu amba Bible ubwanya kwibakwasha.

 Kupityila ku Bible, namwene tata washinta mu muswelo onkyadipo mfwatakanya—ke mulume muyampe wa mama kadi ke mwine Kidishitu mwityepeje, usenswe ndoe. Potwetene nandi ami kendi Kamoni wa Yehova mubatyijibwe mu 1987, tata waumpamba bīpa musunsa mubajinji mu bwami būmi!

 Ba tata ne mama baingidile pamo, basapwila bakwabo lukulupilo lwa mu Bible mu bula bwa myaka 35 ne kupita. Waikele muntu mukankamane kadi utele bantu mutyima, obadi bayukile bu muntu ukwasha bakwabo. Mu ino myaka yonso’i, nefundile kumulēmeka ne kumusanswa. Nadi kenetembe kwitwa bu wandi mwana! Wafwile mu 2016, inoko mulañanga bininge, koku ndyukile amba batwe bonso bubidi twashintyile bininge ngikadila yetu potwashilwile kwingidija bufundiji bwa mu Bible. Nkishelepo na kamushikwa nansha kamo. Kadi mfwijanga’ko bininge pa kusokola Tata wa mūlu, Yehova Leza, mwine ulaile kutalula’ko bintu byonso bisusula bisaka konsokonso.