Byamalwa bibwanya kufikila muntu yense. Bible unena’mba, “bantu ba lubilo kebawinangapo nyeke mu lubilo . . . myanda yampikwa kulaa bibafikilanga bonso.” (Musapudi 9:11) Bino binenwa bitala ne bankasampe badi bekonda na byamalwa. Le bebyuminine namani? Langulukila pa bino bimfwa bibidi.

•  REBEKAH

•  CORDELL

 Bambutwile bami belubwile nekidi na myaka 14.

 Nadi nanga mu mutyima’mba bambutwile bami kebabwanyapo kwilubula, ne amba tata wadi’tu usaka kwikala bunka mu kitatyi kampanda. Wadi usenswe mama, le wadi’tu wa kumuleka namani? Ne wadi’tu wa kundeka ne ami namani?

 Nadi nkomenwa kusapwila muntu byalongekele. Nkyadipo nsaka ne kulangulukila’po kwine. Nadi mulobe bininge nansha kyaba kimo byobyadi bikomo kujingulula. Kupwa nashilula kuzumbija mutyima, ne kukomenwa kulāla tulo.

 Mama wafwile na dyaya ami na myaka 19. Wadi mulunda nami wa bine.

 Shi kwilubula kwa bambutwile bami kwadi kusansa, lufu lwa mama lo lwine lwamvutakenye ñeni bininge. Ne pano nkyeivwene biyampe. Tulo ntunyemanga kadi zumbijanga’nka mutyima.

 Mu kine kitatyi’kya, namwene bintu bivule bya kunkwasha. Kimfwa, Nkindi 18:1 witudyumuna tuleke kwitolwela, ebiya nalonda ano madingi.

 Kadi, byondi Kamoni wa Yehova, noñanga bukomo bwa kutanga mabuku etu akankamika esambila pa Bible. Dibuku dimo dyaunkweshe pelubwile bambutwile bami i Les jeunes s’interrogent. Réponses pratiques. Mvuluka nakampata ponatangile shapita umo mu volime 2 unena’mba “Le Mbwanya Kwikala na Nsangaji mu Kisaka Kilelelwe na Mbutwile Umo?”

 Kisonekwa kya Mateo 6:25-34 i kisonekwa kyonsenswe, kinkwashanga kitatyi kyonzumbija mutyima. Yesu wāipangwile mu vese wa 27 amba: “I ani le pomudi’po ukokeja kubweja bula bwa kuboko a kumo ku būmi bwandi na kuzumbija mutyima?”

 Batwe bonso tukafikilwa na bintu bibi, ino nefundile ku kimfwa kya mama amba kintu kya kamweno i muswelo otūminina ano makambakano. Wasusukile bininge pa mwanda wa dilubu dyandi ne misongo yandi, ino walamine nyeke mumweno muyampe ne lwitabijo lwandi mudi Leza kufika ne ku mfulo. Nkikelwapo nansha dimo bintu byawamfundije padi Yehova.

 Languluka’po: Le i muswelo’ka ubwanya kukukwasha kutanga Bible ne mabuku esambila pa Bible amba ūminine byamalwa?​—Ñimbo ya Mitōto 94:19.

 Namwene tata utūla muya ponadi na myaka 17. Kufwa kwandi i kintu kibi mpata kyadi kekyamfikile kashā mu būmi. Ñeni yamvutakene bininge.

 Nadi mwene amba ke ayepo ufwile, ne amba ke ayepo udi mu shishibetyi yobaputyile ufwile. Nkeneneneja’mba, ‘usa kubuka kesha.’ Nemwene bu kudi kyombudilwe kadi mujimine.

 Ami ne kyami kisaka twi Batumoni ba Yehova, kadi kipwilo kyetu kyetukweshe bininge pafwile tata. Badi betupa bya kudya, betwita ku abo mobo kadi pabwipi netu​—ke enkapo ku ngalwilo, ino mu kitatyi kilampe. Kondi, bukwashi bwabo i kilomboji kilombola’mba Batumoni ba Yehova i bene Kidishitu ba bine.​—Yoano 13:35.

 Kisonekwa kyankankamikile bininge i kya 2 Bene Kodinda 4:17, 18. Kinena’mba: “Nansha kyamalwa byokidi kya lupito kadi kipēla, kitufikijanga ku ntumbo itabukile kulampe kwine bukata kadi ya nyeke; koku tubambīle meso sō ku bintu byampikwa kumweka, ke ku bintupo bimweka, aa. Mwanda bintu bimweka i bya lupito, ino bintu byampikwa kumweka i bya nyeke.”

 Vese wa 18 wampele bukomo. Masusu a tata adi a mu kitatyi kityetye, ino Leza i mulaye kuleta būmi bwa nyeke mu mafuku a kumeso. Lufu lwa tata lwaumpele mukenga wa kulangulukila pa monadi ngikadile mu būmi ne kushinta bitungo byami.

 Languluka’po: Le byamalwa bikufikile bibwanya kukukwasha namani ushinte bitungo byowitungile mu būmi?​—1 Yoano 2:17.