Le mpungiji keijengapo kukukwata? Shi i amo, kino kishinte kisa kukukwasha!

•  Bilengejanga’yo

•  Kyowikadile mwanda musumininwe

•  Byobwanya kulonga

•  Binena bakwenu

•   Kuvudilwa bya kulonga. Julie, nkasampe umo mwana-mukaji unena’mba “mu myanda yonso ya mu būmi,” betunenanga tulonge bintu senene, twilumbulule, twitungile bitungo bya peulu ne kulupula bipa biyampe. I bikomo kuningilwa kyaba kyonso uno muswelo!

•   Bya busendwe. Na matelefone, matabulete ne bingidilwa bikwabo, bantu babwanya kwisamba netu kintu kya mansá onso 24 nansha mafuku onso 7; kintu kibwanya kwituvutakanya ñeni ne kwitutwala ku mpungiji mwenda mafuku.

•   Kubulwa kulāla biyampe. Miranda, nkasampe umo mwana-mukaji unena’mba, “pa mwanda wa masomo, kaji ne kwipwija mukose, bankasampe bavule babūkanga lubanga bininge ne kulāla nsá ke mipite.” Kino kibidiji kitwalanga ku mpungiji.

 Bible utendelanga bantu bengila bininga. (Nkindi 6:6-8; Bene Loma 12:11) Inoko ke kunenapo amba i biyampe kwingila wailwa ne bintu bikwabo byonso bya mu būmi, kimfwa bukomo bwa ngitu.

 “Difuku dimo, natele mutyima bininge ku byonadi nonga nailwa’ko ne kudya kwine mu dine difuku’dya. Najingulula’mba ke biyampepo kwitabija bukidibukidi mwingilo o-onso. Nkifwaninwepo kutūla būmi bwami mu kyaka.”—Ashley.

 Bible udi na bubinga bwa kunenena’mba: “Mbwa mūmi i mupite ntambo mufwe.” (Musapudi 9:4) Shi wikankila’ko bininge, ubwanya kulanga’mba udi na bukomo na bwa ntambo, ino i mu kitatyi’tu kityetye. Kwipungija abe mwine kubwanya kukuletela bipa bilula mu bobe būmi.

•   Pela ne kupela. Bible unena’mba: “Tunangu tudi na boba batūkanye.” (Nkindi 11:2) Bantu batūkanye bayukile mikalo yabo kadi kebetabijangapo bintu byokebabwanyapo kulonga.

   “Yewa kadi bukola, witabijanga mingilo yonso yobamupa, ye aye keje kukwatwa na mpungiji. Kulonga namino i kubulwa butūkanye. Kakejepo kufikilwa na mpungiji.—Jordan.

•   Lāla biyampe. Bible unena’mba: “Kuboko kuyule kukōkolokwa i kupite buya maboko abidi mayule mingilo mikomo ne kupanga luvula.” (Musapudi 4:6) Betanga kulāla amba i “byakudya bya bongolo,” inoko bankasampe bavule basakilwa kulāla bufuku tamba mansá mwānda kutūla ku dikumi.

   “Ponashintyile mpangiko yami ya kulāla, nadi nkenkomemwa kulāla biyampe. Ino nadi nsakilwa kubweja’ko nsá imo ya kulāla pa kwingila biyampe difuku dilonda’ko ne kwikala na nsangaji.”—Brooklyn.

•   Ikala mwilongolole. Bible unena’mba: “Mpango ya muntu wa kininga bine ikendeka.” (Nkindi 21:5) Wifunde kulama kitatyi kyobe, nabya mingilo yoingila mu būmi bobe ikekala na kamweno.

   “Kukavutakanibwapo ñeni bininge shi upangika bintu. Shi udi na mpangiko pabwipi, ukapēlelwa kuyuka bintu bya kushinta kutyina wakatādilwa na mpungiji.”—Vanessa.