Langulukila pa ano madingi a kamweno emanine pa tunangu tudi mu Bible

1.   Ikala musumininwe. Ikala biyampe na bantu bomwingila nabo ne kwibalēmeka, ino leka kipwano kibwanya kwibalengeja balange amba ubwanya kwitabija shi abakusake.—Mateo 10:16; Bene Kolose 4:6.

2.   Vwala na butūkanye. Kuvwala bisandi bilangula bantu bilokoloko kukebalengeja bekale na milangwe mibi. Bible witusoñanya tuvwale “na butūkanye ne ñeni mibwane.”—1 Temote 2:9.

3.   Tonga balunda na tunangu. Shi upityija kitatyi na bantu bamwene amba kwiselembeja ne kwisaka ke kubipo, babwanya padi kukulonga’byo ne abe.—Nkindi 13:20.

4.   Leka binenwa bya mutonko. Shi abashilula kwisamba “mīsambo ya bulembakane nansha mizaulo ya kiboja,” taluka’po.—Bene Efisesa 5:4.

5.   Leka kwitūla mu kyaka. Kimfwa, dyumuka shi abakunena pampikwa bubinga bupotoloke kushala ku kaji pa kupwa kwa kaji.—Nkindi 22:3.

6.   Ikala musumininwe kadi nena patōkelela. Shi muntu usaka kulāle nobe, mulombole patōkelela’mba kusangedilepo ngikadila yandi. (1 Bene Kodinda 14:9) Kimfwa ubwanya kumunena’mba: “Unteñanga’nka kuntenga, kebisangajangapo. Leka’byo tamba dyalelo.” Ubwanya kumulembela mwanda wa kumushintulwila bintu byalongekele, moweivwanine, ne byomusakila alonge musunsa mukwabo. Mulombole patōkelela’mba kusakilepo pa mwanda wa misoñanya yobe ya mu mwikadilo ne nkulupilo yobe ya bwine Kidishitu.—1 Bene Tesalonika 4:3-5.

7.   Lomba bukwashi. Shi bendelela kukusaka, lombola’mo mulunda okulupile, muntu wa mu kisaka, omwingilanga nandi nansha muntu udi na bwino bwa kukwasha boba bobasaka kulāla babo. (Nkindi 27:9) Bantu bavule bobasakanga kulāla nabo bakwashibwanga na milombelo. Nansha shi kwalombēle kashā, kokapēlula bukwashi bubwanya kukukwasha Yehova, “Leza wa kusenga konso.”—2 Bene Kodinda 1:3.

 Kwisaka ku kaji, kulengejanga bantu midiyo ne midiyo balange amba ku kaji i kifuko kibi, inoko Bible ubwanya kukukwasha.