Kwikala ujila i kutūlwa kulampe na bintu bya disubi. Kishima kya Kihebelu kyalamwinwe bu “ujila” i kitambe ku kishima kishintulula “kusansana.” Mu uno muswelo, kintu kijila i kisansanibwe na kyokya kivudile kwingidijibwa, kintu kimonwa bu kikola, nakampata pa mwanda wa butōki ne kubulwa disubi kwakyo.

 Leza i ujila kutabuka. Bible unena’mba: “Kekudipo nansha umo ujila pamo bwa Yehova.” a (1 Samwele 2:2) Nanshi Leza udi na lupusa lwa kutūla’ko misoñanya ya kulonda mu mwanda utala buujila.

 Kishima “ujila” kibwanya kwingidijibwa ku kintu kyo-kyonso kikwatañene bininge na Leza, nakampata bintu bitūdilwe pafula bya kwingidija’nka mu butōtyi. Kimfwa Bible utela:

•   Bifuko bijila: Leza wāsapwidile Mosesa wādi kubwipi na kimuna kitēma’mba: “Pa kifuko poimene’po i pa nshi ijila.”—Divilu 3:2-5.

•   Binkumenkume bijila: Bene Isalela wa kala bādi batōta Yehova ku masobo a bwine Leza etwa bu “bitango bijila.”—Bene Levi 23:37.

•   Bintu bijila: Bintu byādi bingidijibwa mu butōtyi bwa Leza ku tempelo ya kala ya mu Yelusalema byādi bitwa bu “bipungwa . . . Bijila.” (1 Balopwe 8:4) Bino bintu bikola byādi bifwaninwe kulēmekwa bininge, nansha byokebyādipo bifwaninwe kutōtwa. b

 En-en. Leza usoñanya bene Kidishitu amba: “Mufwaninwe kwikala bajila, mwanda amiwa ne ujila.” (1 Petelo 1:16) Shako, bantu bampikwa kubwaninina kebabwanyapo nansha dimo kufikila pa misoñanya mibwaninine ya Leza itala buujila. Inoko, bantu bakōkela bijila byoloke bya Leza babwanya kumonwa bu ‘bajila kadi betabijibwe na Leza.’ (Bene Loma 12:1) Kwikankila’ko kwa muntu ukimba kwikala ujila kumwekanga mu binenwa ne bilongwa byandi. Kimfwa, ulondanga madingi a mu Bible a kwikala “[ujila] ne kwilama ku busekese,” ne a ‘kwikala ujila mu mwikadilo wandi onso.’—1 Bene Tesalonika 4:3; 1 Petelo 1:15.

 En-en. Shi muntu kakilēmekelepo misoñanya ya Leza ya mwa kwikadila, Leza kakamumonepo monka bu ujila. Kimfwa, nansha mukanda wa mu Bible wa Bahebelu byowisambila pa “banabetu bajila,” inoko wibadyumuna baleke kutamija “mutyima mubi wa kubulwa lwitabijo na kubomboka kudi Leza mūmi.”—Bahebelu 3:1, 12.

 Mulangwe wa bubela: Bukunga bukwashanga muntu bininge ekale ujila.

 Bubine: Nansha mwine Kidishitu byabwanya kutonga kuleka kusonga nansha kusongwa, ino bukunga kebulengejangapo muntu ekale ujila ku meso a Leza. Shako bankunga babwanya kuta mutyima ku butōtyi pampikwa kulabikwa. (1 Bene Kodinda 7:32-34) Inoko, Bible ulombola’mba boba besongele nabo babwanya kwikala bajila. Na bubine mutumibwa umo bidi wa Yesu, Petelo, wādi na mukaji.—Mateo 8:14; 1 Bene Kodinda 9:5.