Bible witupeleja kwelwa mashi. O mwanda ketufwaninwepo kwitabija mashi matuntulu nansha bipindi byao bikatampe mu muswelo o-onso, a kudya nansha a kwelwa mu mijilo. Tala bino bisonekwa:

•   Ngalwilo 9:4. Leza wālekele Noa ne kyandi kisaka babweje mwita wa nyema ku mulongo wa bya kudya pa kupwa kwa dilobe, ino wēbasoñanya baleke kudya mashi. Leza wāsapwidile Noa amba: “Ino enka mwita ne būmi bwao—ke mashi ao kadi—kemufwaninwepo kudya’o.” Uno musoñanya utala bantu bonso kushilwila mu kine kitatyi’kya kufika ne dyalelo, mwanda bonso i batambe kudi Noa.

•   Bene Levi 17:14. “Kemufwaninwepo kudya mashi a ngitu ya muswelo o-onso, ke-pantu būmi bwa ngitu ya muswelo o-onso i mashi ayo. Muntu ense udya’o ukatyibwa’ko.” Leza wādi umwene amba muya, nansha būmi bidi mu mashi ne amba i byandi. Nansha bijila byandi byobyāpelwe’nka muzo wa Isalela, ino bilombola muswelo umona Leza kudya mashi.

•   Bilongwa 15:20. ‘Mwilamei ku mashi.’ Leza i mupe bene Kidishitu musoñya umo onka na waāpele Noa. Mānga ilombola’mba bene Kidishitu babajinji bāpelele kudya mashi nansha kwiengidija pa bubinga bwa bundapi.

Mwanda waka Leza witusoñanya twilame ku mashi?

 Kudi bubinga bwendele’mo bwa kiñanga bwa kupelela kwelwa mashi. Inoko kintu kya mvubu i kino, Leza witusoñanya twilame ku mashi mwanda elekeja kintu kikola ku meso andi.—Bene Levi 17:11; Bene Kolose 1:20.