Mu Bible kemudipo bulombodi bwisambila pa kusōka umbidi wa muntu mufwe. I mutupu musoñanya nansha umo utala pa kujīkwa nansha kusōkwa kwa umbidi wa muntu mufwe.

 Bible utela bimfwa bya bengidi ba Leza ba kikōkeji bājīkile bantu babo bafwe. Kimfwa, Abalahama wālongele bukomo bwa kukimba kifuko kiyampe kya kujīka’mo wandi mukaji, Sala.—Ngalwilo 23:2-20; 49:29-32.

 Bible wisambila ne pa bantu ba kikōkeji bāsōkele imbidi ya bantu bafwe. Kimfwa, pobāipale Solo mulopwe wa Isalela ne bandi bana basatu mu divita, imbidi yabo yāshele bidi mu ntanda ya ba lwana mobadi beimwene bu keidipo na mvubu. Pa kwivwana’o, basola ba kikōkeji bene Isalela bakasela umbidi wa Solo ne ya bandi bana, beisōka, kupwa bājīka mikupa yāshele’ko. (1 Samwele 31:8-13) Bible ulombola’mba kulonga namino kwādi kwitabijibwe.—2 Samwele 2:4-6.

 Milangwe ya bubela: Kusōka umbidi wa muntu mufwe kukalengeja Leza aleke kumusangula.

 Bubine: Mu mwanda utala kusangula bafwe, kujīkwa kwa umbidi, kusōkwa, kujimina pa dijiba, nansha kudibwa na banyema ba ntanda kekudipo na mwanda ku meso a Leza. (Kusokwelwa 20:13) Mwinē Bukomo Bonso ubwanya kupangulula umbidi wa muntu.—1 Bene Kodinda 15:35, 38.