Masobo a Pasaka keadipo mu Bible. Inoko shi ukimbe kuyuka kwine koatambile, ukayuka mwine mushintulwila Pasaka—kishi kimanine pa bisela bya kala bya leza wa bumeni. Tulangulukilei bidi pa bino bintu.

1.   Dijina: Dibuku dimo (The Encyclopædia Britannica) dinena’mba: “Kishima kya Angele kyalamwinwe bu Pasaka kekiyukenepo kokitambile; dibuku (the Anglo-Saxon priest Venerable Bede) dya mu myaka katwa ka mwānda dinena’mba dino dijina i ditambe kudi Eostre, leza mukaji wa muketeko wa mu Anglo-Saxion.” Dibuku dikwabo dinena’mba i dijina ditambile kudi Astarte, leza mukaji wa bumeni wa bene Fenisea udingakene na Ishitala leza wa bene Babiloni.

2.   Tululu: Bino byelekejo bya bumeni i “bitambe ku bisela bya pa kala ne ku byelekejo bya mafetyi a bajentaila a muketeko, ādi alongwa mu Bulaya ne mu Moyen-orient.”—Encyclopædia Britannica.

3.   Mai: Dibuku dimo (Funk & Wagnalls Standard Dictionary of Folklore, Mythology and Legend) dinena’mba, buluwe bwa kukimba mai a Pasaka, obādi bamona bu ādi elwa na kalulu ka Pasaka, “ke makayopo a bana, ino kyadi kisela kitumbe kya leza wa bumeni.” Mu bibidiji bimo bantu bādi bakulupile amba mai mapente a Pasaka “ādi abwanya kuleta mu muswelo wa maleñanya nsangaji, bupeta, bukomo bwa ngitu, ne bulami.”—Traditional Festivals.

4.   Bisandi bipya: “Bantu bādi bamona bu kwimuna Eastre, leza mukaji wa Muketeko wa mu Scandinavie abe papo kuvwala bisandi bipya mpika, i kubulwa bulēme ne kwiletela byamalwa.”​—The Giant Book of Superstitions.

5.   Mingilo ya ku kutamba kwa dyuba: Ino mingilo yādi ikwatañene na bisela byādi bilondwa pa kala na batōtyi ba leza dyuba “mu kitatyi kya ku muketeko wa mvula, mwanda wa kutundaila dyuba ne bukomo bodidi nadyo bwa kupa bintu byonso bimena būmi.”—Celebrations—The Complete Book of American Holidays.

 Dibuku dimo (The American Book of Days) dilombola biyampe kwine kutambile Pasaka amba: “Ne kutatana kwine mpika, kipwilo pokyādi kikishimikwashimikwa kyāitabije bibidiji bya bajentaila ne kwibipa nshintulwilo ya bwine kidishitu.”

 Bible upeleja kutōta Leza na kulonda bishi nansha bisela bimufītyija mutyima. (Mako 7:6-8) Kisonekwa kya 2 Bene Kodinda 6:7 kinena’mba: “‘Tambai mu bukata mwabo, ne kwisansanya,’ i Yehova unena, ‘kadi lekai kutenga kintu kya disubi.’” Pasaka i fetyi ya bajetaila, ipelwanga na boba basaka kusangaja Leza.