Bantu bengidijanga bufundiji bwa Yesu Kidishitu mwanda wa kushimika bipwilo bivule bya “bwine Kidishitu.” Inoko, Bible ulombola’mba kudi’tu bwine Kidishitu bumo kete bwa bine. Tala’tu bidi bubinga busatu botwanenena namino.

1.   Yesu wānenene amba wāfundije “bubine,” kadi bene Kidishitu ba mu myaka katwa kabajinji nabo bāityile mutōtelo wabo bu “bubine.” (Yoano 8:32; 2 Petelo 2:2; 2 Yoano 4; 3 Yoano 3) Bino binenwa bilombola’mba, boba bafundija bintu kebikwatañenepo na bufundiji bwa Yesu kebadipo mu bwine Kidishitu bwa bine.

2.   Bible ufundija’mba bene Kidishitu ‘bafwaninwe kunena abo bonso bimo.’ (1 Bene Kodinda 1:10) Inoko, bipwilo bivule bya bwine Kidishitu kebifundijangapo bufundiji bwa muswelo umo pa mushintulwila kwikala mwine Kidishitu. Bino bipwilo kebibwanyapo kwikala byonso bya bine.​—1 Petelo 2:21.

3.   Yesu wālaile amba bantu bavule baketela bu bene Kidishitu, ino kebakalondapo misoñanya yandi kadi nandi ukebapela. (Mateo 7:21-23; Luka 6:46) Bantu bamo bādi bakongolwa na bendeji ba bipwilo bona mutōtelo wa bine mwanda wa tumweno twabo. (Mateo 7:15) Inoko, bakwabo nabo bādi’tu ba kusaka kwivwana bantu betela bu bene Kidishitu bebalombola bintu byobasaka kwivwana kupita’ko bubine budi mu Bible.​—2 Temote 4:3, 4.

 Mu kyelekejo kyandi kya ñano ne biyombo bityani, Yesu wālaile amba kukela butomboki (bupondo) mu bwine Kidishitu bwa bine. (Mateo 13:24-30, 36-43) Byādi bya kwikala bikomo kuyuka bene Kidishitu ba bine ne bene Kidishitu ba bubela mu kitatyi kilampe. Monka mwālaile’kyo Yesu, bupondo bwāsambakene pāfwile batumibwa. (Bilongwa 20:29, 30) Bufundiji bwa batupondo pobwenda bushinta, bipwilo palapala bya bwine Kidishitu nabyo byenda ‘bisāsuka mu bubine.’​—2 Temote 2:18.

 Kadi Yesu wālaile amba ku mfulo, bene Kidishitu ba bine ne ba bubela bakayukana. Kino i kimweke mu kino kyetu kitatyi, kya “mvuyo ya ngikadilo ya bintu.”​—Mateo 13:30, 39.