Bupolofeto i musapu uletelwe na Leza ku bukomo bwa mushiditu, kusokwelwa kwa Leza. Bible unena’mba bapolofeto “besambile bya kwa Leza monka mobadi baludikilwa na mushipiditu ujila.” (2 Petelo 1:20, 21) Nanshi mupolofeto i muntu utambula musapu wa Leza ne kulombola’o bakwabo.​—Bilongwa 3:18.

Le bapolofeto bādi batambula myanda kudi Leza namani?

 Leza wādi wingidija manwa mavule pa kulombola bapolofeto bandi milangwe yandi:

•   Bilembwa. Leza wāingidije ano manwa musunsa mubajinji, wāpa Mosesa Mbila Dikumi milembe.​—Divilu 31:18.

•   Kwisamba kupityila ku bamwikeulu. Kimfwa, Leza wāingidije mwikeulu ukalombole Mosesa musapu waādi wa kusapwila Felo wa Edipito. (Divilu 3:2-4, 10) Ponso pobyādi bilomba kuta mutyima ku bishima, Leza wādi unena bamwikeulu banene musapu wandi, na mwaālongēle paāsapwidile Mosesa amba: “Lemba ino myanda ino’i, mwanda mungya ino myanda ino’i, nasamba kipwano nobe ne na Isalela.”​—Divilu 34:27. a

•   Bimonwa. Kyaba kimo bino bimonwa byādi bipebwa mupolofeto, utala kadi uyukile bipita. (Isaya 1:1; Habakuka 1:1) Bimo byādi pamo bwa bintu bilongeka, ne mwine wādi wibimona nandi ulunga’ko kuboko. (Luka 9:28-36; Kusokwelwa 1:10-17) Kyaba kikwaba nakyo, yewa wādi umona bimonwa kādipo uyuka bipita. (Bilongwa 10:10, 11; 22:17-21) Kadi Leza wādi upa mupolofeto musapu wandi kupityila ku bilotwa aye papo ulēle.​—Danyele 7:1; Bilongwa 16:9, 10.

•   Kuludikwa na milangwe. Leza wāludikile milangwe ya bapolofeto bandi amba balete musapu wandi. Ye mushintulwila’kyo ne Bible panena’mba: “Kisonekwa kyonso i kisonekejibwe na mushipiditu wa Leza.” Musemwa “na mushipiditu wa Leza” ubwanya ne kwalamunwa’mba na “umpuya wa Leza.” (2 Temote 3:16; The Emphasised Bible) Leza wāingidije mushipiditu wandi ujila, nansha bukomo bwingila, ‘wapujija’ milangwe yandi mu ñeni ya bengidi bandi. Musapu wādi wa Leza, ino mupolofeto wātonga bishima. (2 Samwele 23:1, 2)

Lelo bupolofeto i kulaya’nka bintu bya kumeso?

 Aa, bupolofeto bwa Bible kebwimaninepo’nka pa kulaya bintu bya kumeso. Inoko misapu mivule itamba kudi Leza italanga pa kitatyi kya kumeso, nansha shi ke ya patōkelelapo. Kimfwa, bapolofeto ba Leza bādi badyumuna’nka kudyumuna bene Isalela ba pa kala ku mashinda abo mabi. Mu bino bidyumu bālombwele’mo madyese obādi ba kweselwe shi bantu bēbilondele, ne kimpengele kyādi kya kwibafikila shi bāpelele kwibilonda. (Yelemia 25:4-6) Būmi bwa kumeso bwa bene Isalela bwādi bwimanine pa butyibi bobādi ba kukwata.​—Kupituluka mu Bijila 30:19, 20.

Bimfwa bya bupolofeto bwa Bible kebwālailepo bya kumeso

•   Difuku dimo, bene Isalela pobālombele Leza ebakwashe, wēbatumīne mupolofeto ebashintulwile amba kasapo kwibakwasha mwanda bāpelele kukōkela mbila ya Leza.​—Batyibi 6:6-10.

•   Pādi pesamba Yesu na mwana-mukaji mwine Samadia, wālombwele patōka bintu byaālongele pa kala ne amba wēbiyukile mwanda Leza wāmusokwedile’byo. Uno mwana-mukaji wāyukile amba i mupolofeto nansha Yesu byākalailepo bintu bya kumeso.​—Yoano 4:17-19.

•   Pobātompele Yesu, balwana nandi bāmupūtyile mu mpala, bāmukupila, kupwa bāmunena’mba: “Polofeta! Le i ani wakukupila?” Kebādipo banena Yesu alaye bya kumeso, ino ajingulule na bukomo bwa Leza mwine wamukupila i ani.​—Luka 22:63, 64.