Bible katelelepo patōkelela banyema betwa bu dinosaures. Inoko Bible unena’mba Leza “wapangile bintu byonso,” o mwanda i bimweke patōka’mba bano banyema nabo babadilwa mu bintu byapangile. a (Kusokwelwa 4:11) Nansha Bible byakatelelepo banyema betwa bu dinosaures patōkelela, inoko wisambila pa bibumbo bya bipangwa mobakokeja kubadilwa:

•   “Bipangwa bikatampe bya lui” nansha “bibanyema.”—Ngalwilo 1:21.

•   “Byonso bilandala pa nshi.”—Ngalwilo 1:25.

•   “Banyema ba ntanda ba pano panshi.”—Ngalwilo 1:25.

Lelo banyema betwa bu dinosaures bātambile ku banyema bakwabo?

 Banyema betwa bu dinosaures bāmwekele mu kitulumukila mu bintu bya kishiyekulu, pa kyaba kya kumweka bityetye pamo bwa abo batamba ku kwialamuna. Kino kikwatañenne na binenwa bya mu Bible bilombola’mba Leza wāpangile banyema bonso. Kimfwa, kisonekwa kya Ñimbo ya Mitōto 146:6 kitela Leza bu “Mulongi wa diulu ne ntanda, dijiba, ne byonso bidi’mo.”

Le banyema betwa bu dinosaures bāikele’ko kitatyi’ka?

 Bible unena’mba banyema ba mu mema ne ba pa ntanda bāpangilwe mu difuku dya butano ne dya busamba, nansha bitatyi bya bupangi. b (Ngalwilo 1:20-25, 31) Mu uno muswelo, Bible witulengeja tulange amba banyema betwa bu dinosaures bamwekele ne kwikala’ko mu bula bwa kitatyi kilampe.

Le ba Behemote ne Leviatane bādi banyema betwa bu dinosaures?

 Aa. Nansha byoketubwanyapo kuyuka biyampe bano banyema batelelwe mu mukanda wa Yoba, divule dine Behemote utelwanga bu kyovwe, Leviatane nandi bu ñwena (ñandu). Kwibatela namino kukwatañene na byobya binena Bisonekwa. (Yoba 40:15-23; 41:1, 14-17, 31) Nansha bikale namani, kishima “Behemote” ne kishima “Leviatane” kebibwanyapo kufunkila pa banyema betwa bu dinosaures. Leza wāsapwidile Yoba atale bano banyema, kadi Yoba wāikele’ko kitayi kilampe kufika ne byapwile kujimankana bano banyema.—Yoba 40:16; 41:8.

Le i bika byāfikīle banyema betwa bu dinosaures?

 Bible kesambīlepo pa kujimankana kwa bano banyema. Ino unena’tu amba bintu byonso byāpangilwe “mwanda wa kiswa-mutyima [kya Leza],” nanshi Leza wāpangile bano banyama na kitungo kampanda. (Kusokwelwa 4:11) Pāfikidile kino kitungo, Leza wāleka bano banyema bajimankane.