Kijila kya “diso ku diso” kyādi mu Bijila bya Leza byobāpele Isalela waka kudi Mosesa, kadi kyāpitulukilwe’mo na Yesu mu Busapudi bwandi bwa ku Lūlu. (Mateo 5:38; Divilu 21:24, 25; Kupituluka mu Bijila 19:21) Kishintulula’mba pa kutyibila banonga-bibi mambo, muntu wādi ufwaninwe kupebwa mfuto ikwatañene na kilubo kyandi. a

 Kijila kyādi kingidijibwa shi muntu wasanshija mukwabo ku kusaka. Mosesa wānenene pa mwanda utala yewa ulubile ku kusaka’mba: “Kityumuke pa kityumuke, diso ku diso, dino ku dino, ukalemekwa monka mwaalemekañena.”​—Bene Levi 24:20.

•  Le kijila kya “diso ku diso” kyādi na kitungo’ka?

•  Le kijila kya “diso ku diso” kitala ne bene Kidishitu?

•  Milangwe mifwe pa kijila kya “diso ku diso”

•  Yesu walemununa milangwe mifwe

 Kijila kya “diso ku diso” kekyādipo kipa muntu lupusa lwa kwaluja kinongo aye mwine. Ino kyādi kikwasha batyibi batongwe, bapāne mfuto mifwaninwe, pampikwa kasumalomo nansha kilomonyeka.

 Kadi kyādi kikwasha muntu ukanina kusanshija bakwabo ku kusaka aleke kulonga kibi. Bijila binena’mba: “Boba bashele’ko bakevwana ne kukwatwa moyo, kadi kebakalongapo monka kibi bwa kino’ki mu bukata mobe.”​—Kupituluka mu Bijila 19:20.

 Mhm, bene Kidishitu kebakutyilwepo na kino kijila. Kyādi mu Bijila bya Mosesa, bine byātalwilwe’ko na lufu lwa Yesu lwa bu kitapwa.​—Bene Loma 10:4.

 Inoko, kino kijila kitukwasha twivwanije senene mulangilo wa Leza. Kimfwa, akyo kilombola’mba Leza usenswe boloke. (Ñimbo ya Mitōto 89:14) Kadi kilombola misoñanya yandi myoloke, kimfwa musoñanya wa amba banonga-bibi bafwaninwe kulemununwa “mobyendele.”​—Yelemia 30:11.

 Milangwe mifwe: Kijila kya “diso ku diso” kyālengeje bantu bendelele kwialwija kinongo.

 Bubine: Bijila bya Mosesa binena’mba: “Kufwaninwepo kulubula kinongo nansha kulamina bana ba bantu bobe kīji.” (Bene Levi 19:18) Pa kyaba kya kulengeja bantu bealwije kinongo, Bijila byēbakankamikile bakulupile mudi Leza ne mu bidye byātūdilwe’ko mwanda wa kupwa bintu bibi.​—Kupituluka mu Bijila 32:35.