Bible kesambīlepo patōkelela pa kwipaya muntu walomba kwipaibwa. a Inoko unena na bujalale myanda itala būmi ne lufu. Kwipaya muntu kekwitabijibwepo, inoko i kutupu musoñanya ulomba kulepeja būmi bwa muntu kitatyi kyasaka kufwa.

 Bible unena’mba Leza i Umpangi wetu, “nsulo ya būmi.” (Ñimbo ya Mitōto 36:9; Bilongwa 17:28) Ku meso a Leza, būmi i bulēme bininge. O mwanda Leza upeleja kwipaya muntu nansha kwiipaya. (Divilu 20:13; 1 Yoano 3:15) Ne kadi, Bible ulombola’mba tufwaninwe kwitūdila’ko mpangiko myendele’mo ya kukinga būmi bwetu ne būmi bwa bakwetu. (Kupituluka mu Bijila 22:8) Na bubine, Leza usakanga tukwate na bulēme kyabuntu kya būmi.

Le bikekala namani shi yewa ubela kadi kubwipi na lufu?

 Bible ketabijepo kwipaya muntu nansha shi muntu’wa lufu lubamufwena ne kekukidipo mwa kulongela. Kimfwa kya Mulopwe Solo kibingija uno mwanda. Pobāmutapile bya lufu mu divita, wānenene mwingidi wandi amwipaye. (1 Samwele 31:3, 4) Mwingidi wa Solo wāpela. Inoko mwenda mafuku mwingidi mukwabo wānena bya bubela’mba waipaya solo. Uno muntu wālambikilwe mambo a mashi na Davida, mwine wādi na mumweno wa Leza pa uno mwanda utala kwipaya muntu.—2 Samwele 1:6-16.

Le būmi bufwaninwe’nka kulepejibwa?

 Shi lufu lubafwena bininge, Bible kasoñenyepo kulepeja’ko būmi. Ino Bible uleta mulangwe na bujalale. Lufu i walwana netu mukatampe, kipa kilula kitambile ku bubi bwetu. (Bene Loma 5:12; 1 Bene Kodinda 15:26) Ketufwaninwepo kusaka kufwa, ino kadi ketufwaninwepo kutyina lufu, mwanda Leza i mulaye kusangula boba bafwa. (Yoano 6:39, 40) Muntu ulēmekele būmi ufwaninwe kukimba mundapilo muyampe. Inoko kulonga namino kekulombepo kutonga mundapilo wa kulepeja’ko kitatyi kya kufwa shi lufu lubafwena.

Le kwiipaya i bubi kebulekelwapo?

 Aa, Bible katelelepo kwiipaya mu mulongo wa bubi kebulekelwapo. Nansha kwipaya muntu byobudi bubi bukatampe, b Leza wivwanijanga bintu pamo bwa misongo ya mu ñeni, kuvutakanibwa ñeni bipitepite, nansha ne myanda ya nsange ya kwipyana, bibwanya kulengeja muntu eipaye. (Ñimbo ya Mitōto 103:13, 14) Aye useñanga ba mityima minyoñame kupityila ku Bible. Ne kadi, Bible unena’mba kukekalanga “lusangukilo lwa boloke ne bakondame bene kumo.” (Bilongwa 24:15) Kino kilombola’mba kudi lukulupilo lwa kusangula bantu bālongele bilubo bikatampe, kimfwa bya kwiipaya.