I kutupu muntu ke mumone Leza buntu-ntala. (Divilu 33:20; Yoano 1:18; 1 Yoano 4:12) Bible unena’mba “Leza i Mushipiditu,” būmi kebubwanyapo kumonwa na meso a bantu.​—Yoano 4:24; 1 Temote 1:17.

 Inoko Leza ubwanya kumonwa na bamwikeulu, mwanda i bipangwa bya ku mushipiditu. (Mateo 18:10) Ne kadi, bantu bamo bafwile bakasangwilwa momwa mūlu na imbidi ya ku mushipiditu kadi bakabwanya kumona Leza.​—Bene Fidipai 3:20, 21; 1 Yoano 3:2.

 Divule dine Bible wisambilanga pa kumona mu muswelo wa kyelekejo, mwanda wa kulombola bukomo bwa kwivwanija bintu. (Isaya 6:10; Yelemia 5:21; Yoano 9:39-41) Mu uno muswelo, muntu ubwanya kumona Leza dyalelo na “meso a mutyima [wandi].” Pa kino i biyampe kwikala na lwitabijo lwa kukwasha muntu ayuke ngikadila yandi ne kwiisangela. (Bene Efisesa 1:18) Bible ulombola bintu bya kulonga pa kwikala na luno lwitabijo.

•   Wifunde ngikadila ya Leza, kimfwa buswe, buntu, tunangu ne bukomo bwandi kupityila ku bupangi bwandi. (Bene Loma 1:20) Yoba, muntu wa kikōkeji pa kupwa kuvuluka mingilo ya Leza ya bupangi, wēivwene pamo bwa Leza wādi ku meso andi.​—Yoba 42:5.

•   Yuka Leza kupityila ku kwifunda Bible. Bible witukulupija’mba: “Shi umukimbe [Leza], aye ukesokwela kodi.”​—1 Bilongwa bya Mafuku 28:9; Ñimbo ya Mitōto 119:2; Yoano 17:3.

•   Wifunde kuyuka Leza kupityila ku būmi bwa Yesu. Yesu byaāmwekeje ngikadila ya Shandi Yehova Leza mu muswelo mubwaninine, wādi na bubinga bwa kunenena’mba: “Yewa ense umona ami wamone ne Tata mwine.”​—Yoano 14:9.

•   Wiendeja mu muselo usangaja Leza, kadi mona muswelo wakulongela bintu biyampe. Yesu wānenene amba: “Ba nsangaji i ba mutyima utōka tō, mwanda bakamonanga Leza.” Monka motwanenenanga kala, bantu bamo basangaja Leza bakasangwilwa momwa mūlu kadi ‘bakamona’mo Leza.’​—Mateo 5:8; Ñimbo ya Mitōto 11:7.

 Mu nsekununi mubwanya kumonwa’mba, Bible unena’mba bantu bāmwene Leza buntu-ntala, inoko myanda idi kūlu ne kunshi ilombola’mba mwikeulu wāikele mukendi wa Leza nansha aye mwine kumweka mu kimonwa.

 Bamwikeulu.

Pa kala, Leza wādi utuma bamwikeulu bu mikendi yandi, yāmwekela bantu ne kwisamba mu dyandi dijina. (Ñimbo ya Mitōto 103:20) Kimfwa, Leza wēsambile na Mosesa mu kimuna kitema, kadi Bible unena’mba, “Mosesa wefya mpala yandi, mwanda wakwetwe moyo kutala kudi Leza wa bine.” (Divilu 3:4, 6) Inoko Mosesa kāmwenepo Leza buntu-ntala, mwanda myanda idi kūlu ne kunshi ilombola’mba aye wāmwene “mwikeulu wa Yehova.”​—Divilu 3:2.

 Mu muswelo umo onka, shi Bible unena’mba Leza “wesambile na Mosesa mpala na mpala,” ko kunena’mba Leza wēsambile na Mosesa bya bulunda. (Divilu 4:10, 11; 33:11) Na bubine, Mosesa kāmwenepo mpala ya Leza, myanda ya Leza yaāpelwe yāletelwe “kupityila kudi bamwikeulu.” (Bene Ngalatea 3:19; Bilongwa 7:53) Inoko lwitabijo lwa Mosesa mudi Leza lwādi lukomo, o mwanda Bible unena’mba wāmwene “Yewa wa kubulwa kumweka.”​—Bahebelu 11:27.

 Leza wēsambile na Abalahama kupityila ku bamwikeulu’nka na mwaēsambidile na Mosesa. Shako, kutanga Bible lubilolubilo kubwanya kuleta mulangwe wa amba Abalahama wāmwene Leza buntu-ntala. (Ngalwilo 18:1, 33) Inoko, myanda idi kūlu ne kunshi ilombola’mba “bantu basatu” bāile kudi Abalahama i bamwikeulu bātuminwe na Leza. Abalahama wāyukile amba i mikendi ya Leza ne kwisamba nabo bwa aye wisamba na Yehova aye mwine.​—Ngalwilo 18:2, 3, 22, 32; 19:1.

 Bimonwa.

Kadi Leza wāmwekēle bantu mu bimonwa, nansha bifwatulo bīya mu ñeni ya muntu. Kimfwa, kitatyi kinena Bible amba Mosesa ne bene Isalela bakwabo “bamwene Leza wa Isalela,” bine “bamwene kimonwa kya Leza wa bine.” (Divilu 24:9-11) Kadi, kyaba kimo Bible unena’mba bapolofeto ‘bāmwene Yehova.’ (Isaya 6:1; Danyele 7:9; Amose 9:1) Mu mwanda ne mwanda, myanda ya kūlu ne kunshi ilombola’mba bāmwene Leza mu kimonwa pa kyaba kya kumumona buntu-ntala.​—Isaya 1:1; Danyele 7:2; Amose 1:1.