‘Kunena mu ndimi’ i bukomo bwa mu kingelengele bwādi na bene Kidishitu bamo babajinji, bwebākweshe banene mu ndimi yokebādipo bayukile. (Bilongwa 10:46) Yewa wādi unena mu ludimi, bādi bamwivwana biyampe kudi muntu ense uyukile’lo. (Bilongwa 2:4-8) Kyabuntu kya kunena mu ndimi i kyabuntu kya mushipiditu ujila kyobāpele bene Kidishitu bamo ba mu myaka katwa kabajinji kudi Leza.—Bahebelu 2:4; 1 Bene Kodinda 12:4, 30.

•  Le i kwepi kwāshilwile kyabuntu kya kunena mu ndimi ne kitatyi’ka?

•  Le kyabuntu kya kunena mu ndimi kyādi na kitungo’ka?

•  Le kyabuntu kya kunena mu ndimi kyādi kya kwendelela nyeke?

•  Le kyabuntu kya kunena mu ndimi kyāpwile kitatyi’ka?

•  Le tufwaninwe kunena mu ndimi dyalelo?

•  Le bene Kidishitu ba bine babwanya kuyukena ku bika?

 Kino kingelengele kyālongekele dibajinji lubanga mu Yelusalema ku Masobo a Bayuda a Pentekosa mu mwaka wa 33 Yesu Ke Mwiye. Kintu kya bana ba bwanga ba Yesu 120 bādi bebungile pamo, “bonso bayulwa mushipiditu ujila kebesambe mu ndimi palapala.” (Bilongwa 1:15; 2:1-4) Kibumbo kikatampe kya bantu “batambile ku mizo yonso ya munshi mwa diulu” kyēbunga, kadi “muntu ne muntu wadi wibevwana banena mu ludimi lwandi.”—Bilongwa 2:5, 6.

1.   Kya kulombola’mba Leza ukwatakenye bene Kidishitu. Pa kala, Leza wādi ulonga bingelengele mwanda wa kulombola’mba ukwatakenye bantu ba kikōkeji, kimfwa Mosesa. (Divilu 4:1-9, 29-31; Umbadilo 17:10) Kunena mu ndimi nako kwādi na kino kitungo, kya kulombola’mba Leza wādi ukwatakenye kipwilo kya bwine Kidishitu kyādi kikishimikwashimikwa. Mutumibwa Polo wālembele amba: “Ndimi ke kiyukenopo ku boba betabije, ino i ku bampikwa kwitabija.”—1 Bene Kodinda 14:22.

2.   Kya kukwasha bene Kidishitu bapāne bukamoni ne pa mfulo. Boba bāivwene balondi ba Yesu mu difuku dya Pentekosa bānenene amba: “Tubebevwana besamba mu ndimi yetu bintu bikatampe bya Leza.” (Bilongwa 2:11) Nanshi, kitungo kikwabo kikatampe kya kino kingelengele kyādi kya kukwasha bene Kidishitu bapāne “bukamoni ne pa mfulo” ne kulonga “bana ba bwanga mu bantu ba ku mizo yonso,” enka na mwēbasoñaninye Yesu. (Bilongwa 10:42; Mateo 28:19) Kintu kya bantu 3000 bāmwene kino kingelengele ne kwivwana bukamoni bwāletelwe bāikala ke bana ba bwanga mu dine difuku’dya.—Bilongwa 2:41.

 Aa. Byabuntu bya mushipiditu ujila, kubandila’mo ne kya kunena mu ndimi, byādi bya lupito. Bible wālaile amba: “Shi kudi byabuntu bya bupolofeto, bikatalulwa’ko; shi kudi ndimi, ikapwa.”—1 Bene Kodinda 13:8.

 Divule dine byabuntu bya mushipiditu ujila byāpelwe ne bene Kidishitu bakwabo mu mafuku a batumibwa, pavule pene na batumibwa bādi batenteka banababo betabije makasa. (Bilongwa 8:18; 10:44-46) Bimweka’mba, boba bādi bapebwa byabuntu bya mushipiditu na batumibwa kebādipo nabo bāpa’byo bakwabo. (Bilongwa 8:5-7, 14-17) Kimfwa, shi muntu wa lupusa wape muntu mukanda wa bu shofele, uno muntu kapelwepo lupusa lwa kupa muntu mukwabo uno mukanda. Mobimwekela, kunena mu ndimi kwāpwile kitatyi kyāfwile batumibwa ne boba bobāpele abo bene kino kyabuntu.

 Kyabuntu kya mu kingelengele kya kunena mu ndimi kyāpwile dya ku mfulo kwa myaka katwa kabajinji Yesu Ke Mwiye. I kutupu muntu nansha umo dyalelo ubwanya kunena’mba unenanga mu ndimi na bukomo bwa Leza. a

 Yesu wānenene amba buswe bwa kwipāna bo bukayukilwa’po bandi bana ba bwanga. (Yoano 13:34, 35) Mutumibwa Polo nandi wāfundije amba buswe bo bukayukilwa’po nyeke bene Kidishitu ba bine. (1 Bene Kodinda 13:1, 8) Wālombwele amba mushipiditu wa Leza ukapa bene Kidishitu ngikadila itwa mu kikonge bu “kipa kya mushipiditu,” ne kadi ngikadila mibajinji’mo i buswe.—Bene Ngalatea 5:22, 23.