Bible kesambīlepo pa Halloween. Inoko, kwine kutambile Halloween ne bibidiji byayo bya dyalelo, bilombola’mba i fetyi ikwatañene na nkulupilo ya bubela itala pa lufu ne mishipiditu yampikwa kumweka, nansha bandemona.​—Tala  “Mānga ne bibidiji bya Halloween.”

 Bible udyumuna’mba: “Kekukatanwapo mobe muntu . . . wipangula babuka na bibanda . . . nansha wipangula bafwe.” (Kupituluka mu Bijila 18:10-12) Nansha bantu bamo byobamona Halloween bu makayo mayampe, ino Bible ulombola’mba bintu bilongwa’po i bibi. Bible unena mu 1 Bene Kodinda 10:20, 21 amba: “Nkisakilepo mwikale kwiabila na bandemona. Kemubwanyapo kutoma kitomeno kya Yehova ne kitomeno kya bandemona.”

 Mānga ne bibidiji bya Halloween

1.   Samhain: Tubwanya kunena’mba Halloween i mitambe ku “fetyi ya kala ya bajentaila yādi ifeta bene Bulaya bwa pa bukata pano kepadi myaka 2 000,” mungya The World Book Encyclopedia. “Bene Bulaya bwa pa bukata bādi bakulupile amba bafwe babwanya kunanga mu bantu bōmi mu kine kitatyi’kya. Mu kitatyi kya Samhain, bōmi nabo bādi babwanya kukapempula bafwe.” Ino Bible ufundija patōkelela’mba bafwe “kebayukilepo kintu nansha kimo” (Musapudi 9:5) Nanshi kebabwanyapo kwisamba na bōmi.

2.   Makotyi a pa Halloween, mabombo, ne byabuntu: Mungya dibuku Halloween—An American Holiday, An American History, bene bulaya bwa pa bukata bavule bādi bavwala bivwalwa bya kwiinanya na mulangwe wa kudimba mishipiditu mibi yādi ijokoloka ibamone bu i ba mu bukata mwabo ne kwibaleka talala. Bakwabo bādi bapa mishipiditu mabazoka mwanda wa kwibatalaja. Mu bulaya bwa pa bukata, mwendeji umo wa Katolika wālondele bibidiji bya bajentaila ba mu kyabo kibundi, watuma bana ba kipwilo ku njibo ne njibo bavwele makotyi, benda balomba tubyabuntu. Ino aye Bible ketabijepo kutyanga bilongwa bya bubela bya bipwilo na butōtyi botutōta Leza.​—2 Bene Kodinda 6:17.

3.   Bibanda, bamfwityi: Bino bipangwa bimonwanga tamba kala bu mishipiditu mibi ya ino ntanda. (Halloween Trivia) Bible unena patōkelela’mba tufwaninwe kulwa na mishipiditu mibi, ke kufetapo nayo.​—Bene Efisesa 6:12.

4.   Maolandi a Halloween: Mu myaka ya pa bukata, mu Beletanye “bantu ba lulombo badi benda ku njibo ne njibo balomba byakudya pa kupwa kulombelela bafwe, kadi badi bāsela matungulu mavokotole, mwādi buji bwelekeja mūya mushityilwe mu kikungilo.” (Halloween—From Pagan Ritual to Party Night) Bantu bamo banenanga’mba matungulu ādi engidijibwa mwanda wa kupangila mishipiditu mibi kulampe. Mu myaka ya 1 800 mu Amerika wa Kungala, bāpingakenye matungulu na maolandi mwanda ādi’ko mangi kadi apēla kubongotola nansha kuvokotola. Nkulupilo yādi ifyeme mu bino bibidiji—kubulwa kufwa kwa muya, kikungilo, ne kulombela bafwe, keidipo mu Bible.​—Ezekyele 18:4.