Le Kwiya kwa Kidishitu Kushintulula Bika?
Bilondolola Bible
Bisonekwa bitela misunsa dikumi ne kupita kitatyi kikāya Kidishitu kutyibila bantu mambo pano pa ntanda. a Kimfwa, Mateo 25:31-33 unena’mba:
“Pakāya Mwanā muntu mu ntumbo yandi, ne bamwikeulu bonso pamo nandi, ebiya ukashikata pa lupona lwandi lwa ntumbo. Mizo yonso ikakongakanibwa ku meso andi, penepo ukasansanya bantu, baba koku baba koku, pamo’nka na mukumbi usansanya mikōko mu bambuji. Ebiya ukatūla mikōko ku kuboko kwandi kwa lundyo, ino bambuji ku lunkuso lwandi.”
Kino kitatyi kya butyibi kikabadilwa mu “kyamalwa kikatampe” kekyamwekele kashā mu mānga ya muzo wa muntu. Kino kyamalwa kikafula na divita dya Amakedona. (Mateo 24:21; Kusokwelwa 16:16) Balwana na Kidishitu batelelwe bu bambuji mu kyelekejo kyandi, “bakapebwa mfuto ya konakanibwa kwa nyeke.” (2 Bene Tesalonika 1:9; Kusokwelwa 19:11, 15) Ino bengidi bandi ba kikōkeji bakekala na dyese dya kwikala na “būmi bwa nyeke.”—Mateo 25:46.
Le Kidishitu ukāya kitatyi’ka?
Yesu wānenene amba: “Pa mwanda wa dyodya difuku ne nsá mine, i kutupu nansha umo wibiyukile.” (Mateo 24:36, 42; 25:13) Inoko wātelele bintu bimweka bya mu “kiyukeno,” bikalombola’mba kitatyi kya kwiya kwandi kekisa kubwana.—Mateo 24:3, 7-14; Luka 21:10, 11.
Le Kidishitu ukāya na ngitu ya mushipiditu’ni nansha ya misunya?
Yesu wāsangukile na ngitu ya mushipiditu, o mwanda ukāya bu kipangwa kya ku mushipiditu, ke na ngitupo na misunya. (1 Bene Kodinda 15:45; 1 Petelo 3:18) Pa kino, Yesu wādi na bubinga bwa kusapwila batumibwa bandi difuku bukya ke lufu lwandi amba: “Kubashala kakitatyi katyetye’tu ino ntanda keikamonepo ami monka.”—Yoano 14:19.
Milangwe ya bubela idi na bantu bavule pa kwiya kwa Kidishitu
Milangwe ya bubela: Panena Bible amba bantu bakamonanga Yesu “wiya pa makumbi,” ko kunena’mba Yesu ukāya mumweke na meso.—Mateo 24:30.
Bubine: Divule dine Bible utelanga makumbi mwanda wa kwisambila pa kintu kyampikwa kumweka. (Bene Levi 16:2; Umbadilo 11:25; Kupituluka mu Bijila 33:26) Kimfwa, Leza wāsapwidile Mosesa amba: “Yao ngiya kodi mu dikumbi difīta.” (Divilu 19:9) Mosesa kāmwenepo Leza na meso. Kidishitu nandi ‘ukāya pa makumbi’ mu buluji bwa amba bantu bakayuka kwiya kwandi nansha byokebakabwanyapo kumumona na meso.
Milangwe ya bubela: Binenwa bya amba “meso onso akamumonanga,” byāingidijibwe mu Kusokwelwa 1:7 mwanda wa kwisambila pa kwiya kwa Kidishitu, bifwaninwe kwivwanikwa enka mobilembelwe.
Bubine: Kishima kya Kingidiki kyalamwinwe mu Bible bu “meso” ne ‘kumona’ kingidijibwanga kyaba kimo mu buluji bwa kujingulula nansha kuyuka pa kyaba kya kumona na meso. b (Mateo 13:15; Luka 19:42; Bene Loma 15:21; Bene Efisesa 1:18) Bible unena’mba Yesu musanguke “aye bunka . . . wikele mu kitōkeji kekifikika . . . kakokejapo kumonwa.” (1 Temote 6:16) Nanshi, “meso onso akamumonanga,” mu buluji bwa amba bantu bonso bakayuka’mba i Yesu waleta butyibi bwa Leza.—Mateo 24:30.
Milangwe ya bubela: Binenwa bidi mu 2 Yoano 7 bilombola’mba Yesu ukāya mu ngitu ya misunya.
Bubine: Uno vese wa mu Bible unena’mba: “Bañongojani bangi mu ino ntanda, boba bapela kwitabija’mba Yesu Kidishitu waile mu ngitu.”
Mu mafuku a mutumibwa Yoano, bantu bamo bādi bapatanya’mba kāilepo pano pa nshi bu muntu wa ngitu ya misunya. Bādi bebeta bu bantu bapela myanda ya Leza (Gnostiques). 2 Yoano 7 wālembelwe mwanda wa kupela byobādi banena.
Tala'po Bidi ne Bino:
KITEBA KYA MULAMI
Malondololo ku Bipangujo Bimanine pa Bible
BIPANGUJO BYA MU BIBLE BILONDOLWELWE
Le Divita dya Amaketona I Bika?
Kishima Amakedona kitanwa musunsa umo kete mu Bible, inoko divita dine i dīsambilwe’po mu Bisonekwa.
BIPANGUJO BYA MU BIBLE BILONDOLWELWE
Le Kyamalwa Kikatampe I Bika?
Bobwa bwitwa bu ‘bupolofeto bwa mu bitatyi bya ku mfulo’ bufunkila pa kitatyi kilampe kya makambakano a muzo wa muntu. Le i bika byotubwanya kutengela bisa kulongeka?
BUFUNDIJI BWA BIBLE BWA KAMWENO
Bulopwe bwa Leza Bwashilwile Kuludika mu 1914
Leza wālengeje mulopwe mukatampe umo alote kilotwa kya bupolofeto pano ke padi myaka 2 600 ne kupita, bupolofeto bwine bukifikidila ne dyalelo’di.
KITEBA KYA MULAMI
