Bible ufundija’mba mu bipangwa byonso bya pano panshi, i bantu batyetye kete bakenda mūlu. (Kusokwelwa 14:1, 3) Bakenda’mo kukaludika bu balopwe ne babitobo pamo na Yesu. (Luka 22:28-30; Kusokwelwa 5:9, 10) Bantu bavule bakasangwilwa mu paladisa pano pa ntanda.—Ñimbo ya Mitōto 37:11, 29.

 Bible kesambīlepo nansha dimo pa banyama banja nansha bambwa ba kwenda mūlu—pa bubinga bwendele’mo. Banyema kebakokejapo kubwanya bisakibwa bya kwitwa “lwito lwa mūlu.” (Bahebelu 3:1) Pa kubwanya bisakibwa, bilomba kwikala na buyuki, kulombola lwitabijo, ne kukōkela mbila ya Leza. (Mateo 19:17; Yoano 3:16; 17:3) I enka bantu kete bāpangilwe na dyese dya kwikala’ko nyeke.—Ngalwilo 2:16, 17; 3:22, 23.

 Pa kwenda mūlu, bipangwa bya pano pa ntanda bifwaninwe kusangulwa. (1 Bene Kodinda 15:42) Kadi Bible utela bantu bavule bāsangwilwe. (1 Balopwe 17:17-24; 2 Balopwe 4:32-37; 13:20, 21; Luka 7:11-15; 8:41, 42, 49-56; Yoano 11:38-44; Bilongwa 9:36-42; 20:7-12) Bonso basangwilwe i bantu, ke banyemapo.

•  Le banyema badi na muya?

•  Le myuya ibwanya kufwa?

•  Le banyema baloñanga bubi?

•  Le kususula banyema i kwitabijibwe?

 Aa. Bible unena’mba banyema ne bantu i myuya. (Umbadilo 31:28) Pāpangilwe Adama muntu mubajinji, kebāmupelepo muya, ino “wāikala ke muya mūmi.” (Ngalwilo 2:7, kunshi kwa dyani) Muya i mubundwe na bintu bibidi: “luvumbi lwa biloba” ne “umpuya wa būmi.”

 En-en, Bible ufundija’mba myuya ibwanya kufwa. (Bene Levi 21:11, kunshi kwa dyani; Ezekyele 18:20) Shi banyema nansha bantu abafu, bajokelanga ku luvumbi lwa panshi. (Musapudi 3:19, 20) Mu muneneno mukwabo, kebakidi’kopo. a

 Aa. Kulonga bubi i kulanga, kwiivwana ne kulonga kintu kijilula misoñanya ya Leza. Pa kulonga bubi, kipangwa kifwaninwe bidi kukwata butyibi mu muswelo okīkele, kintu kekibwanyapo kulonga banyema. Abo bavudile kulonga bintu na kitetyima ponso pobadi bōmi. (2 Petelo 2:12) Shi kitatyi kya būmi bwabo kibafule, bafwa, nansha shi kebalongelepo bubi.

 Aa. Leza wāpele bantu lupusa lwa kubikala banyema, ino ke lwa kwibasusulapo. (Ngalwilo 1:28; Ñimbo ya Mitōto 8:6-8) Leza utela mutyima ku būmi bwa nyema yense—kubadila’mo ne toni tutyetutye twine. (Yona 4:11; Mateo 10:29) Wāsoñenye bantu bekale biyampe na banyema.—Divilu 23:12; Kupituluka mu Bijila 25:4; Nkindi 12:10.