Aa, ke kitelelwe’mopo. Mu Bible kemudipo kishima “kikungilo,” kadi kafundijangapo amba myuya ya boba bafwa itōkejibwanga mu kikungilo. a Langulukila pa byobya bifundija Bible pa bubi ne lufu, ne muswelo keukwatañenepo lufundijo lwa kikungilo na binena Bible.

•   Kwitabija mu mashi a Yesu ye kutōkejanga muntu ku bubi, ke kitatyipo kipityijibanga mu kyokya kyobeta bu kikungilo. Bible unena’mba “mashi a Yesu . . . [Mwanā Leza] etutōkejanga ku bubi bonso,” ne amba “Yesu Kidishitu . . . wetunyongolwele ku bubi bwetu na mashi andi.” (1 Yoano 1:7; Kusokwelwa 1:5) Yesu wāpēne “bumi bwandi ke kya kukula nakyo bantu bavule,” wetufutyila pa bubi bwetu.—Mateo 20:28, DD.

•   Bantu bafwile kebayukilepo kintu. “Bōmi bayukile amba bakafwanga, ino bafwe kebayukilepo kintu nansha kimo” (Musapudi 9:5) Muntu mufwe kabwanyapo kuyuka kintu nansha kimo, kadi kabwanyapo nandi kutōkejibwa na mudilo wa kikungilo.

•   Mfuto ya bubi i kutupu’yo shi muntu wafu. Bible unena’mba, “mpalo ya bubi i lufu” ne amba “ke-muntu aye wafwile wapu kubinga bubinga ku bubi.” (Bene Loma 6:7, 23, MK) Lufu lwine i mfuto yonso kadi mibwane ya bubi.