Bible katelelepo difuku dine dyābutwilwe Yesu Kidishitu, monka mulombwela’kyo mabuku alonda’ko’a:

•   “Difuku dya bine dyābutwilwe Kidishitu kediyukenepo.”—New Catholic Encyclopedia.

•   “Difuku dine dyābutwilwe Kidishitu kediyukenepo.”—Encyclopedia of Early Christianity.

 Nansha Bible byakalondodidilapo kipangujo kya amba, ‘le Yesu wābutwilwe kitatyi’ka?’ ino ulombola binkumenkume bibidi byalongekele pa kubutulwa, bilengeja bantu bavule bafule ku kunena’mba kābutwilwepo mu mafuku 25 Kweji 12.

Ke mu buyopo

1.   Kwilembeja. Kitatyi kityetye kumeso kwa Yesu kubutulwa, Kesala Akutusa wāelele lubila’mba “ntanda yonso ikelwe na bantu ikelembeje.” Muntu ense wādi ufwaninwe kukelembeja ku “kibundi kyabo,” kintu kyadi kilomba kwenda lwendo lwa yenga mutuntulu nansha ne kupita. (Luka 2:1-3) Luno lubila lwādi padi na kitungo kya kutalula’ko bitanshi ne kutweja bantu bu basola—kintu kyokēbasangedipo kudi bantu mu kitatyi kyo-kyonso pa mwaka. Wāfītyije mutyima wa babikalwa bantu pa kwibalomba bende lwendo lulampe mu buyo, kitatyi kya mashika.

2.   Mikōko. Bakumbi bādi “bekele mu ntanda bakesha balama luombe lwabo bufuku.” (Luka 2:8) Dibuku dimo (Daily Life in the Time of Jesus) dinena’mba “yenga umo kumeso kwa Pashika [ku mfulo kwa Kweji 3]” kutūla ne pa bukata bwa Kweji 11, luombe lwādi panja. Kadi dibweja’ko amba: “Lwādi lutalwa na bakumbi mu buyo; kadi pa buno bubinga’tu bidi, bibamweka’mba difuku ditūdilwe amba ye dya Noele, mu buyo i dya bubela, mwanda Evanjile inena’mba bakumbi bādi mu ntanda.”

Ku Ngalwilo kwa ku dikumbi

 Tubwanya kuyuka kitatyi kyābutwilwe Yesu kupityila ku difuku dyaāfwile, pa Pashika mafuku 14 Kweji wa Nisane mu mwaka wa 33 Yesu Ke Mwiye. (Yoano 19:14-16) Yesu paāshilwile mwingilo wandi wa myaka isatu ne kipindi wādi na kintu kya myaka 30, nanshi wābutwilwe ku ngalwilo kwa ku muketeko mu mwaka wa 2 Yesu Kaile.—Luka 3:23.

 Byokekudipo bukamoni bulombola’mba Yesu Kidishitu wābutwilwe mu mafuku 25 Kweji 12, mwanda waka bafetanga Noele mu dino difuku? Dibuku dimo (The Encyclopædia Britannica) dinena’mba padi bendeji ba bipwilo bātongele dino difuku “mwanda wa dikwatañane na difuku dya bajentaila bene Loma dyobādi bafeta ‘kwikala’ko kwa dyuba kedishindwe,’” mu buyo. Mungya dino dibuku (The Encyclopedia Americana), bafundi bavule bakulupile amba bālongele uno muswelo “mwanda wa kukokela bajentaila mu bwine Kidishitu.”